استانادا تاۋەلسىز مەملەكەتتەر دوستاستىعى ۆولونتەرلەرىنىڭ العاشقى فورۋمى باستالدى. قازاقستان پرەزيدەنتى قاسىم-جومارت توقاەۆتىڭ باستاماسىمەن قولعا الىنعان فورۋم تمد ۇكىمەت باسشىلارى كەڭەسىنىڭ شەشىمى بويىنشا دوستاستىق ەلدەرىنىڭ ۆولونتەرلىك باستامالارىن بىرىكتىرىپ، ءوزارا تاجىريبە الماسۋعا ارنالعان جىل سايىنعى تۇراقتى الاڭ رەتىندە قۇرىلدى.
فورۋمنىڭ سالتاناتتى اشىلۋىنا قازاقستان رەسپۋبليكاسى پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترى ايدا بالاەۆا، بۇۇ ەرىكتىلەر باعدارلاماسىنىڭ اتقارۋشى ديرەكتورى تويلي كۋربانوۆ، اوسشك باس حاتشىسى قايرات سارىباي، تمد باس حاتشىسىنىڭ ورىنباسارى نۇرلان سەيىتىموۆ، سونداي-اق ۆولونتەرلىك ۇيىمداردىڭ وكىلدەرى مەن دوستاستىق ەلدەرىنىڭ دەلەگاتسيالارى قاتىستى.
فورۋم قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ قاتىسۋشىلارعا ارناعان قۇتتىقتاۋ سوزىنەن باستالدى. مەملەكەت باسشىسىنىڭ قۇتتىقتاۋىن ايدا بالاەۆا وقىپ بەردى.
«وسى ماڭىزدى باسقوسۋدىڭ بىرىككەن ۇلتتار ۇيىمى قازاقستاننىڭ ۇسىنىسىمەن جاريالاعان حالىقارالىق ۆولونتەرلەر جىلىندا ءوتۋىنىڭ ءمانى ەرەكشە. بۇل ۆولونتەرلەردىڭ الەۋمەتتىك، گۋمانيتارلىق جانە ەكولوگيالىق ماسەلەلەردى شەشۋدەگى وراسان ەڭبەگىنىڭ حالىقارالىق دەڭگەيدە مويىندالعانىنىڭ ايقىن كورىنىسى.
قازاقستان وسى فورۋمدى وتكىزۋدى ۇسىنا وتىرىپ، تمد ەلدەرىنىڭ ۆولونتەرلەرى تۇراقتى تۇردە تاجىريبە الماسىپ، ورتاق باستامالارىن حالىقارالىق دەڭگەيدە بىرلەسە ىلگەرىلەتەتىن الاڭ قۇرۋدى ماقسات ەتتى. ءبىز ءۇشىن دوستىقتى نىعايتىپ، ىنتىماق، مەيىرىمدىلىك پەن جاناشىرلىق سياقتى ىزگى قۇندىلىقتاردى قوعامعا تەرەڭ ءسىڭىرۋ ايرىقشا ماڭىزدى.
قازاقستاندا ۆولونتەرلىك ادام الەۋەتىن دامىتۋعا، ازاماتتىق جاۋاپكەرشىلىكتى ارتتىرۋعا جانە قوعامدا جاناشىرلىققا نەگىزدەلگەن جاڭا قارىم-قاتىناس مادەنيەتىن قالىپتاستىرۋعا ىقپال ەتىپ كەلەدى. 1 شىلدەدەن باستاپ كۇشىنە ەنگەن جاڭا كونستيتۋتسيادا ەلىمىزدىڭ تاريحىندا العاش رەت ۆولونتەرلىك قىزمەتتى مەملەكەتتىك قولداۋ ەڭ جوعارى قۇقىقتىق دەڭگەيدە بەكىتىلدى.
ەرىكتىلەردىڭ ىزگى نيەتى مەن رياسىز ەڭبەگى – ادامدارعا جىگەر بەرىپ، قوعامدى جاقسى جاققا وزگەرتەتىن قۋاتتى كۇش. بۇعان جالپىۇلتتىق «تازا قازاقستان» قوزعالىسى ايقىن مىسال بولا الادى. بۇل يگى باستاما از ۋاقىتتىڭ ىشىندە كوپتەگەن ازاماتتى، اسىرەسە بەلسەندى جاستاردى ورتاق ىسكە جۇمىلدىردى. جالپى، ەرىكتىلەر جىلى اياسىندا مىڭداعان ءىس-شارا وتكىزىلدى. بۇگىندە ەلىمىزدەگى ۆولونتەرلەر سانى 300 مىڭعا جۋىقتادى.
وسى فورۋم ەلدەرىمىزدىڭ گۋمانيتارلىق ىنتىماقتاستىعىن ودان ءارى دامىتۋعا، ادامدار اراسىنداعى بايلانىستى، ءوزارا سەنىم مەن تاتۋ كورشىلىكتى نىعايتۋعا ەلەۋلى ۇلەس قوساتىنىنا سەنەمىن. ءبىزدىڭ باستى ماقساتىمىز – دوستاستىقتى جاسامپازدىق پەن ورلەۋ، بىرلىك پەن ءوزارا تۇسىنىستىك سالتانات قۇرعان ورتاق كەڭىستىككە اينالدىرۋ.
بارشا ۆولونتەرگە اينالاسىنا بەيجاي قاراماي، ءاردايىم كومەك قولىن سوزۋعا جانە الەمدى جاقسى جاققا وزگەرتۋگە ۇمتىلىپ جۇرگەنى ءۇشىن شىنايى العىسىمدى بىلدىرەمىن. فورۋم جۇمىسىنا ساتتىلىك، بىرلەسكەن باستامالارعا تابىس تىلەيمىن!» – دەلىنگەن مەملەكەت باسشىسىنىڭ قۇتتىقتاۋ حاتىندا.
ايتا كەتەيىك، ەكى كۇنگە سوزىلاتىن فورۋمعا قازاقستان، ازەربايجان، بەلارۋس، قىرعىزستان، رەسەي، تاجىكستان جانە وزبەكستاننان 300-گە جۋىق دەلەگات قاتىسۋدا. ولاردىڭ قاتارىندا مەملەكەتتىك ورگاندار مەن ۆولونتەرلىك ۇيىمداردىڭ وكىلدەرى، سونداي-اق ەرىكتىلەر بار.
فورۋم اياسىندا پانەلدىك سەسسيالار، تاقىرىپتىق پىكىرتالاستار جانە ۆولونتەرلىك قىزمەتتىڭ تابىستى تاجىريبەلەرىنىڭ تانىستىرىلىمدارى وتەدى.
مەملەكەتارالىق ىنتىماقتاستىقتى دامىتۋعا، سونداي-اق ەكولوگيا، الەۋمەتتىك جانە ينكليۋزيۆتى قولداۋ، جاستار ۆولونتەرلىگى باعىتتارىندا بىرلەسكەن باستامالاردى جۇزەگە اسىرۋعا ەرەكشە نازار اۋدارىلادى.
