Astanada Täuelsız Memleketter Dostastyǧy volonterlerınıŋ alǧaşqy forumy bastaldy. Qazaqstan Prezidentı Qasym-Jomart Toqaevtyŋ bastamasymen qolǧa alynǧan forum TMD Ükımet basşylary keŋesınıŋ şeşımı boiynşa Dostastyq elderınıŋ volonterlık bastamalaryn bırıktırıp, özara täjıribe almasuǧa arnalǧan jyl saiynǧy tūraqty alaŋ retınde qūryldy.
Forumnyŋ saltanatty aşyluyna Qazaqstan Respublikasy Premer-ministrınıŋ orynbasary – Mädeniet jäne aqparat ministrı Aida Balaeva, BŪŪ Erıktıler baǧdarlamasynyŋ atqaruşy direktory Toili Kurbanov, AÖSŞK Bas hatşysy Qairat Sarybai, TMD Bas hatşysynyŋ orynbasary Nūrlan Seiıtımov, sondai-aq volonterlık ūiymdardyŋ ökılderı men Dostastyq elderınıŋ delegasiialary qatysty.
Forum Qazaqstan Respublikasynyŋ Prezidentı Qasym-Jomart Toqaevtyŋ qatysuşylarǧa arnaǧan qūttyqtau sözınen bastaldy. Memleket basşysynyŋ qūttyqtauyn Aida Balaeva oqyp berdı.
«Osy maŋyzdy basqosudyŋ Bırıkken Ūlttar Ūiymy Qazaqstannyŋ ūsynysymen jariialaǧan Halyqaralyq volonterler jylynda ötuınıŋ mänı erekşe. Būl volonterlerdıŋ äleumettık, gumanitarlyq jäne ekologiialyq mäselelerdı şeşudegı orasan eŋbegınıŋ halyqaralyq deŋgeide moiyndalǧanynyŋ aiqyn körınısı.
Qazaqstan osy forumdy ötkızudı ūsyna otyryp, TMD elderınıŋ volonterlerı tūraqty türde täjıribe almasyp, ortaq bastamalaryn halyqaralyq deŋgeide bırlese ılgerıletetın alaŋ qūrudy maqsat ettı. Bız üşın dostyqty nyǧaityp, yntymaq, meiırımdılık pen janaşyrlyq siiaqty ızgı qūndylyqtardy qoǧamǧa tereŋ sıŋıru airyqşa maŋyzdy.
Qazaqstanda volonterlık adam äleuetın damytuǧa, azamattyq jauapkerşılıktı arttyruǧa jäne qoǧamda janaşyrlyqqa negızdelgen jaŋa qarym-qatynas mädenietın qalyptastyruǧa yqpal etıp keledı. 1 şıldeden bastap küşıne engen jaŋa Konstitusiiada elımızdıŋ tarihynda alǧaş ret volonterlık qyzmettı memlekettık qoldau eŋ joǧary qūqyqtyq deŋgeide bekıtıldı.
Erıktılerdıŋ ızgı nietı men riiasyz eŋbegı – adamdarǧa jıger berıp, qoǧamdy jaqsy jaqqa özgertetın quatty küş. Būǧan jalpyūlttyq «Taza Qazaqstan» qozǧalysy aiqyn mysal bola alady. Būl igı bastama az uaqyttyŋ ışınde köptegen azamatty, äsırese belsendı jastardy ortaq ıske jūmyldyrdy. Jalpy, Erıktıler jyly aiasynda myŋdaǧan ıs-şara ötkızıldı. Bügınde elımızdegı volonterler sany 300 myŋǧa juyqtady.
Osy forum elderımızdıŋ gumanitarlyq yntymaqtastyǧyn odan ärı damytuǧa, adamdar arasyndaǧy bailanysty, özara senım men tatu körşılıktı nyǧaituǧa eleulı üles qosatynyna senemın. Bızdıŋ basty maqsatymyz – Dostastyqty jasampazdyq pen örleu, bırlık pen özara tüsınıstık saltanat qūrǧan ortaq keŋıstıkke ainaldyru.
Barşa volonterge ainalasyna beijai qaramai, ärdaiym kömek qolyn sozuǧa jäne älemdı jaqsy jaqqa özgertuge ūmtylyp jürgenı üşın şynaiy alǧysymdy bıldıremın. Forum jūmysyna sättılık, bırlesken bastamalarǧa tabys tıleimın!» – delıngen Memleket basşysynyŋ qūttyqtau hatynda.
Aita keteiık, ekı künge sozylatyn forumǧa Qazaqstan, Äzerbaijan, Belarus, Qyrǧyzstan, Resei, Täjıkstan jäne Özbekstannan 300-ge juyq delegat qatysuda. Olardyŋ qatarynda memlekettık organdar men volonterlık ūiymdardyŋ ökılderı, sondai-aq erıktıler bar.
Forum aiasynda paneldık sessiialar, taqyryptyq pıkırtalastar jäne volonterlık qyzmettıŋ tabysty täjıribelerınıŋ tanystyrylymdary ötedı.
Memleketaralyq yntymaqtastyqty damytuǧa, sondai-aq ekologiia, äleumettık jäne inkliuzivtı qoldau, jastar volonterlıgı baǧyttarynda bırlesken bastamalardy jüzege asyruǧa erekşe nazar audarylady.
