برازيليادا 36 جاستاعى ەر ادام 8 جاستاعى ۇلىن جانە ءوزىن ءولتىرۋدى جوسپارلادى دەگەن كۇدىكپەن قاماۋعا الىندى. بۇل تۋرالى جەرگىلىكتى باق BILD باسىلىمىنا سىلتەمە جاساپ جازدى، دەپ حابارلايدى "ادىرنا".
تەرگەۋ مالىمەتىنشە، كۇدىكتى ەكى ايدان استام ۋاقىت بويى ChatGPT-پەن سويلەسىپ، ءوز جوسپارىن ەگجەي-تەگجەيلى تالقىلاعان. جۇيەنىڭ قاۋىپسىزدىك مەحانيزمى اڭگىمەلەردەن قاۋىپ بەلگىلەرىن انىقتاپ، اقپاراتتى OpenAI-عا جەتكىزگەن. كەيىن كومپانيا بۇل مالىمەتتى اقش فەدەرالدى تەرگەۋ بيۋروسىنا (FBI) حابارلاعان. ال امەريكالىق تاراپ اقپاراتتى برازيليا قۇقىق قورعاۋ ورگاندارىنا جولداعان.
دەرەك برازيليا ادىلەت مينيسترلىگىنىڭ Ciberlab تەحنولوگيالىق بولىمشەسىنە 16 ماۋسىمدا تۇسكەن. ءۇش كۇننەن كەيىن پوليتسيا ارنايى وپەراتسيا وتكىزىپ، كۇدىكتىنى ۇستادى. تەرگەۋشىلەردىڭ ايتۋىنشا، ەر ادام قىلمىستى 20 ماۋسىمدا جاساۋدى جوسپارلاعان.
تەرگەۋ بارىسىندا ونىڭ مۇنداي ارەكەتكە بارۋىنا اليمەنت تولەۋدەن جالتارۋ جانە ۇلىمەن قارىم-قاتىناسىنىڭ بولماۋى سەبەپ بولعانى انىقتالعان. ءتىنتۋ كەزىندە كۇدىكتىنىڭ ۇيىنەن بەلگىسىز سۇيىقتىق قۇيىلعان ءتورت بوتەلكە مەن ارقان تابىلعان.
ەر ادام قاماۋدا 54 كۇن وتىرعاننان كەيىن، 13 تامىزدا بوساتىلدى. سوت تەرگەۋدىڭ ۇزاققا سوزىلعانىن ەسكەرىپ، ونى ءارى قاراي قاماۋدا ۇستاۋ قاجەتتىلىگى جوق دەپ شەشكەن. قازىر كۇدىكتى ەلەكتروندى بىلەزىك تاعىپ ءجۇر. سونداي-اق وعان ۇلىنا جانە بالانىڭ اناسىنا جاقىنداۋعا تىيىم سالىنعان.
كۇدىكتىنىڭ ادۆوكاتى پەدرو پەسسي قورعاۋ تاراپىنىڭ ۇستانىمىن ءبىلدىرىپ، ChatGPT-پەن سويلەسۋدىڭ ءوزى قىلمىس بولىپ سانالماۋى ءتيىس ەكەنىن مالىمدەدى.
