الماتىداعى №90 مەكتەپ-ليتسەيىنىڭ ۇستازدارى مەن وقۋشىلارى الەمنىڭ ۇزدىك مۇعالىمدەرىنىڭ قاتارىنا ەنگەن، Global Teacher حالىقارالىق مارتەبەسىنە يە تاتيانا بەلوۋسوۆامەن كەزدەستى.
ءىس-شارا اياسىندا تاتيانا بەلوۋسوۆا ءوز تاجىريبەسىمەن ءبولىسىپ، زاماناۋي پەداگوگيكانىڭ نەگىزگى تاسىلدەرى تۋرالى ايتىپ بەردى. سونداي-اق، ول Global Teacher بەدەلدى حالىقارالىق مارتەبەسىنە يە بولۋدىڭ ەرەكشەلىكتەرىن ءتۇسىندىردى. قاتىسۋشىلار وزدەرىن تولعاندىرعان سۇراقتارىن قويىپ، ءبىلىم بەرۋ سالاسىنداعى وزەكتى ماسەلەلەردى تالقىلادى جانە وقىتۋ ساپاسىن ارتتىرۋعا ارنالعان پراكتيكالىق ۇسىنىستار الدى.
№90 مەكتەپ-ليتسەيىنىڭ ديرەكتورى بۇلبۇل راسبەكقىزىنىڭ ايتۋىنشا، بۇل ءىس-شارا پەداگوگتاردىڭ كاسىبي قاۋىمداستىعىن دامىتۋعا، وقۋشىلاردىڭ شىعارماشىلىق باستامالارىن قولداۋعا جانە مەكتەپتىڭ يننوۆاتسيالىق ءارى مادەني ءبىلىم بەرۋ ورتالىعى رەتىندەگى ءيميدجىن نىعايتۋعا باعىتتالعان.
«بۇل كەزدەسۋ ءبىز ءۇشىن وتە ماڭىزدى. ويتكەنى تاتيانا گەننادەۆنا زەينەتكەر بولا تۇرا، وسىنداي ۇلكەن كونكۋرستى جەڭىپ الىپ وتىر. جاس ماماندار مەن ستۋدەنتتەردى مەكتەپكە تارتۋ، پەداگوگ مارتەبەسىن كوتەرۋ ماقساتىندا وسىنداي جانداردى شاقىردىق. ولاردىڭ جەتىستىككە قالاي جەتكەنى ارىپتەستەرىمىز ءۇشىن دە پايدالى. مۇمكىن، وقۋشىلارىمىزدىڭ اراسىندا بولاشاقتا مۇعالىم بولۋدى تاڭدايتىندار بار شىعار. بىزگە جاقسى مۇعالىمدەر قاجەت. ءبىزدىڭ الدىمىزدا وتىرعان بالالار وتە تالانتتى. بۇل – ارنايى فيزيكا-ماتەماتيكالىق ليتسەي. قازىرگى ۋاقىتتا اسىرەسە ماتەماتيكا، فيزيكا، حيميا ءپانى مۇعالىمدەرى تاپشى. سوندىقتان بۇل ءىس-شارا بالالار ءۇشىن كاسىپتىك باعدار رەتىندە دە ماڭىزدى. سونىمەن قاتار بۇگىن مەكتەبىمىزدە قازاق تەاترىنىڭ تۇساۋكەسەرى وتۋدە. سول تەاتردى وسىنداي قۇرمەتتى قوناقتاردىڭ اشقانىن قالادىق»، – دەيدى بۇلبۇل راسبەكقىزى.
ايتا كەتەيىك، الماتىداعى №95 مەكتەپ-ليتسەيدىڭ حيميا ءپانى مۇعالىمى، «قازاقستاننىڭ ۇزدىك ۇستازى – 2024» قۇرمەتتى اتاعىنىڭ يەگەرى تاتيانا بەلوۋسوۆا Global Teacher Prize 2025–2026 حالىقارالىق بايقاۋىنىڭ قورىتىندىسى بويىنشا الەمنىڭ ەڭ ۇزدىك 50 پەداگوگىنىڭ قاتارىنا ەندى. بۇل ءتىزىم 2025 جىلعى 15 جەلتوقساندا Global Teacher Prize رەسمي سايتىندا جاريالاندى.
كەيىن ۇستازدى مەملەكەت باسشىسى قۇتتىقتاپ، بۇل جوعارى ماراپات ونىڭ وسكەلەڭ ۇرپاقتى تاربيەلەۋ مەن وقىتۋعا باعىتتالعان كوپجىلدىق ەڭبەگىنىڭ ناتيجەسى ەكەنىن اتاپ ءوتتى.
«№90 مەكتەپ-ليتسەي – الماتى قالاسىنداعى ايگىلى وقۋ ورىندارىنىڭ ءبىرى. مەكتەپ ۇجىمىمەن، وقۋشىلارمەن كەزدەسۋ، تاجىريبە ءبولىسۋ مەنى ارقاشان شابىتتاندىرادى. قازاقستان Global Teacher Prize بايقاۋىنا بەس رەت قاتىسىپ، ءۇش رەت ۇزدىك 50 پەداگوگتىڭ قاتارىنا ەندى. الداعى ۋاقىتتا ۇزدىك وندىققا ەنەدى دەپ سەنەمىز. بۇعان ۇستازدار قاۋىمىنىڭ تولىق مۇمكىندىگى بار. وسىنداي كەزدەسۋلەردەن ۇستازدار باعىت الىپ، حالىقارالىق بايقاۋلارعا قاتىسىپ، جەڭىمپاز اتانادى دەپ ويلايمىن. №90 مەكتەپ-ليتسەي باسشىلىعىنا جانە ۇجىمىنا العىس ايتامىن»، – دەدى تاتيانا بەلوۋسوۆا.
ءىس-شارانىڭ سوڭىندا مەكتەپتە «شىراق» قازاق تەاترى اشىلىپ، بالالاردىڭ سۇيىكتى شىعارماسى – «مەنىڭ اتىم قوجا» ساحنالاندى. قىزىل لەنتانى قۇرمەتتى قوناق تاتيانا بەلوۋسوۆا قيىپ، جاس ونەرپازدارعا ساتتىلىك تىلەدى.
ايتا كەتەيىك، №90 مامانداندىرىلعان دارىندى بالالارعا ارنالعان فيزيكا-ماتەماتيكالىق ليتسەي – الماتى قالاسىنداعى ەڭ تانىمال وقۋ ورىندارىنىڭ ءبىرى. بۇگىندە مەكتەپتە 1256 وقۋشى ءبىلىم الادى.
