الماتىدا ءالى 500 cتۋدەنت جاتاقحاناسىز ساندالىپ ءجۇر. بۇل تۋرالى «Jibek Joly» تەلەارناسىنىڭ «جاڭا ۋاقىت» باعدارلاماسىنا سۇحبات بەرگەن عىلىم جانە جوعارى ءبىلىم ۆيتسە-ءمينيسترى تالعات ەشەنقۇلوۆ مالىمدەدى، دەپ حابارلايدى “ادىرنا” ۇلتتىق پورتالى.
«بۇگىنگى تاڭداعى وتە وزەكتى سۇراق كوتەرىلىپ تۇر. «دالادا قاڭعىپ جۇرگەن ستۋدەنت»، دەگەن ءسوزدى قولدانۋدان اۋلاق بولساق. ويتكەنى، ءدال وسى ماسەلەنى تەكسەرۋ ءۇشىن ءبىزدىڭ ارىپتەستەرىمىز رەيد قۇرىپ، جاعدايدى انىقتادى. ونىڭ ناتيجەسىندە دالادا قونىپ جاتقان بىردە ءبىر ستۋدەنت جولىققان جوق. دەگەنمەن مۇنداي ماسەلە جوق دەپ ايتا المايمىز. ستاتيستيكاعا توقتالاتىن بولساق، اۋەلى ماسەلەنىڭ اراجىگىن ءبولىپ العان ءجون. بۇگىنگى تاڭدا الماتى بويىنشا 181 مىڭنان استام ستۋدەنت بار. ونىڭ ىشىندە 121 761 ستۋدەنت باسقا وڭىرلەردەن كەلگەن. وسى 121 مىڭ ستۋدەنتتىڭ 36 مىڭنان استامى جاتاقحاناعا ورنالاستىرىلدى. قالعان 37 مىڭ ستۋدەن حوستەلدەر مەن پاتەرلەرگە ورنالاستى. 47 مىڭ بالا وزدەرىنىڭ تۋىستارى مەن تانىستارىنىڭ ۇيىندە تۇرىپ جاتىر. بۇل – ناقتى مالىمەت. بارلىعىن قوسا كەلگەندە، 121 261 ستۋدەنت ورنالاستىرىلعان. ال 500 cتۋدەنت قازىرگى ۋاقىتتا ەشقايدا ورنالاستىرىلعان جوق»، – دەدى ۆيتسە-مينيستر.
تالعات ەشەنقۇلوۆ كەلتىرگەن دەرەككە سايكەس، الماتىداعى وقۋ ورىندارى ستۋدەنتتەردى ورنالاستىرۋ بويىنشا حوستەلدەر جانە جەكە پاتەر يەلەرىمەن كەلىسىمشارتتار جاساسىپ جاتىر.
«كۇنى كەشە اباي اتىنداعى قازاق ۇلتتىق پەداگوگيكالىق ۋنيۆەرسيتەتى 4 حوستەلمەن كەلىسىمشارتقا وتىردى. كەلىسىمشارت نەگىزىندە ءبىزدىڭ ستۋدەنتتەرگە بەرىلەتىن ورىنداردىڭ باعاسى 20-25 مىڭ تەڭگەدەن اسپايدى دەپ كەلىسىلدى. جالپى الماتى قالاسىنداعى جوعارى وقۋ ورىندارىنىڭ بارلىعى دەرلىك ستۋدەنتتەردى ورنالاستىرۋ ءۇشىن حوستەل جانە باسقا دا ورىندارمەن جەكەلەي كەلىسىمشارتقا وتىرىپ جاتىر»، – دەپ اتاپ ءوتتى تالعات ەشەنقۇلوۆ.
ۆيتسە-مينيستر رەسپۋبليكا بويىنشا جاتاقحانالاردا 101 مىڭ ورىن بار ەكەنىن ايتتى. ال بيىل ولاردا تۇرۋعا 87 مىڭ ستۋدەنت ءوتىنىش بەرگەن. قالعاندارى بوس تۇر. تالعات ەشەنقۇلوۆتىڭ ايتۋىنشا، ورىنداردىڭ كوبى وڭىرلىك ۋنيۆەرسيتەتتەردىڭ ۇلەسىنە تيەسىلى.
”ادىرنا” ۇلتتىق پورتالى
