تۇركيا پارلامەنتى تىيىم سالىنعان كۇردىستان جۇمىسشى پارتياسىنىڭ بۇرىنعى مۇشەلەرىنىڭ بەيبىت ومىرگە ورالۋىنا مۇمكىندىك بەرەتىن شارتتى راقىمشىلىق تۋرالى زاڭ جوباسىن قابىلدادى، دەپ حابارلايدى "ادىرنا" ءتىلشىسى.
DW مالىمەتىنشە، زاڭ جوباسىن 468 دەپۋتات قولداسا، 88 دەپۋتات قارسى داۋىس بەرگەن. ال التى دەپۋتات قالىس قالعان. قۇجاتقا سايكەس، كجپ مۇشەلەرىنىڭ بىرقاتار قىلمىستارى بويىنشا قىلمىستىق قۋدالاۋ مەن جازانى ورىنداۋ بەس جىلدان ون جىلعا دەيىن توقتاتىلۋى مۇمكىن. ەگەر وسى كەزەڭدە جاڭا قىلمىس جاسالماسا، ءتيىستى ىستەر توقتاتىلىپ، جازا وتەلگەن بولىپ ەسەپتەلەدى.
الايدا اۋىر قىلمىس، سونىڭ ىشىندە ادام ولتىرۋگە قاتىسى بار تۇلعالار بۇل تەتىكتىڭ قولدانىلۋ اياسىنان شىعارىلادى.
تۇركيا دەپۋتاتتارىنىڭ مالىمەتىنشە، العاشقى كەزەڭدە ەل تۇرمەلەرىندە وتىرعان كجپ-نىڭ شامامەن 10 مىڭ بۇرىنعى جاقتاۋشىسىنىڭ 3500-گە جۋىعى بوساتىلۋى مۇمكىن. زاڭ نورمالارى بىردەن كۇشىنە ەنبەيدى. ولاردى قولدانۋ ءۇشىن قاۋىپسىزدىك ورگاندارى كجپ مەن ونىمەن بايلانىستى قارۋلى قۇرىلىمداردىڭ تاراتىلعانىن جانە قارۋدىڭ تاپسىرىلعانىن راستاۋى قاجەت. بۇل قورىتىندى ۇلتتىق قاۋىپسىزدىك كەڭەسىنىڭ ماقۇلداۋىنان ءوتىپ، رەسمي باسىلىمدا جاريالانۋى ءتيىس.
قابىلدانعان زاڭدا كجپ نەگىزىن قالاۋشى ابدۋللاح ودجالاننىڭ جاعدايىنا قاتىستى ارنايى ەرەجە قاراستىرىلماعان. ول 27 جىلدان بەرى تۇرمەدە جازاسىن وتەپ كەلەدى. كجپ وكىلدەرى ودجالان بوساتىلمايىنشا، زاڭداعى بىرقاتار شارانىڭ كۇتىلگەن ناتيجەگە جەتكىزبەيتىنىن مالىمدەدى.
ال تۇركيا پرەزيدەنتى رەجەپ تايىپ ەردوعاننىڭ اكىمشىلىگى زاڭدى «تەرروريزمسىز تۇركيا» يدەياسىن قولدايتىن ماڭىزدى بەلگى دەپ باعالادى. بيلىك بۇل قادام ەلدەگى بەيبىتشىلىك پەن ۇلتتىق بىرلىكتى نىعايتۋعا باعىتتالعانىن اتاپ ءوتتى. كجپ-نىڭ تۇركيا مەملەكەتىنە قارسى قارۋلى كۇرەسى 1984 جىلى باستالعان. قاقتىعىستار بارىسىندا ونداعان مىڭ ادام قازا تاپقان. 2025 جىلدىڭ اقپانىندا ابدۋللاح ودجالان ۇيىمدى قارۋىن تاستاپ، ءوزىن-ءوزى تاراتۋعا شاقىرعان.
كەيىن كجپ باسشىلىعى ۇيىمدى تاراتۋ جانە قارۋلى كۇرەستى توقتاتۋ تۋرالى شەشىم قابىلدادى. 2025 جىلدىڭ شىلدەسىندە ۇيىمنىڭ قارۋسىزدانۋ پروتسەسى باستالىپ، كەيىن قارۋلى قۇرىلىمدارىن تۇركيا اۋماعىنان شىعارۋ تۋرالى مالىمدەمە جاسالدى.
