كەشە پارتيالار مەكتەپتەردە، اۋرۋحانالاردا، زاۋىتتاردا جانە ارحيۆتەردە سايلاۋشىلارمەن كەزدەسىپ، ءار سالانىڭ وزەكتى ماسەلەلەرىن تالقىلادى. كوتەرىلگەن تاقىرىپتار ءارتۇرلى بولعانىمەن، ولاردىڭ ءبارىن بىرىكتىرگەن ورتاق وزەك – ەڭبەك ادامى جانە ونىڭ كۇندەلىكتى ماسەلەلەرى بولدى.
كوكشەتاۋ – بولاشاق قالالار تۋرالى
«ادىلەت» پارتياسىنىڭ وكىلدەرى اقمولا وبلىسىنىڭ تۇرعىندارىمەن كەزدەستى. پارتيانىڭ رەسپۋبليكالىق سايلاۋالدى شتابى ۇيىمداستىرعان كەزدەسۋدە كوكشەتاۋلىقتار ءوڭىر ءۇشىن ماڭىزدى باستامالاردى ۇسىندى. ولاردىڭ قاتارىندا كاسىپكەرلەرگە ارنالعان بىرىڭعاي تسيفرلىق پلاتفورمانى ىسكە قوسۋ، كوللەدجدەرگە جاساندى ينتەللەكت تەحنولوگيالارىن ەنگىزۋ، كوممۋنالدىق جەلىلەردى جاڭعىرتۋ جانە جاڭا جۇمىس ورىندارىن قۇرۋ بار.
وڭىرلەردەگى جۇمىسىن جالعاستىرعان «ادىلەت» سپورتشىلارمەن، جاتتىقتىرۋشىلارمەن، ونەركاسىپ كاسىپورنىنىڭ ۇجىمىمەن، سونداي-اق تۋريزم جانە شيپاجاي-كۋرورت سالاسىنىڭ وكىلدەرىمەن كەزدەستى. كەزدەسۋلەردە سپورتتى، ءتۋريزمدى، كاسىپكەرلىكتى جانە اگروونەركاسىپ كەشەنىن دامىتۋ، فەرمەرلەردى قولداۋ مەن اۋىل شارۋاشىلىعى ونىمدەرىن تەرەڭ وڭدەۋ ماسەلەلەرى تالقىلاندى.
كەزدەسۋلەردىڭ بىرىندە اقمولا وبلىستىق وليمپيادالىق رەزەرۆتى دايارلاۋ ورتالىعىنىڭ ادىسكەرى ەكاتەرينا كرۋگليك بالالاردىڭ تۇرعىلىقتى جەرىنە نەمەسە وتباسىنىڭ ماتەريالدىق جاعدايىنا قاراماستان تەگىن سپورت سەكتسيالارىنا تەڭ قولجەتىمدىلىگىن قامتاماسىز ەتۋ ماسەلەسىن كوتەردى.
مەكتەپ – رەفورمانىڭ باستاۋى
جسدپ ەلدىڭ بولاشاعى ءبىلىم بەرۋ جۇيەسىنە بايلانىستى دەپ ەسەپتەپ، وسى تاقىرىپقا ارنالعان ارنايى كونفەرەنتسيا وتكىزدى. دەپۋتاتتىققا كانديداتتار، پەداگوگتەر مەن ساراپشىلار ءبىلىم ساپاسى، كادر تاپشىلىعى، مەكتەپ ينفراقۇرىلىمىنىڭ جاي-كۇيى جانە مۇعالىمدەردى قولداۋ ماسەلەلەرىن تالقىلادى.
تالقىلاۋ قورىتىندىسىندا قاتىسۋشىلار ءبىر پىكىرگە كەلدى: مەكتەپتە جۇيەلى رەفورمالار جۇرگىزىلمەيىنشە، باسەكەگە قابىلەتتى مەملەكەت تۋرالى ايتۋ قيىن.
سول كۇنى ءبىلىم بەرۋ تاقىرىبىنا قاتىستى ءوز ۇستانىمىن Respublica پارتياسى دا ءبىلدىردى. كانديدات نۇرگۇل تاۋ قازاقستان حالىق پارتياسىنىڭ PISA ناتيجەسى تومەن مەكتەپتەرگە ايىپپۇل سالۋ تۋرالى باستاماسىن سىنعا الىپ، مۇنداي ءتاسىل ماسەلەنى شەشۋدىڭ ورنىنا كىنالىنى ىزدەۋگە ۇقسايتىنىن ايتتى.
ونىڭ پىكىرىنشە، اۋىل مەكتەپتەرى باستاپقىدان-اق قالالىق مەكتەپتەرمەن تەڭ جاعدايدا ەمەس. سوندىقتان ولاردان بىردەي ناتيجە تالاپ ەتۋ – ورىنسىز، ال مۇعالىمدەردى جازالاۋ ءبىلىم بەرۋ جۇيەسىنىڭ السىزدىگىن عانا كورسەتەدى.
Respublica باسقا جولدى ۇسىنادى. پارتيا مۇعالىمدەردى جازالاۋدىڭ ورنىنا ءبىلىم بەرۋ ورتاسىن دامىتۋ مەن پەداگوگتەردى قولداۋدى قۇپتايدى.
ەكولوگيا – دارىگەرلەر كوزىمەن
«بايتاق» پارتياسى ءۇشىن ەكولوگيا ماسەلەسى دەنساۋلىق ساقتاۋ سالاسىمەن تىعىز بايلانىستى. كەشە بۇل ۇستانىم ءىس جۇزىندە كورىنىس تاپتى.
كانديدات تاير ساعىمباەۆ اقتاۋداعى №2 قالالىق ەمحانانىڭ ۇجىمىمەن كەزدەستى. كەزدەسۋ بارىسىندا مەديتسينا سالاسىنىڭ جاي-كۇيى، ءوڭىردىڭ ەكولوگيالىق قاۋىپسىزدىگى جانە پاتسيەنتتەردى الەۋمەتتىك قورعاۋ ماسەلەلەرى تالقىلاندى.
پارتيانىڭ پايىمىنشا، ناقتى شەشىمدەر كەڭسە قابىرعاسىندا ەمەس، كۇن سايىن حالىقپەن جۇمىس ىستەيتىن مامانداردىڭ پىكىرىنە سۇيەنە وتىرىپ قابىلدانۋى ءتيىس.
تاريحي جادى – ساياسي كۇن تارتىبىندە
قازاقستان حالىق پارتياسى كەشە تاريحي جادى تاقىرىبىنا ەرەكشە نازار اۋداردى. پارتيا ىزدەستىرۋ جۇمىستارىن، ارحيۆتىك زەرتتەۋلەردى جانە پاتريوتتىق جوبالاردى قولداۋ ماقساتىندا «مەموريالدىق ايماق» بىرلەستىگىمەن ىنتىماقتاستىق تۋرالى مەموراندۋمعا قول قويدى.
پارتيا توراعاسى نۇرسۇلتان شوقانوۆتىڭ ايتۋىنشا، ونىڭ ارعى اتاسى ونداعان جىل بويى حابار-وشارسىز كەتكەندەر قاتارىندا سانالىپ كەلگەن. كەيىن ىزدەستىرۋ جاساعى ونىڭ جەرلەنگەن ورنىن انىقتاعان.
قحپ بۇل باستامانى اتا-بابا ەرلىگىنە تاعزىم ەتۋدىڭ جانە تاريحي شىندىقتى ساقتاۋدىڭ ماڭىزدى بولىگى دەپ ەسەپتەيدى.
كەنشىلەر ولكەسىندەگى كەزدەسۋلەر
كەشە قوستاناي وبلىسىنا توراعاسى قايرات ايتۋعانوۆ باستاعان «اۋىل» پارتياسى باردى. ول ەڭبەك ۇجىمدارىمەن، پارتيا بەلسەندىلەرىمەن جانە اۋىل تۇرعىندارىمەن كەزدەسىپ، اگروونەركاسىپ كەشەنىن دامىتۋ، كاسىپكەرلىكتى قولداۋ جانە ينفراقۇرىلىمدى جاڭارتۋ ماسەلەلەرىن تالقىلادى.
ساپار بارىسىندا ايتۋعانوۆ ءوزىنىڭ ەڭبەك جولى باستالعان «قازپوشتا» ۇجىمىمەن دە كەزدەستى. ساپار جاستار ۆولونتەرلەرىمەن بىرگە وتكەن ۇگىت-ناسيحات اكتسياسىمەن اياقتالدى.
ال ءدال وسى ۋاقىتتا قاراعاندىعا «اق جول» پارتياسىنىڭ ءتورايىمى ءدانيا ەسپاەۆا باردى. «Seven Refractories Asia» جشس ۇجىمىمەن كەزدەسۋدە وتاندىق وندىرۋشىلەردى قولداۋ، جاڭا جۇمىس ورىندارىن اشۋ، سالىق ساياساتى جانە ونەركاسىپتى دامىتۋ ماسەلەلەرى ءسوز بولدى.
سوڭعى كۇندەرى بىرنەشە پارتيانىڭ جەزقازعان مەن قاراعاندى وبلىسىن كەزدەسۋ الاڭى رەتىندە تاڭداۋى كەزدەيسوق ەمەس. بۇل وڭىرلەر ۇزاق جىلدار بويى ەل ەكونوميكاسىنىڭ دامۋىنا ۇلەس قوسىپ كەلە جاتقان ەڭبەك ادامدارىنىڭ سيمۆولىنا اينالعان. باعدارلامالارى ءارتۇرلى بولعانىمەن، ەڭبەككە قۇرمەت تاقىرىبى كوپتەگەن پارتيالاردى ورتاق ۇستانىم توڭىرەگىنە توپتاستىرىپ وتىر.
جەزقازعانداعى پىكىرتالاس
Respublica پارتياسى جەزقازعاندا ءوز جاقتاستارىنىڭ فورۋمىن وتكىزىپ، وندا ءوڭىردىڭ ونەركاسىبى، جولدارىنىڭ جاعدايى، مەديتسيناسى جانە ءبىلىم بەرۋ سالاسى تالقىلاندى.
الايدا كوپشىلىكتىڭ نازارىن باعدارلامالىق ۇسىنىستاردان گورى مەيىر الپىسوۆتىڭ «اق جول» پارتياسىنىڭ سىنىنا بەرگەن جاۋابى اۋداردى.
ول مەملەكەت ازاماتتارىن «ۇرى نەمەسە جەمقور» رەتىندە قابىلداماۋعا شاقىرىپ، شەتەلدە تابىس تاۋىپ جۇرگەن قازاقستاندىقتاردىڭ قاراجاتىن ەل ەكونوميكاسىنا ينۆەستيتسيالاۋعا جاعداي جاساۋ قاجەت ەكەنىن ايتتى. ونىڭ پىكىرىنشە، ولاردى الەۋەتتى زاڭ بۇزۋشى رەتىندە قاراستىرۋ دۇرىس ەمەس.
وسىلايشا، ءبىر كۇننىڭ ىشىندە سايلاۋالدى ناۋقاندا ەكى نەگىزگى پىكىرتالاس ايقىندالدى. ونىڭ ءبىرى – مەكتەپتەرگە ايىپپۇل سالۋ ماسەلەسىنە، ەكىنشىسى – شەتەلدە بيزنەس جۇرگىزەتىن قازاقستاندىقتارعا دەگەن سەنىمگە قاتىستى بولدى. بۇل سايلاۋ جاقىنداعان سايىن پارتيالاردىڭ ءوزارا اشىق پىكىرتالاسقا ءجيى ءتۇسىپ جاتقانىن جانە ولاردىڭ باعدارلامالارى اراسىنداعى ناقتى ايىرماشىلىقتاردىڭ بارعان سايىن ايقىندالا تۇسكەنىن كورسەتەدى.
