باتىس قازاقستان وبلىسىندا ورال قالاسىنىڭ تۇرعىنى ۋكرايناداعى قارۋلى قاقتىعىسقا قاتىسۋ ءۇشىن ازاماتتاردى تارتقانى ءۇشىن سەگىز جىلعا باس بوستاندىعىنان ايىرىلدى، دەپ حابارلايدى "ادىرنا".
بۇل تۋرالى بقو سوتىنىڭ ءباسپاسوز قىزمەتى حابارلادى. سوت ماتەريالدارىنا سايكەس، ەر ادام 2025 جىلدىڭ اقپان-شىلدە ايلارى ارالىعىندا ازاماتتاردى شەتەلدەگى قارۋلى قاقتىعىسقا قاتىسۋعا تارتۋمەن اينالىسقان.
تەرگەۋ مالىمەتىنشە، ول رەسەيگە بىرنەشە رەت بارىپ، سول ەلدەگى قارۋلى قۇرىلىم وكىلدەرىمەن بايلانىس ورناتقان. قازاقستانعا ورالعاننان كەيىن مايدانعا جىبەرۋ ءۇشىن الەۋەتتى كانديداتتاردى ىزدەگەن. ولاردىڭ اراسىندا الەۋمەتتىك جاعدايى تومەن ازاماتتار دا بولعان. ايىپتالۋشى ۇمىتكەرلەرگە اسكەري قيمىلدارعا قاتىسقانى ءۇشىن قارجىلاي سىياقى ۋادە ەتكەن. اتاپ ايتقاندا، ولارعا بىرجولعى 2,5-3 ميلليون رۋبل كولەمىندە تولەم، اي سايىن شامامەن 200 مىڭ رۋبل جالاقى جانە رەسەي ازاماتتىعىن جەدەل راسىمدەۋگە كومەكتەسۋ ۇسىنىلعان. سوت وتىرىسىندا ەر ادام تاعىلعان ايىپتى مويىنداماعان. ول ازاماتتاردى اسكەري قيمىلدارعا قاتىسۋعا ۇگىتتەمەگەنىن ايتتى.
الايدا سوتتا كۋالار مەن جابىرلەنۋشىلەردىڭ جاۋاپتارى، سونداي-اق سوتتالۋشىنىڭ ۇيالى تەلەفونىنان الىنعان مالىمەتتەر زەرتتەلدى. تەلەفونداعى حات-حابارلارعا جۇرگىزىلگەن ساراپتاما ازاماتتاردى تارتۋ ارەكەتىنىڭ بولعانىن راستاعان.
سوت ەر ادامنىڭ ارەكەتىن قازاقستان رەسپۋبليكاسى قىلمىستىق كودەكسىنىڭ 24-بابىنىڭ 3-بولىگى جانە 170-بابىنىڭ 1-بولىگى بويىنشا سارالادى. ياعني ول قارۋلى قاقتىعىسقا قاتىسۋ ءۇشىن ادامداردى تارتۋعا وقتالۋ جانە ۆەربوۆكا جاساۋ بويىنشا كىنالى دەپ تانىلدى. جازا تاعايىنداۋ كەزىندە سوت سوتتالۋشىنىڭ كامەلەتكە تولماعان بالاسى بار ەكەنىن ەسكەردى. ال بۇرىن قىلمىس جاساعانى جازانى اۋىرلاتاتىن ءمان-جاي رەتىندە تانىلدى. سوت جەڭىلىرەك جازانى نەعۇرلىم قاتاڭ جازامەن ءسىڭىرۋ قاعيداتىن قولدانىپ، ەر ادامعا سەگىز جىل باس بوستاندىعىنان ايىرۋ جازاسىن تاعايىندادى. ول جازاسىن قىلمىستىق-اتقارۋ جۇيەسىنىڭ ورتاشا قاۋىپسىزدىك مەكەمەسىندە وتەيدى.
ۇكىم ازىرگە زاڭدى كۇشىنە ەنگەن جوق جانە وعان شاعىم جاسالۋى مۇمكىن.
