"نەعۇرلىم قاتاڭ جازا". پروكۋرور گۇلميرا ساتىبالدىنى سەگىز جىلعا باس بوستاندىعىنان ايىرۋدى سۇرادى

1974
Adyrna.kz Telegram

استانادا گۇلميرا ساتىبالدىنىڭ ءىسى بويىنشا كەزەكتى سوت وتىرىسى ءوتتى. ءىستى قاراۋ بارىسىندا پروكۋرور ايىپتالۋشىنى سەگىز جىلعا باس بوستاندىعىنان ايىرۋدى سۇراپ، نەعۇرلىم قاتاڭ جاڭا تاعايىنداۋدى العا تارتتى، دەپ حابارلايدى "ادىرنا" ۇلتتىق پورتالى.

پروكۋرور ازامات سارسەمباەۆ قىلمىستىق كودەكستىڭ بىرنەشە بابىن تىزبەكتەپ، گۇلميرا ساتىبالدىنى نەعۇرلىم قاتاڭ جازا نەگىزىندە باس بوستاندىعىنان ايىرۋدى سۇرادى.

- گۇلميرا ساتىبالدىنى قىلمىستىق كودەكستىڭ 389-بابى 4-بولىگى، 28-بابى 3-بولىگى جانە 125-بابى 2-بولىگى 1,8-تارماعىندا قارالعان قىلمىستىق قۇقىق بۇزۋشىلىق جاساعانى ءۇشىن كىنالى دەپ تانۋدى سۇرايمىن. قىلمىستىق كودەكستىڭ 389-بابى 4-بولىگى بويىنشا – التى جىلعا باس بوستاندىعىنان ايىرۋ، 28-باپتىڭ 3-بولىگى جانە 125-باپتىڭ 2-بولىگى 1,8-تارماعى بويىنشا – مۇلكىنەن ايىرۋسىز سەگىز جىلعا باس بوستاندىعىنان ايىرۋ تاعايىندالسىن. قىلمىستىق كودەكستىڭ 58-بابى 3-بولىگىنىڭ نەگىزىندە نەعۇرلىم قاتاڭ جازا، ياعني ساتىبالدىنىڭ مۇلكىن تاركىلەۋسىز سەگىز جىلعا باس بوستاندىعىنان ايىرۋ تاعايىندالسىن، — دەدى پروكۋرور ازامات سارسەمباەۆ.

سونىمەن قاتار پروكۋرور گۇلميرا ساتىبالدى جازاسىن قاۋىپسىزدىگى ورتاشا دەڭگەيدەگى اباقتىدا وتەۋىن سۇرادى.

ەسكە سالا كەتەيىك، ەكس-پرەزيدەنت نۇرسۇلتان نازارباەۆتىڭ نەمەرە ءىنىسى قايرات ساتىبالدىنىڭ بۇرىنعى ايەلى گۇلميرا ساتىبالدى ۋنيۆەرسيادا-2017 نىساندارىن جوندەۋگە باعىتتالعان قارجىنى يەلەنىپ، بيزنەستى باسىپ الۋ جانە زاڭسىز باس بوستاندىعىنان ايىرۋدىڭ باسقا ەپيزودتارى بويىنشا تەرگەۋگە الىنعان ەدى. جابىرلەنۋشىلەرگە كەلتىرىلگەن زالالدىڭ الدىن الا سوماسى 6,6 ميلليارد تەڭگەدەن اسادى.

قايرات ساتىبالدى 13 ناۋرىز كۇنى، ونىڭ بۇرىنعى ايەلى 17 ناۋرىزدا قاماۋعا الىندى.

21 ءساۋىر كۇنگى سۇراق-جاۋاپ ساتىسىندا ساتىبالدى تاعىلعان ايىپتىڭ بىرقاتارىن مويىندادى. دەگەنمەن سوت قازىسىنىڭ قىزمەتىنە قارسىلىق تانىتتى. گۇلميرا ساتىبالدىنىڭ جاقتاستارى سوت قازىسى كەمەڭگەر يماشەۆتىڭ قۇقىقتىق ءۇردىستى جۇزەگە اسىرۋ مەن بەيتارىپتىق تانىتۋعا جاعداي جاسامادى دەپ ايىپتايدى.

"ادىرنا" ۇلتتىق پورتالى 

پىكىرلەر