Batys Qazaqstan oblysynda Oral qalasynyŋ tūrǧyny Ukrainadaǧy qaruly qaqtyǧysqa qatysu üşın azamattardy tartqany üşın segız jylǧa bas bostandyǧynan aiyryldy, dep habarlaidy "Adyrna".
Būl turaly BQO sotynyŋ baspasöz qyzmetı habarlady. Sot materialdaryna säikes, er adam 2025 jyldyŋ aqpan-şılde ailary aralyǧynda azamattardy şeteldegı qaruly qaqtyǧysqa qatysuǧa tartumen ainalysqan.
Tergeu mälımetınşe, ol Reseige bırneşe ret baryp, sol eldegı qaruly qūrylym ökılderımen bailanys ornatqan. Qazaqstanǧa oralǧannan keiın maidanǧa jıberu üşın äleuettı kandidattardy ızdegen. Olardyŋ arasynda äleumettık jaǧdaiy tömen azamattar da bolǧan. Aiyptaluşy ümıtkerlerge äskeri qimyldarǧa qatysqany üşın qarjylai syiaqy uäde etken. Atap aitqanda, olarǧa bırjolǧy 2,5-3 million rubl kölemınde tölem, ai saiyn şamamen 200 myŋ rubl jalaqy jäne Resei azamattyǧyn jedel räsımdeuge kömektesu ūsynylǧan. Sot otyrysynda er adam taǧylǧan aiypty moiyndamaǧan. Ol azamattardy äskeri qimyldarǧa qatysuǧa ügıttemegenın aitty.
Alaida sotta kuälar men jäbırlenuşılerdıŋ jauaptary, sondai-aq sottaluşynyŋ ūialy telefonynan alynǧan mälımetter zertteldı. Telefondaǧy hat-habarlarǧa jürgızılgen saraptama azamattardy tartu äreketınıŋ bolǧanyn rastaǧan.
Sot er adamnyŋ äreketın Qazaqstan Respublikasy Qylmystyq kodeksınıŋ 24-babynyŋ 3-bölıgı jäne 170-babynyŋ 1-bölıgı boiynşa saralady. Iаǧni ol qaruly qaqtyǧysqa qatysu üşın adamdardy tartuǧa oqtalu jäne verbovka jasau boiynşa kınälı dep tanyldy. Jaza taǧaiyndau kezınde sot sottaluşynyŋ kämeletke tolmaǧan balasy bar ekenın eskerdı. Al būryn qylmys jasaǧany jazany auyrlatatyn män-jai retınde tanyldy. Sot jeŋılırek jazany neǧūrlym qataŋ jazamen sıŋıru qaǧidatyn qoldanyp, er adamǧa segız jyl bas bostandyǧynan aiyru jazasyn taǧaiyndady. Ol jazasyn qylmystyq-atqaru jüiesınıŋ ortaşa qauıpsızdık mekemesınde öteidı.
Ükım äzırge zaŋdy küşıne engen joq jäne oǧan şaǧym jasaluy mümkın.
