دونالد ترامپ بەيسەنبى كۇنى اقش پرەزيدەنتى رەتىندە جاساعان مالىمدەمەسىندە رەسەي پرەزيدەنتى ۆلاديمير ءپۋتيننىڭ كيەۆكە ءبىر اپتا بويى سوققى جاساماۋعا كەلىسكەنىن ايتتى. ال تاڭەرتەڭ كيەۆ قالاسى مەن وبلىسىنداعى نىساندارعا، سونداي-اق ۋكرايناداعى ينفراقۇرىلىم وبەكتىلەرىنە سوققى جاساماۋ تۋرالى موراتوري جونىندە بلوگەرلەر جازعان. كرەمل بۇل اقپاراتتى ازىرگە راستاي المايتىنىن مالىمدەدى. بۇل تۋرالى ۆۆس جازدىع دەپ حابارلايدى "ادىرنا".
«قاتتى سۋىققا بايلانىستى – ولاردا دا، بىزدە دە جاعداي ۇقساس. مەن پرەزيدەنت پۋتيننەن ەرەكشە سۋىق كەزدە ءبىر اپتا بويى كيەۆ پەن باسقا قالالارعا وت اتقىلاماۋدى جەكە ءوزىم ءوتىندىم»، - دەدى ترامپ اق ۇيدە اكىمشىلىك مۇشەلەرىمەن كەزدەسۋدە.
«ول بۇعان كەلىستى. بۇل وتە جاقسى قادام بولدى دەپ ايتا الامىن»، - دەپ قوستى اقش پرەزيدەنتى.
ماسكەۋ بۇل مالىمدەمەلەرگە ازىرگە رەسمي پىكىر بىلدىرگەن جوق.
تاڭەرتەڭ ىقتيمال موراتوري تۋرالى اقپارات بلوگەرلەر مەن تەلەگرام-ارنالاردا تارادى. بۇل جونىندە رەسەيلىك تە، ۋكراينالىق تا ارنالار جازعان. العاشقىلاردىڭ ءبىرى بولىپ رەسەيلىك بلوگەر ۆلاديمير رومانوۆ جازىپ, وزىنە كەلگەن حابارلامانىڭ سكرينشوتىن جاريالاعان.
ونىڭ ايتۋىنشا، بەيسەنبى كۇنى تاڭعى ساعات 7:00-دەن باستاپ كيەۆ پەن كيەۆ وبلىسىنداعى كەز كەلگەن نىسانعا، سونداي-اق ۋكراينا اۋماعىنداعى ينفراقۇرىلىم وبەكتىلەرىنە سوققى جاساۋعا «تىيىم سالىنعانى» تۋرالى اقپارات تۇسكەن.
كەيىن ول تاعى ءبىر حابارلامانى كەلتىردى. وندا رەسەيلىك اسكەريلەرگە كيەۆ پەن ونىڭ وبلىسىنداعى نىساندارعا سوققى بەرمەۋ، ال بۇكىل ۋكراينا اۋماعىندا ەنەرگەتيكالىق ينفراقۇرىلىمعا (ەلەكتر قوسالقى ستانتسيالارى، جەو، گەس، گاز قويمالارى، مۇناي بازالارى جانە جانارماي ساقتاۋ ورىندارى) 28 قاڭتاردان باستاپ «ارنايى بۇيرىققا دەيىن» سوققى جاساماۋ تۋرالى پارمەن بەرىلگەنى ايتىلعان.
بلوگەردىڭ جازۋىنشا، بەيرەسمي ىشكى اقپاراتتا بۇل شەكتەۋ شامامەن 3 اقپانعا دەيىن سوزىلۋى مۇمكىن ەكەنى دە ايتىلعان.
