قوستاناي وبلىسىندا 20 مامىر كۇنى تاڭەرتەڭ قايعىلى جول اپاتى تىركەلدى. «قايراق» شەكارا بەكەتىنەن ەكى شاقىرىم جەردە Ford Transit كولىگى مەن DAF جۇك كولىگى سوقتىعىستى. بۇل تۋرالى قوستاناي وبلىسىنىڭ پوليتسيا دەپارتامەنتى مالىمدەدى، دەپ حابارلايدى “ادىرنا”.
جەڭىل كولىكتىڭ ىشىندە بولعان 10 ادامنىڭ التاۋى وقيعا ورنىندا كوز جۇمدى. تاعى بەس ادام ءارتۇرلى جاراقاتتارمەن قارابالىق اۋداندىق اۋرۋحاناسىنا جەتكىزىلدى. زارداپ شەككەندەردىڭ بارلىعى شەتەل ازاماتتارى ەكەنى حابارلاندى.
«اتالعان دەرەك بويىنشا پوليتسيا قر قىلمىستىق كودەكسىنىڭ 345-بابى 4-بولىگى – «كولىك قۇرالدارىن جۇرگىزۋ ەرەجەلەرىن بۇزۋ، ابايسىزدا ەكى نەمەسە ودان دا كوپ ادامنىڭ ولىمىنە اكەپ سوققان» بابى بويىنشا سوتقا دەيىنگى تەرگەپ-تەكسەرۋ باستالعانىن مالىمدەدى»، - دەلىنگەن قوستاناي وبلىسىنىڭ پوليتسيا دەپارتامەنتى حابارلاماسىندا.
وقيعا ورنىندا جەدەل-تەرگەۋ توبى جۇمىس ىستەۋدە. قاجەتتى ساراپتامالار مەن تەرگەۋ ارەكەتتەرى جۇرگىزىلۋدە. اپاتتىڭ ناقتى سەبەبى الداعى تەرگەۋ ناتيجەسىندە انىقتالادى.
پوليتسيا قىزمەتكەرلەرى جول اپاتىنىڭ الدىن الۋ ءۇشىن جۇرگىزۋشىلەرگە مىناداي ەرەجەلەردى ەستە ساقتاۋدى ەسكەرتەدى:
- جىلدامدىقتى اسىرماڭىز;
- جولدا اباي بولىڭىز;
- مانەۆر جاساعاندا قاۋىپسىزدىككە كوز جەتكىزىڭىز;
- ۇزاق جولعا شىققاندا كولىك جاعدايىن تەكسەرىپ وتىرىڭىز.
