Torǧai törındegı Arqalyq qalasy biyl 70 jyldyq mereitoiyn atap ötude. Būl beles öŋırdıŋ äleumettık-ekonomikalyq damuyna jaŋa serpın berıp, soŋǧy jyldary qolǧa alynǧan auqymdy jobalardy saralauǧa da mümkındık berıp otyr. Memleket basşysy Qasym-Jomart Toqaev öz Joldauynda Ükımettıŋ erekşe nazaryn Torǧai öŋırınıŋ äleumettık-ekonomikalyq damuyna audaru qajettıgın atap ötken edı. Bügınde osy tapsyrma aiasynda infraqūrylymdy jaŋǧyrtu, kölık-logistikalyq mümkındıkterdı keŋeitu, investisiia tartu baǧytyndaǧy jūmystar jüielı türde jalǧasyp keledı.
Memleket basşysynyŋ tapsyrmalary aiasynda Torǧai öŋırınıŋ äleumettık-ekonomikalyq äleuetın arttyruǧa baǧyttalǧan jūmystar kezeŋ-kezeŋımen jüzege asyrylyp keledı. Bügınde negızgı basymdyqtardyŋ qatarynda kölık bailanysyn küşeitu, injenerlık jelılerdı jaŋartu, investisiia tartu jäne tūrǧyndarǧa qolaily orta qalyptastyru bar. Būl baǧyttaǧy özgerıster Arqalyqtyŋ ǧana emes, tūtas öŋırdıŋ bolaşaǧyna äser etetın jobalarmen sabaqtasyp jatyr.
Sonyŋ bır aiǧaǧy — jaŋa äuejai qūrylysynyŋ aiaqtaluy. Saǧatyna 70 jolauşyǧa deiın qabyldaityn nysan Torǧaidyŋ kölık qoljetımdılıgın arttyryp, 80 myŋnan astam tūrǧyn üşın jaŋa mümkındık aşady. Joba aiasynda 136 jaŋa jūmys orny qūrylady.
Öŋırdıŋ kölık kartasy mūnymen şektelmeidı. «Jezqazǧan – Arqalyq – Petropavl» avtojolyn rekonstruksiialau jalǧasyp jatsa, «Ortalyq – Batys» strategiialyq magistralı eldıŋ ortalyǧy men batysyn bailanystyratyn maŋyzdy baǧyttardyŋ bırıne ainalmaq. Joldyŋ jaqsaruy — tek qatynastyŋ jeŋıldeuı emes, jaŋa öndırıster men käsıpkerlık bastamalarǧa, tauar ainalymy men investisiiaǧa jol aşatyn mümkındık.
Temırjol infraqūrylymy da jaŋǧyrtyldy. Kürdelı jöndeuden ötken vokzal qaita paidalanuǧa berılıp, jaŋa vagondardan jasaqtalǧan «Nūrly jol — Arqalyq» poiyzy qatynai bastady. Mūndai jobalar şalǧai jatqan aumaqtardyŋ eldıŋ özge öŋırlerımen bailanysyn küşeitıp, ekonomikalyq belsendılıktıŋ artuyna yqpal etedı.
İnfraqūrylymdyq jaŋǧyru injenerlık jüielerdı de qamtyp otyr. 2023 jyldan berı 17,3 şaqyrym jylu jelısı jaŋartylyp, olardyŋ tozu deŋgeiı 90 paiyzdan 50 paiyzǧa deiın tömendegen. Jylu şyǧyny 32 paiyzdan 22,1 paiyzǧa azaidy. Al jylu elektr ortalyǧyn qatty otynǧa köşıru otyn şyǧynyn ekı esege qysqartyp, jyl saiyn şamamen 2 mlrd teŋge ünemdeuge mümkındık berdı.
Äleumettık infraqūrylymnyŋ jaiy da nazardan tys qalǧan joq. Soŋǧy jyldary 22,2 myŋ şarşy metr tūrǧyn üi salynyp, 63 aula abattandyryldy, 51 balalar jäne sport alaŋy ornatyldy. 50-den astam köşe jöndelıp, syrtqy jaryqtandyru jüiesı jaŋǧyrtyldy. Auyldyq eldı mekenderdı sapaly internetpen qamtu jūmystary da jalǧasyp keledı.
Al öŋırdıŋ ekonomikalyq tynysyn keŋeitetın negızgı tetıktıŋ bırı — investisiia. Soŋǧy jyldary Torǧai öŋırıne 110 mlrd teŋgeden astam investisiia tartylyp, onyŋ şamamen 70 paiyzy jeke investisiialarǧa tiesılı bolǧan.
Qazır agroönerkäsıp keşenınde bırneşe ırı joba qolǧa alynǧan. Qūs fabrikasyn jaŋǧyrtu, jaŋa qūs qoralary men jem zauytyn salu, 10 myŋ basqa arnalǧan qoi keşenı men 6 myŋ basqa arnalǧan bordaqylau alaŋyn ıske qosu josparlanyp otyr. Būl jobalar öndırıs kölemın ūlǧaitumen qatar, jaŋa jūmys oryndaryn aşyp, öŋır ekonomikasyn ärtaraptandyruǧa mümkındık beredı.
Qostanai oblysynyŋ äkımı Qūmar Aqsaqalov öŋırge investisiia tartu jūmystary jüielı türde jalǧasyp jatqanyn atap öttı.
— Memleket basşysynyŋ tapsyrmasyna säikes, Arqalyqqa investisiia tartuǧa qajettı jaǧdailardy bırtındep qalyptastyryp kelemız. Soŋǧy jyldary ekonomikaǧa 110 mlrd teŋgeden astam investisiia tartyldy, onyŋ 70 paiyzyna juyǧy — jeke investisiialar. Bügınde agroönerkäsıp keşenınde jaŋa jūmys oryndaryn aşyp, Torǧai öŋırınıŋ ekonomikasyna qosymşa serpın beretın ırı jobalar jüzege asyrylyp jatyr, — dedı oblys äkımı.
Torǧaidaǧy būl jūmystar Qostanai oblysynyŋ jalpy damu baǧytymen ündes. Öŋırde öndırıstı jaŋǧyrtu, auyl şaruaşylyǧynyŋ äleuetın arttyru, investisiia tartu, kölık jäne injenerlık infraqūrylymdy küşeitu baǧyttary qatar jürıp keledı. Ükımet bekıtken 2026–2028 jyldarǧa arnalǧan Torǧai öŋırınıŋ äleumettık-ekonomikalyq damu jospary da osy mındetterdı bır arnaǧa toǧystyrǧan.
Al osy auqymdy jūmystardyŋ aiasynda Arqalyq özınıŋ 70 jyldyǧyn atap ötude. Mereitoilyq baǧdarlamada XXXIX jazǧy oblystyq spartakiada bastalyp, sporttyŋ bırneşe türınen jarystar öttı. Memleket qairatkerı, tarihşy-etnograf Özbekälı Jänıbekovtıŋ 95 jyldyǧyna arnalǧan eske alu keşı ūiymdastyrylyp, «Şerter» ansamblı öner körsettı. «Arqalyqtyŋ araily taŋy» spektaklı de körermenge jol tartty.
Osylaişa, jetı onjyldyq tarihy bar Arqalyqtyŋ mereitoiy ötkendı ūlyqtaǧan şaralarmen ǧana emes, öŋırdıŋ bügıngı özgerısterımen de sabaqtasyp otyr. Torǧai törındegı jaŋa nysandar men investisiialyq jobalar şalǧai öŋırdıŋ äleuetın aşuǧa baǧyttalǧan jūmystyŋ naqty körınısıne ainalsa, būl üderıs Qostanai oblysynyŋ ekonomikalyq mümkındıkterın keŋeite tüsude.
