اقش پرەزيدەنتى دونالد ترامپ بىرقاتار باق-تا جاريالانعان ەلدەگى قارۋ-جاراق قورىنىڭ سارقىلۋى تۋرالى اقپاراتتى جوققا شىعاردى، دەپ حابارلايدى «ادىرنا» ءتىلشىسى Report اگەنتتىگىنە سىلتەمە جاساپ.
Truth Social جەلىسىندە جاريالاعان مالىمدەمەسىندە امەريكالىق كوشباسشى اقش-تىڭ وق-ءدارى قورى جەتكىلىكتى ەكەنىن جانە ءوندىرىس كولەمى ۇزدىكسىز ارتىپ جاتقانىن ايتتى. ونىڭ سوزىنشە، قورعانىس كومپانيالارى ەلدە رەكوردتىق كولەمدە زاۋىتتار مەن وندىرىستىك كاسىپورىندار سالىپ جاتىر. سونىمەن قاتار وق-دارىلەر قاجەتتىلىككە قاراي تۇراقتى تۇردە جەتكىزىلۋدە.
«اقش-تا وق-ءدارىنىڭ، اسىرەسە كەيبىر تۇرلەرىنىڭ قورى وتە مول. بۇعان قوسا، قاجەت بولعان جاعدايدا ەلدە ۇلكەن كولەمدە وق-ءدارى ءوندىرىلىپ، جەتكىزىلىپ جاتىر. قورعانىس كومپانيالارى ءبىزدىڭ ەلدە تاريحتاعى ەڭ كوپ زاۋىتتار مەن وندىرىستىك نىسانداردى سالىپ جاتىر»، – دەدى ترامپ.
سونداي-اق ول قارۋ-جاراق تاپشىلىعى تۋرالى اقپارات تاراتقانداردى انىقتاۋ جۇمىستارى جۇرگىزىلىپ جاتقانىن مالىمدەدى.
«وسى مالىمدەمەلەردى تاراتقان ادامدار انىقتالىپ جاتىر. ءبىز ولاردىڭ ۇزاق مەرزىمگە باس بوستاندىعىنان ايىرىلۋىنا قول جەتكىزۋگە تىرىسامىز»، – دەپ اتاپ ءوتتى اقش پرەزيدەنتى.
بۇعان دەيىن The Washington Post گازەتى دەرەككوزدەرگە سىلتەمە جاساپ، ترامپتىڭ پەنتاگون باسشىسى پيت حەگسەتتەن الىس قاشىقتىققا ۇشاتىن زىمىراندار مەن زىمىرانعا قارسى قورعانىس جۇيەلەرىنە ارنالعان توسقاۋىلداۋشى زىمىرانداردىڭ تاپشىلىعى تۋرالى اقپاراتقا تۇسىنىكتەمە بەرۋدى تالاپ ەتكەنىن جازعان بولاتىن.
باسىلىم مالىمەتىنشە، وق-ءدارى تاپشىلىعى ۆاشينگتوننىڭ يرانعا اۋقىمدى سوققى جاساۋ مۇمكىندىگىن شەكتەپ، جاڭا شابۋىلداردىڭ توقتاتىلۋىنا اسەر ەتكەن فاكتورلاردىڭ ءبىرى بولعان. الايدا اق ءۇي مەن پەنتاگون بۇل اقپاراتتى تەرىسكە شىعاردى.
