اقش پرەزيدەنتى دونالد ترامپ وق-ءدارى قورىنىڭ تاپشىلىعىنا بايلانىستى قورعانىس ءمينيسترى پيت حەگسەتتەن تۇسىنىكتەمە بەرۋدى تالاپ ەتتى. بۇل تۋرالى Washington Post گازەتى جازدى، دەپ حابارلايدى «ادىرنا» ءتىلشىسى.
باسىلىمنىڭ مالىمەتىنشە، وتكەن اپتادا كەمپ-دەۆيدتە وتكەن كەزدەسۋدە ترامپ يرانمەن سوعىس بارىسىنا قاتىستى نارازىلىعىن ءبىلدىرىپ، پەنتاگون باسشىسىنان اقش-تىڭ وق-ءدارى قورىنىڭ ەلەۋلى تاپشىلىعى جونىندە نەگە تولىق ءارى ناقتى اقپارات بەرىلمەگەنىن ءتۇسىندىرۋدى سۇراعان.
گازەتتىڭ جازۋىنشا، ترامپ وق-ءدارى تاپشىلىعى ماسەلەسى بۇرىننان شەشىلگەن دەپ ەسەپتەگەن. الايدا كەيىن ول الىس قاشىقتىققا ۇشاتىن باسقارىلاتىن زىمىراندار مەن اۋە شابۋىلىنا قارسى قورعانىس قۇرالدارىنىڭ جەتىسپەۋشىلىگى تۋرالى مالىمەت العان. دەرەككوزدەردىڭ ايتۋىنشا، ءدال وسى قارۋ-جاراق تاپشىلىعى سوڭعى كۇندەرى پرەزيدەنتتىڭ يرانعا قارسى جاڭا اۋقىمدى سوققىلار جاساۋدان باس تارتۋىنا سەبەپتەردىڭ ءبىرى بولعان.
كەمپ-دەۆيدتەگى كەزدەسۋدە حەگسەت ترامپتىڭ سىن-ەسكەرتپەلەرىن قابىلداماي، جاۋاپكەرشىلىكتى ءوزىنىڭ ورىنباسارى ستيۆەن فاينبەرگكە جۇكتەگەن. ونىڭ سوزىنشە، فاينبەرگ پرەزيدەنتكە قارۋ-جاراق قورىنىڭ ناقتى جاعدايى تۋرالى تولىق اقپارات بەرمەگەن.
اق ءۇيدىڭ ءباسپاسوز حاتشىسى كارولين لەۆيتت بۇل اقپاراتقا X الەۋمەتتىك جەلىسىندە پىكىر ءبىلدىرىپ، كەمپ-دەۆيدتەگى كەزدەسۋدە مۇنداي جاعداي بولماعانىن ايتتى. ونىڭ سوزىنشە، ترامپ حەگسەتتى ءوز مىندەتىن وتە جوعارى دەڭگەيدە اتقارىپ جاتىر دەپ ەسەپتەيدى.
وتكەن اپتانىڭ سوڭىندا پەنتاگون يرانمەن سوعىسقا بايلانىستى شىعىنداردى جابۋ جانە قارۋ-جاراق قورىن قالپىنا كەلتىرۋ ءۇشىن كونگرەسستەن قوسىمشا 67 ميلليارد دوللار ءبولۋدى سۇراعان ەدى. CNN مەن ستراتەگيالىق جانە حالىقارالىق زەرتتەۋلەر ورتالىعىنىڭ (CSIS) دەرەكتەرىنە سايكەس، كەيبىر قارۋ تۇرلەرىنىڭ قورى اسا تومەن دەڭگەيگە دەيىن ازايعان.
بۇعان دەيىن اقش-تىڭ نەگىزگى زىمىران قورى ازايعانى ايتىلعان ەدى.
