اقش پرەزيدەنتى دونالد ترامپ رەسەيگە قارسى جاڭا سانكتسيالار ەنگىزگىسى كەلمەيتىنىن مالىمدەدى. ونىڭ ايتۋىنشا، مۇنداي قادام ۋكرايناداعى سوعىستى توقتاتۋ جونىندەگى كەلىسسوزدەرگە كەدەرگى كەلتىرۋى مۇمكىن. وسىلايشا ول ۋكراينا پرەزيدەنتى ۆلاديمير زەلەنسكيدىڭ سىنىنا جاۋاپ بەردى، دەپ حابارلايدى «ادىرنا» ءتىلشىسى BBC-گە سىلتەمە جاساپ.
بۇعان دەيىن زەلەنسكي ۆاشينگتوننىڭ رەسەيدىڭ ديزەل وتىنىنا قاتىستى سانكتسيالاردى جەڭىلدەتۋ جانە جاڭا شەكتەۋ شارالارىن قابىلداۋدى كەيىنگە قالدىرۋ تۋرالى شەشىمىن قاتە دەپ اتاعان بولاتىن.
9 قازاندا ترامپ ۆلاديمير پۋتينمەن اقش-قا رەسەيدىڭ ديزەل وتىنىن جەتكىزۋ تۋرالى كەلىسىمگە كەلگەنىن مالىمدەدى. ال 17 قازاندا مارقۇم سەناتور ليندسي گرەم ۇسىنعان زاڭ جوباسىندا كوزدەلگەن رەسەيگە قارسى قاتاڭ سانكتسيالاردى ەنگىزۋدى كەيىنگە قالدىردى.
اقش پرەزيدەنتى قىركۇيەك ايىنىڭ سوڭىندا قول قويعان زاڭ وعان 18 قازانعا دەيىن شەكتەۋ شارالارىن ەنگىزۋدى مىندەتتەگەن. الايدا قۇجاتتا بۇل ۇدەرىستى اقش-تىڭ ۇلتتىق مۇددەلەرىنە ساي كەلگەن جاعدايدا ۋاقىتشا توقتاتا تۇرۋعا دا رۇقسات بەرىلگەن. ترامپ وسى قۇقىقتى پايدالانعان.
جەكسەنبى كۇنى NBC تەلەارناسىنا بەرگەن سۇحباتىندا ۆلاديمير زەلەنسكي ترامپ ءوز شەشىمدەرىن قايتا قارايدى دەپ ۇمىتتەنەتىنىن ايتقان.
«مەنىڭ ويىمشا، مۇنىڭ ءبارى — بىزگە دە، اقش-تىڭ وزىنە دە پايدا اكەلمەيتىن قاتە شەشىمدەر»، — دەدى ۋكراينا پرەزيدەنتى.
«ەگەر اقش رەسمي تۇردە رەسەيدىڭ جاعىنا شىقسا، ياعني بۇل ەكى ەل بىرلەسىپ ارەكەت ەتسە، ارينە، ءبىز جەڭىسكە جەتە المايمىز جانە قارسى تۇرا المايمىز»، — دەپ قوستى زەلەنسكي.
ترامپ وزىنە ايتىلعان سىنعا Truth Social الەۋمەتتىك جەلىسىندەگى كولەمدى جازباسىمەن جاۋاپ بەردى.
«رەسەيگە قاتىستى شەشىمىم وتە قاراپايىم. قازىر مەن رەسەي مەن ۋكراينا اراسىنداعى قاقتىعىستى بەيبىت جولمەن رەتتەۋ جونىندە كەلىسسوزدەر جۇرگىزىپ جاتىرمىن. سوندىقتان رەسەيدىڭ كەلىسسوزدەر ۇستەلىنەن كەتۋىنە سەبەپ بولۋى مۇمكىن قانداي دا ءبىر ويلانباي جاسالعان ارەكەتكە بارعىم كەلمەيدى»، — دەپ جازدى اقش پرەزيدەنتى.
ترامپتىڭ ايتۋىنشا، كەلىسسوزدەردە، سونىڭ ىشىندە «كەپىلگە الىنعان ادامداردى بوساتۋ» ماسەلەسى بويىنشا دا ايتارلىقتاي ىلگەرىلەۋشىلىك بار.
سونىمەن قاتار ول رەسەيدىڭ يرانعا كومەك كورسەتۋگە قاتىستى ءىس جۇزىندە ەشتەڭە ىستەمەيتىنىن نەمەسە وتە از كومەك كورسەتەتىنىن مالىمدەدى.
