بەيسەنبى كۇنى وتكەن بريفينگتە پەنتاگوننىڭ ءباسپاسوز حاتشىسىنىڭ ورىنباسارى سابرينا سينگح رەسەيدىڭ 21 قاراشادا ۋكراينا اۋماعىنا ورتا قاشىقتىقتاعى بالليستيكالىق زىمىراندى (وقبز) سىناقتان وتكىزگەنىن راستادى، دەپ حابارلايدى “ادىرنا” ۇلتتىق پورتالى.
“گولوس امەريكي” اگەنتتىگى جاريالاعانداي. سينگحتىڭ ايتۋىنشا، بۇل زىمىران رەسەيدىڭ قۇرلىقارالىق بالليستيكالىق رس-26 «رۋبەج» مودەلىنىڭ نەگىزىندە جاسالعان.
«زىمىران ۇشىرىلماس بۇرىن قىسقا ۋاقىت ىشىندە يادرولىق قاۋىپ-قاتەردى تومەندەتۋ ارنالارى ارقىلى الدىن الا حابارلاما الدىق»، – دەدى اقش قورعانىس مينيسترلىگىنىڭ وكىلى.
«بۇل ولىمگە اكەلەتىن جاڭا تۇردەگى قارۋ، ۇرىس الاڭىندا قولدانىلدى، سوندىقتان بۇل، ءسوزسىز، الاڭداۋشىلىق تۋدىرادى»، – دەپ اتاپ ءوتتى سينگح.
ول بۇل ورتا قاشىقتىقتاعى زىمىراننىڭ كادىمگى دە، يادرولىق تا وقتۇمسىقتاردى الىپ جۇرۋگە قابىلەتتى ەكەنىن ايتتى.
بەيسەنبى كۇنى ۆلاديمير پۋتين رەسەيدىڭ جاڭا «ورەشنيك» بالليستيكالىق زىمىرانىن يادروسىز گيپەردىبىستىق جابدىقتاۋدا قولدانا وتىرىپ، دنەپر قالاسىنداعى قورعانىس-ونەركاسىپتىك كەشەن نىسانىنا سوققى جاساعانىن مالىمدەدى. ال ۋكراينا پرەزيدەنتى ۆلاديمير زەلەنسكي باستاپقىدا ماسكەۋ ۋكراين اۋماعىنا قۇرلىقارالىق بالليستيكالىق زىمىرانمەن سوققى جاسادى دەپ مالىمدەگەن بولاتىن.
راكەتا جىلدامدىعى 10 ماحقا دەيىن جەتەدى – بۇل سەكۋندىنا 2,5–3 شاقىرىم، دەپ حابارلايدى «ازاتتىق راديوسىنىڭ» رەسەيلىك باسشىنىڭ مالىمدەمەسىنە سىلتەمە جاساي وتىرىپ. ءپۋتيننىڭ ايتۋىنشا، بۇل زىمىراندى اقش پەن ەۋروپادا جاسالاتىن قازىرگى زامانعى اۋە قورعانىس جۇيەلەرى ۇستاپ تۇرا المايدى.
كرەملدىڭ مالىمدەۋىنشە، بۇل ۇشىرىلىم 19 جانە 21 قاراشادا ۋكراينا قارۋلى كۇشتەرىنىڭ بريانسك جانە كۋرسك وبلىستارىنداعى نىساندارعا سوققى جاساعانىنا جاۋاپ رەتىندە بولعان. بۇل سوققىلاردا ATACMS جانە Storm Shadow (SCALP) سياقتى امەريكالىق جانە ەۋروپالىق وندىرىستەگى زىمىراندار قولدانىلعانى ايتىلادى.
ەسكە سالا كەتەيىك، وسى اپتادا اقش پرەزيدەنتى دجو بايدەن ۋكرايناعا ۆاشينگتوننىڭ ەڭ ۇزاق قاشىقتىققا ۇشاتىن زىمىراندارى – ATACMS قولدانۋعا رۇقسات بەرگەن بولاتىن. ساراپشىلاردىڭ پىكىرىنشە، بۇل امەريكالىق زىمىرانداردى قولدانۋ ۋكرايناعا كۋرسك وبلىسىنداعى شەكارا ماڭىنداعى اۋماقتى قورعاۋعا كومەكتەسۋى مۇمكىن.
