31 شىلدەدە «ىلە-بالقاش» مەملەكەتتىك تابيعي رەزەرۆاتىنىڭ اۋماعىندا ءۇمىت ەسىمدى امۋر جولبارىسى تابيعي ورتاعا جىبەرىلدى، دەپ حابارلايدى "ادىرنا".
ءۇمىت مامىر ايىندا رەسەيدەن قازاقستانعا ءبىر اتالىق جولبارىس جانە ەكى كۇشىگىمەن بىرگە جەتكىزىلگەن.
«بۇگىن ءبىز شىن مانىندە تاريحي وقيعانىڭ كۋاسى بولىپ وتىرمىز. قازاقستان اۋماعىندا جولبارىس جويىلىپ كەتكەنىنە 70 جىلدان استام ۋاقىت وتكەن سوڭ العاش رەت جولبارىس ءوزىنىڭ تاريحي مەكەندەۋ ارەالىنا قايتا جىبەرىلدى. بۇل – مەملەكەتىمىزدىڭ، رەسەيلىك ارىپتەستەرىمىزدىڭ، عالىمدار مەن حالىقارالىق سەرىكتەستەردىڭ كوپ جىلعى بىرلەسكەن ەڭبەگىنىڭ ناتيجەسى. الدا جولبارىستاردى تۇراقتى باقىلاۋ جانە ورنىقتى پوپۋلياتسيا قالىپتاستىرۋ باعىتىندا اۋقىمدى جۇمىس كۇتىپ تۇر. دەگەنمەن بۇگىن وسى ماڭىزدى ءىستىڭ العاشقى ءارى اسا ماڭىزدى قادامى جاسالدى»، – دەدى ەكولوگيا جانە تابيعي رەسۋرستار ءمينيسترى ەرلان نىسانباەۆ.
تابيعاتقا جىبەرىلەر الدىندا ول ۆەتەرينارلىق تەكسەرۋدەن وتكەن. جولبارىسقا GPS-قارعىباۋ تاعىلعان. ەندى ماماندار ونىڭ قوزعالىسىن سپۋتنيك پەن فوتوتۇزاقتاردىڭ كومەگىمەن باقىلاپ وتىرادى.
ال تۇران مەن ۋسسۋري اتتى ەكى كۇشىك 18 ايعا دەيىن زوولوگتاردىڭ باقىلاۋىندا بولادى
