يراندا قاڭتار ايىنداعى نارازىلىقتار كەزىندە جوعارى لاۋازىمدى پوليتسيا قىزمەتكەرى ۇستالدى. بۇل تۋرالى «سۆوبودنىي يران» جازدى، دەپ حابارلايدى «ادىرنا» ءتىلشىسى.
«حوراسان-رازاۆي پروۆينتسياسىنىڭ كيبەرپوليتسيا باسقارماسى (فاتا) باسشىسىنىڭ ورىنباسارى، پولكوۆنيك شاحرزاد زاميري بيىلعى قاڭتارداعى نارازىلىقتار كەزىندە يران يسلام رەسپۋبليكاسىنىڭ قاۋىپسىزدىك كۇشتەرى تاراپىنان قاماۋعا الىندى»،– دەلىنگەن حابارلامادا.
يراندىق ايەل قازىر مەشحەد قالاسىنداعى ۆاكيلاباد تۇرمەسىندە وتىر. ۇستالعاننان كەيىن ول شامامەن ەكى اي بويى جالعىز ادامدىق كامەرادا بولعان. وسى ۋاقىت ارالىعىندا وعان وتباسى مۇشەلەرىمەن كەزدەسۋگە جانە تەلەفون ارقىلى بايلانىسۋعا تىيىم سالىنعان.
مالىمەتتەرگە سايكەس، شاحرزاد زاميري بىرنەشە رەت تەرگەۋگە الىنعان، الايدا ءالى كۇنگە دەيىن ادۆوكات كومەگىنە قول جەتكىزە الماعان. ونىڭ ءىسى ازىرگە سوتقا دەيىنگى تەرگەۋ ساتىسىندا.
سونداي-اق شاحرزاد زاميريگە تيەسىلى مۇلىكتىڭ تاركىلەنگەنى حابارلاندى. وعان قاڭتارداعى نارازىلىقتارعا قاتىسقانى جانە نارازىلىق بىلدىرۋشىلەرگە كومەكتەسكەنى ءۇشىن ايىپ تاعىلىپ وتىر.
