قىتايدىڭ شاندۋن پروۆينتسياسىندا TP200 كوپماقساتتى ازاماتتىق ۇشقىشسىز ۇشۋ اپپاراتىنىڭ العاشقى سىناقتارى ءساتتى ءوتتى. بۇل – ۇشۋ قاشىقتىعى 3 مىڭ شاقىرىمعا دەيىن جەتەتىن، توننا ساناتىنداعى قىتايداعى العاشقى اۋىر درون، دەپ حابارلايدى «ادىرنا» ءتىلشىسى Xinhua اگەنتتىگىنە سىلتەمە جاساپ.
ازىرلەۋشىلەردىڭ مالىمەتىنشە، ەڭ جوعارى كرەيسەرلىك جىلدامدىعى ساعاتىنا 200 شاقىرىم بولاتىن اپپارات تولىق جۇكتەمەمەن 24 ساعاتتان استام ۋاقىت اۋەدە بولا الادى جانە 7 مىڭ مەتر بيىكتىككە كوتەرىلەدى. ۇشۋ اپپاراتىنا كوتەرىلۋ مەن قونۋ ءۇشىن نەبارى 300 مەترلىك جولاق جەتكىلىكتى.
«العاشقى ۇشۋ كەزىندە TP200 قىسقا قاشىقتىقتان ۇشۋ جانە قونۋ مۇمكىندىكتەرىن جوعارى دەڭگەيدە كورسەتتى. اپپاراتتىڭ تۇراقتىلىعى كۇتكەنىمىزدەن دە اسىپ ءتۇستى. بۇل ينجەنەرلىك ەسەپتەۋلەر مەن جۇيەلىك ينتەگراتسيانىڭ دالدىگىن تولىق راستادى»،– دەدى باس كونسترۋكتور فان ليان.
ازىرلەۋشىلەر جاڭا مودەلدىڭ تولىقتاي وتاندىق بولشەكتەردەن قۇراستىرىلعانىن اتاپ ءوتتى. مودۋلدىك قۇرىلىمىنىڭ ارقاسىندا TP200 ءورت ءسوندىرۋ، شالعاي ايماقتارعا جۇك جەتكىزۋ، پاترۋلدەۋ جانە ەكولوگيالىق مونيتورينگ جۇرگىزۋ سياقتى ءتۇرلى مىندەتتەرگە بەيىمدەلە الادى.
"بۇل بىزگە بەيبىتشىلىك اكەلەدى". زەلەنسكي جاڭا "رۋتا" زىمىرانىنىڭ سىناقتارى ءساتتى وتكەنىن مالىمدەدى
