اقش پرەزيدەنتى دونالد ترامپ ەلدىڭ جەراستى يادرولىق سىناقتارىن قايتا باستاۋى مۇمكىن ەكەنىن مالىمدەدى، دەپ حابارلايدى "ادىرنا" ۇلتتىق پورتالى DW اگەنتتىگىنە سىلتەمە جاساپ.
ترامپ ۆاشينگتوننان پالم-بيچكە ۇشىپ بارا جاتقان Air Force One ۇشاعىندا جۋرناليستەردىڭ سۇراعىنا جاۋاپ بەردى.
«بۇل تۋرالى جاقىن ارادا بەلگىلى بولادى، بىراق ءيا، ءبىز ءبىراز سىناقتار جۇرگىزەمىز. باسقا ەلدەر دە مۇنى ىستەپ جاتىر. ەگەر ولار ىستەسە، ءبىز دە جاسايمىز»، — دەدى.
بۇعان دەيىن ول TruthSocial الەۋمەتتىك جەلىسىندە جاريالاعان جازباسىندا پەنتاگونعا 33 جىلدىق ۇزىلىستەن كەيىن يادرولىق قارۋ سىناۋلارىن قايتا باستاۋدى تاپسىرعانىن مالىمدەگەن بولاتىن.
«باسقا ەلدەر ءوز سىناق باعدارلامالارىن جۇرگىزىپ جاتقاندا، مەن قورعانىس مينيسترلىگىنە يادرولىق قارۋىمىزدى تەڭدىك نەگىزىندە سىناقتان وتكىزۋدى تاپسىردىم. بۇل پروتسەسس دەرەۋ باستالادى»، — دەپ جازدى ترامپ.
اق ءۇي باسشىسى سونداي-اق، اقش-تا باسقا ەلدەرگە قاراعاندا يادرولىق قارۋ كوبىرەك ەكەنىن اتاپ ءوتتى.
اقش سوڭعى رەت 1992 جىلى اۋقىمدى يادرولىق سىناق وتكىزگەن. ۆاشينگتون 1996 جىلى يادرولىق سىناقتارعا جاپپاي تىيىم سالۋ تۋرالى شارتقا قول قويعانىمەن، ونى ءالى دە راتيفيكاتسيالاعان جوق. سودان بەرى نەۆادا پوليگونىندا تەك سۋبكريتيكالىق جەراستى سىناقتارى عانا جۇرگىزىلىپ كەلەدى.
ساراپشىلاردىڭ پىكىرىنشە، يادرولىق سىناقتاردىڭ قايتا باستالۋى جاھاندىق قاۋىپسىزدىك جۇيەسىنە ەلەۋلى اسەر ەتۋى مۇمكىن، ال بىرقاتار ەلدەر ۆاشينگتوندى مۇنداي قادامنان باس تارتۋعا شاقىرۋى ىقتيمال.
