قازاقستاندا ءتورتىنشى مۇناي وڭدەۋ زاۋىتىن سالۋ جوباسى پراكتيكالىق كەزەڭگە ءوتتى. قازىر بولاشاق كاسىپورىنعا ارنالعان تەحنيكالىق-ەكونوميكالىق نەگىزدەمە ازىرلەنىپ جاتىر. قۇجات قۇرىلىس جۇرگىزۋگە ەڭ ءتيىمدى ورىندى جانە شيكىزات جەتكىزۋ تىزبەگىن ايقىنداۋى ءتيىس. بۇل تۋرالى ەنەرگەتيكا ءمينيسترى ەرلان اقكەنجەنوۆ ايتتى، دەپ حابارلايدى «ادىرنا» ءتىلشىسى Exclusive.kz-كە سىلتەمە جاساپ.
ءمينيستردىڭ سوزىنشە، جاڭا مۇناي وڭدەۋ كەشەنى جىلىنا 10 ميلليون تونناعا دەيىن مۇناي وڭدەۋگە قاۋقارلى بولادى.
«ساراپشىلارعا قاشاعان مەن تەڭىز كەن ورىندارىنان شيكىزات جەتكىزۋ لوگيستيكاسىنان باستاپ، قۇرىلىسقا ەڭ قولايلى ورىندى انىقتاۋعا دەيىنگى بارلىق نۇسقانى جان-جاقتى ەسەپتەۋ تاپسىرىلدى. زاۋىتتىڭ قاي جەردە ورنالاساتىنى جونىندەگى شەشىم تەك ەكونوميكالىق تيىمدىلىك، لوگيستيكا جانە تەحنولوگيالىق ەسەپتەۋلەر نەگىزىندە قابىلدانادى»، – دەدى مينيستر.
اقكەنجەنوۆتىڭ ايتۋىنشا، جاڭا كاسىپورىننىڭ قۇرىلىسى ىشكى مۇناي ونىمدەرى نارىعىنىڭ ۇزاق مەرزىمدى تۇراقتىلىعىن قامتاماسىز ەتۋگە مۇمكىندىك بەرەدى. بولاشاقتا بۇل مۇناي وڭدەۋ زاۋىتى مۇناي-گاز حيمياسى سالاسىن دامىتاتىن ماڭىزدى ورتالىقتاردىڭ بىرىنە اينالماق.
مينيستر قازاقستاننىڭ گاز سالاسىنداعى ءىرى جوبالاردى دا جالعاستىرىپ جاتقانىن اتاپ ءوتتى. قازىرگى تاڭدا ەلىمىزدە 13 ميلليوننان استام ادام، ياعني حالىقتىڭ 64 پايىزدان استامى تابيعي گازبەن قامتىلعان. 2035 جىلعا قاراي گازداندىرۋ دەڭگەيىن 80 پايىزعا جەتكىزۋ جوسپارلانىپ وتىر. نەگىزگى جوبالاردىڭ ءبىرى – ەلىمىزدىڭ سولتۇستىك وڭىرلەرىن سەنىمدى گازبەن قامتاماسىز ەتۋگە ارنالعان ەسىل – استانا ماگيسترالدىق گاز قۇبىرىنىڭ قۇرىلىسى.
سونىمەن قاتار 2027 جىلى قاشاعان كەن ورنىندا جىلىنا 1 ميلليارد تەكشە مەتر گاز وڭدەيتىن گاز وڭدەۋ زاۋىتىن ىسكە قوسۋ جوسپارلانعان. تاعى ءبىر گاز وڭدەۋ زاۋىتى جاڭاوزەندە سالىنىپ جاتىر. 2030 جىلعا قاراي قاشاعان مەن قاراشىعاناقتاعى جالپى قۋاتى 7,5 ميلليارد تەكشە مەتر بولاتىن جاڭا كەشەندەردى پايدالانۋعا بەرۋ كوزدەلۋدە. بۇل 2032 جىلعا قاراي قازاقستانداعى تاۋارلىق گاز ءوندىرىسىن قازىرگى 27 ميلليارد تەكشە مەتردەن 35 ميلليارد تەكشە مەترگە دەيىن ارتتىرۋعا مۇمكىندىك بەرەدى.
