شىمكەنتتە سالىنىپ جاتقان تۇرعىن ءۇي كەشەندەرىنىڭ بىرىندە قايعىلى جاعداي ورىن الدى. 24 جاستاعى جىگىت اياقتالماعان ليفت شاحتاسىنا قۇلاپ، كوز جۇمعان. وقيعا جۇمىس ۋاقىتىندا بولعانىمەن، قۇرىلىس الاڭىندا جاۋاپتى تۇلعالاردىڭ ەشقايسىسى بولماعان، دەپ حابارلايدى "ادىرنا".
Otyrar ارناسىنىڭ مالىمەتىنشە، مارقۇمنىڭ تۋىستارى قازانى راستاعانىمەن، تۇسىنىكتەمە بەرۋدەن باس تارتتى. قۇرىلىس كومپانياسى دا ازىرگە رەسمي پىكىر بىلدىرمەدى.
شىمكەنت قالاسى بويىنشا ەڭبەك دەپارتامەنتىنىڭ مالىمەتىنشە، پوليتسيادان كەلىپ تۇسكەن اقپاراتقا سايكەس، نىسانعا جاۋاپتى «اينا مەير حاۋس» جشس قۇرىلىس الاڭىندا ءۇمىتجان بالتاباەۆ بەلگىسىز جاعدايدا قۇلاپ، مەرت بولعان. جۇمىس بەرۋشىدەن رەسمي حابارلاما تۇسپەگەندىكتەن، ەڭبەك ينسپەكتسياسى پروكۋراتۋرا ارقىلى جوسپاردان تىس تەكسەرۋگە رۇقسات سۇرادى.
قالالىق پوليتسيا دەپارتامەنتى «ەڭبەكتى قورعاۋ ەرەجەلەرىن بۇزۋ» بابىمەن قىلمىستىق ءىس قوزعالعانىن حابارلادى. تەرگەۋ ءجۇرىپ جاتىر.
ستاتيستيكاعا سۇيەنسەك، شىمكەنتتە بيىلدىڭ وزىندە 17 ادام وندىرىستىك جازاتايىم جاعدايدان زارداپ شەككەن، ولاردىڭ التاۋى قايتىس بولعان. كوپتەگەن ءىس ءالى تەرگەۋ ساتىسىندا.
