تايلاند پرەمەر-ءمينيسترى انۋتحين چانۆيراكۋن پاتتايادا قازا تاپقان رەسەيلىك اعالى-قارىنداس ديانا جانە رومان نازيموۆتاردىڭ ولىمىنە بايلانىستى كوڭىل ايتتى، دەپ حابارلايدى “ادىرنا” ءتىلشىسى Thairath-عا سىلتەپ.
ۇكىمەت باسشىسى كىنالىلەر زاڭ اياسىندا ەڭ قاتاڭ جازاعا تارتىلاتىنىن جانە تەرگەۋ بارىسىن جەكە باقىلاۋىنا العانىن حابارلادى. ونىڭ ايتۋىنشا، اتالعان قىلمىس تايلاندتىڭ حالىقارالىق بەدەلىنە ەلەۋلى نۇقسان كەلتىرگەن.
پرەمەر-مينيستر پاتتاياعا ارنايى بارىپ، قىلمىس جاسالعان ورىن مەن پوليتسيا بولىمشەسىندە بولدى.
«بولعان جاعداي ءۇشىن كەشىرىم سۇرايمىز»، – دەدى انۋتحين چانۆيراكۋن جۋرناليستەرگە.
سونداي-اق ول قازا تاپقان جاستاردىڭ تۋىستارىنا جان-جاقتى قولداۋ كورسەتىلەتىنىن ايتتى. قازىر ولاردىڭ اناسى تايلاندتا ءجۇر.
رەسەيدىڭ تايلاندتاعى ەلشىلىگىنىڭ كونسۋلدىق ءبولىمىنىڭ مەڭگەرۋشىسى يليا يلين ديپلوماتيالىق وكىلدىك ءىستىڭ جان-جاقتى ءارى ءادىل تەرگەلۋىنە ءۇمىت ءبىلدىرىپ، مارقۇمداردىڭ اناسىنا قاجەتتى كونسۋلدىق كومەك كورسەتىلەتىنىن جەتكىزدى.
ەسكە سالساق، تايلاند پوليتسياسى 22 جاستاعى ديانا نازيموۆا مەن 17 جاستاعى ءىنىسى رومان نازيموۆتىڭ ولىمىنە قاتىستى ەكى كۇدىكتىنى ۇستاعان.
تەرگەۋ مالىمەتىنشە، 31 شىلدەدە كۇدىكتىلەر قىلمىستى مويىنداپ، باستاپقىدا اعالى-قارىنداستىڭ موتوتسيكلىن ۇرلاماق بولعاندارىن، الايدا قارسىلىققا تاپ بولعاننان كەيىن ولاردى ولتىرگەندەرىن ايتقان.
