قازاقستاننىڭ وڭتۇستىك وڭىرلەرىندەگى اپتاپ ىستىقتىڭ سالدارىنان تسەمەنت-بەتون جابىندىسى بار اۆتوموبيل جولدارىنىڭ كەيبىر ۋچاسكەلەرى دەفورماتسياعا ۇشىرادى، دەپ حابارلايدى "ادىرنا" ءتىلشىسى Kolesa.kz-كە سىلتەمە جاساپ.
مالىمەتكە سايكەس، وتكەن اپتانىڭ سوڭىندا جۇرگىزۋشىلەر شىمكەنت – وزبەكستان رەسپۋبليكاسىنىڭ شەكاراسى باعىتىنداعى اۆتوجولدا بەتون جابىندىسىنىڭ كوتەرىلگەنىن بايقاعان. كەيبىر ۋچاسكەلەردە جول بەتى قاتتى قىزۋدىڭ اسەرىنەن كوتەرىلىپ، كولىك قوزعالىسىنا كەدەرگى كەلتىرگەن.
«قازاۆتوجول» ۇلتتىق كومپانياسىنىڭ مالىمەتىنشە، جوسپارلى تەكسەرۋ بارىسىندا بەتون پليتالارى كوتەرىلگەن التى ۋچاسكە انىقتالعان. اقاۋلاردى جويۋ ءۇشىن 50-دەن استام جۇمىسشى مەن ارنايى تەحنيكا جۇمىلدىرىلدى.
كومپانيانىڭ حابارلاۋىنشا، جوندەۋ جۇمىستارى قىسقا مەرزىمدە اياقتالىپ، انىقتالعان بارلىق اقاۋ قالپىنا كەلتىرىلگەن.
سونداي-اق «قازاۆتوجول» تسەمەنت-بەتون جابىندىسى بار رەسپۋبليكالىق ماڭىزى بار اۆتوموبيل جولدارىنىڭ جاعدايىنا تاۋلىك بويى مونيتورينگ جۇرگىزىلىپ جاتقانىن حابارلادى.
