ۇلىتاۋ وبلىسىنىڭ اكىمى ەسەت بايكەن جەزقازعان قالاسىنداعى بىرقاتار الەۋمەتتىك جانە ينفراقۇرىلىمدىق نىسانداردى ارالاپ، جۇزەگە اسىرىلىپ جاتقان جوبالاردىڭ بارىسىمەن تانىستى.
جۇمىس ساپارى بارىسىندا ءوڭىر باسشىسى الدىمەن شارۋاشىلىق-اۋىز سۋىن تازارتۋ ورتالىعىنا بارىپ، جەزقازعان قالاسىن ساپالى اۋىز سۋمەن قامتاماسىز ەتۋگە باعىتتالعان ماڭىزدى جوبانىڭ ىسكە اسىرىلۋ بارىسىن باقىلادى.
ودان كەيىن وبلىس اكىمى جىلۋ ەلەكتر ورتالىعىندا بولىپ، الداعى جىلىتۋ ماۋسىمىنا دايىندىق جۇمىستارىن تەكسەردى. جاۋاپتى تۇلعالارعا بارلىق دايىندىق شارالارىن 1 قىركۇيەككە دەيىن تولىق اياقتاۋدى تاپسىردى.
ساپار اياسىندا وبلىس اكىمى ەسەت بايكەن اباي كوشەسىندە جۇرگىزىلىپ جاتقان سۋ قۇبىرلارىن جاڭعىرتۋ جۇمىستارىمەن دە تانىستى. ءوڭىر باسشىسى قۇرىلىس كەزىندە تۇرعىنداردىڭ ۇزدىكسىز سۋمەن قامتاماسىز ەتىلۋىنە ەرەكشە نازار اۋدارۋدى مىندەتتەدى.
سونداي-اق وبلىس اكىمى وبلىستىق كوپبەيىندى اۋرۋحانادا جۇرگىزىلىپ جاتقان كۇردەلى جوندەۋ جۇمىستارىنىڭ بارىسىن باقىلاپ، جوندەۋ جۇمىستارىنىڭ ساپالى ورىندالۋى مەن مەديتسينالىق مەكەمەنىڭ قالىپتى قىزمەتىنە كەدەرگى كەلتىرمەي، بەلگىلەنگەن مەرزىمدە اياقتالۋىن قاتاڭ باقىلاۋدا ۇستايتىنىن ايتتى.
ءوڭىر باسشىسى جەزقازعان قالاسىنداعى №8 مەكتەپ-گيمنازيادا جۇرگىزىلىپ جاتقان كۇردەلى جوندەۋ جۇمىستارىن تەكسەردى. ول مەردىگەر ۇيىمدارعا بارلىق جۇمىستى 15 تامىزعا دەيىن اياقتاپ، ءبىلىم بەرۋ ۇيىمىنىڭ جاڭا وقۋ جىلىنا تولىق دايىن بولۋىن قامتاماسىز ەتۋدى تاپسىردى.
ارالاۋ قورىتىندىسىندا وبلىس اكىمى جەزقازعاننىڭ ساۋلەتتىك كەلبەتىن جاڭعىرتۋ، الەۋمەتتىك جانە قىزمەت كورسەتۋ ينفراقۇرىلىمىن دامىتۋ، زاماناۋي ويىن-ساۋىق جانە دەمالىس ورىندارىن كوبەيتۋ، ينۆەستيتسيالىق الەۋەتتى ارتتىرۋ، سونداي-اق اباتتاندىرۋ جۇمىستارىن جۇيەلى تۇردە جالعاستىرۋ باعىتىندا جيىن وتكىزىپ، ءتيىستى تاپسىرمالار جۇكتەدى.
