الماتىدا اتا-انالار مەكتەپ اسحاناسىنداعى تاماقتىڭ ساپاسىنا شاعىمداندى. سوزدەرىنشە، توعىز جىلدان بەرى وقۋشىلارعا شالا پىسكەن ەت پەن كۇيگەن كوتلەت بەرىپ كەلگە. سالدارىنان بالالاردىڭ كەيبىرى اۋرۋحانادان ءبىر-اق شىققان. بۇل تۋرالى ەۋرازيا ءبىرىنشى ارناسى جاريالادى، دەپ حابارلايدى “ادىرنا” ۇلتتىق پورتالى.
اتا-انالار №117 مەكتەپتىڭ اسحاناسىنا قاتىستى ماسەلە 9 جىلدان بەرى شەشىلمەي كەلگەنىن ايتادى. ولار بالالارعا شالا پىسكەن تاماق بەرەدى دەپ اشۋلى. سوزدەرىنشە، وقۋشىلار تاماق ىشپەي، مەكتەپتەن اش-قۇرساق قايتادى، كەيبىرى ۇشىنىپ، اۋرۋحاناعا دا تۇسكەن.
ء"بىزدىڭ سىنىپتا ۋلانۋ دەرەگى بولدى. بۇل تۋرالى انىقتاما دا بار. جالعىز جاعداي ەمەس، بالالاردىڭ دەنەسى ءبورتىپ كەتەدى. ءارى جەلىنبەگەن كوپ تاماقتى جيناپ جاتقانىن ءوزىمىز دە كوردىك", - دەيدى اتا-انالاردىڭ ءبىرى اسەل مەمەتوۆا.
ال اسحانا يەسى مۇنى جوققا شىعارعان. ايتۋىنشا، سانيتارلىق-ەپيدەميولوگيالىق ستانتسيا تاراپىنان ەشقانداي شاعىم تۇسپەگەن.
"بارلىعى دۇرىس. اتا-انالاردان وسى كۇنگە دەيىن ارىز بولماعان. مۇنداي جالعان اقپاراتتىڭ قايدان تۇسەتىنىن بىلمەيمىن. مەنىڭ 35 جىلدىڭ ەڭبەك ءوتىلىم بار جانە مەنى وسىلاي اياقتان شالعانى ۇيات", – دەدى كاسىپكەر بايان مامبەتوۆا.
اتا-انالار شاعىمىنان كەيىن اساحانادا وقۋ-اعارتۋ مينيسترلىگى مەن ۆەدومستۆوارالىق كوميسسيا وكىلدەرى تەكسەرىس جۇرگىزگەن. دەگەنمەن تەكسەرىس ءۇشىن عانا شىنى ىدىستاردى شىعارىپ، تاماق مولشەرىن كوبەيتىپ ۇلگەرگەن، دەيدى. ناتيجەسىندە استىڭ تالاپقا ساي دايىندالماعانى تۋرالى اكت تولتىرىلىپتى.
"ەكى كوميسسيا تاماقتاردى كورىپ، ولشەپ، اكت تولتىردى. ەندى ءبىز شارتتى بۇزامىز", – دەدى №117 جالپى ءبىلىم بەرۋ مەكتەبىنىڭ ديرەكتورى گۇلدانا ساماليكوۆا.
اتالعان مەكتەپتە 3 000-عا جۋىق بالا ءبىلىم الادى. ونىڭ 1 300-گە جۋىعى مەملەكەت تاراپىنان ىستىق تاماقپەن قامتىلعان. ءبىلىم ورداسىنىڭ باسشىلىعى جاڭا كاسىپكەرلەردى تاۋىپ، ماسەلەنى تولىق شەشەتىنىن ايتتى.
