جامبىل وبلىسىندا پوليتسەيلەر وقۋشىنى ءولتىردى دەگەن كۇدىكپەن ەكى ءجاسوسپىرىمدى ۇستادى، دەپ حابارلايدى "ادىرنا" ۇلتتىق پورتالى.
12 قىركۇيەك كۇنى شۋ اۋدانى، كوكقاينار اۋىلىندا فۋتبول ماتچىنان كەيىن 10 جانە 11-سىنىپ وقۋشىلارى اراسىندا جانجال شىققان. ويىنعا جينالعان بالالاردىڭ كىشى سىنىپتاعىسى جوعارعى سىنىپ وقۋشىلارىن جەڭىپ كەتكەن.
ناتيجەگە نارازى بولعاندار 10-سىنىپ وقۋشىسىن ۇرىپ تاستاعان.
وقيعا ورنىنا كەلگەن دارىگەرلەر ءجاسوسپىرىمنىڭ العان جاراقاتىنان كوز جۇمعانىن انىقتادى. جاسوسپىرىمدەرمەن پروفيلاكتيكالىق اڭگىمە جۇرگىزىلدى. بالالار ومبۋدسمەنىنىڭ قاتىسۋىمەن ارنايى كوميسسيا قۇرىلدى.
«جەدەل-ىزدەستىرۋ ءىس-شارالارى بارىسىندا پوليتسيا قىزمەتكەرلەرى 17 جانە 16 جاستاعى ەكى كۇدىكتىنى انىقتاپ، ۋاقىتشا ۇستاۋ يزولياتورىنا قامادى. قازىرگى ۋاقىتتا ءىستى جان-جاقتى، تولىق ءارى وبەكتيۆتى تەرگەۋگە باعىتتالعان بارلىق قاجەتتى جەدەل-تەرگەۋ امالدارى جۇرگىزىلۋدە. قر قپك 201-بابىنا سايكەس، تەرگەۋ مۇددەسىنە بايلانىستى باسقا مالىمەتتەر جاريا ەتىلمەيدى»، – دەلىنگەن جامبىل وبلىسى پد ءباسپاسوز قىزمەتى تاراتقان حابارلامادا.
