Qaraǧandy oblysynyŋ Balqaş qalasy üşın Metallurg künı – eŋ maŋyzdy käsıbi merekelerdıŋ bırı.
Bügınde būl salada qalanyŋ alty myŋnan astam tūrǧyny eŋbek etedı, olardyŋ köpşılıgı otbasylyq eŋbek dästürın jalǧastyryp keledı.
Jyl basynan berı Balqaş mys balqytu zauytynda şamamen 100 myŋ tonna katodty mys öndırıldı. Käsıbi mereke qūrmetıne metallurgter saltanatty jaǧdaida ūlyqtalyp, üzdık qyzmetkerlerge salalyq marapattar tabystaldy.
– Memleket basşysy Qasym-Jomart Toqaev «Eŋbek adamy qoǧamda erekşe qūrmetke ie boluy tiıs» ekenın bırneşe märte atap öttı. Būl sözder eŋ aldymen sızderge arnalǧan. Sızderdıŋ qajyrly eŋbekterıŋızdıŋ arqasynda Qaraǧandy oblysynyŋ metallurgiiasy Qazaqstan ekonomikasynyŋ basty tırekterınıŋ bırı bolyp qala berude. Ötken jyly öŋırdıŋ önerkäsıptık öndırıs kölemı 5,3 trillion teŋgeden asty. Onyŋ ışınde şamamen 3,8 trillion teŋgesı öŋdeu önerkäsıbıne tiesılı, – dep metallurgterdı käsıbi merekesımen oblys äkımı Ermaǧanbet Bölekpaev qūttyqtady. – Bügınde sala käsıporyndary bolaşaqqa nyq senımmen qadam basyp keledı. Zamanaui tehnologiialar engızılıp, ekologiialyq standarttar jetıldırılude, jaŋa öndırıstık jobalar jüzege asyrylyp jatyr. Degenmen eŋ basty qūndylyq – būrynǧydai adam. Alǧa jyljuǧa mümkındık beretın de – sızderdıŋ bılımderıŋız, käsıbilıkterıŋız ben jauapkerşılıkterıŋız.
Öŋır basşysy metallurgiia salasyndaǧy jiyntyq eŋbek ötılı jüz jyldan asqan Aqbergenovter äuletın ülgı retınde atap öttı.
Ermaǧanbet Bölekpaev üzdık metallurgterge «Eŋbek Daŋqy», «Qūrmettı metallurg» tösbelgılerı men «Eŋbek ardagerı» medalın tabystady.
Korporasiia basqarmasynyŋ töraǧasy Ruslan Öskenäli 2026 jyl kompaniiada Qauıpsızdık jyly dep jariialanǧanyn aitty.
– Jyldyŋ alǧaşqy alty aiynda Balqaş mys balqytu zauyty 96 myŋ tonnadan astam katodty mys öndırdı. Būl körsetkıştıŋ artynda sızderdıŋ kündelıktı eŋbekterıŋız ben joǧary käsıbilıkterıŋız tūr. Bız öndırıstık infraqūrylymdy kezeŋ-kezeŋımen jaŋartyp, jabdyqtardy jaŋǧyrtyp, eŋbek jaǧdailaryn jaqsartyp, medisinalyq jäne äleumettık baǧdarlamalardy damytyp kelemız. Biyl Balqaş mys balqytu zauytynda auqymdy kürdelı jöndeu baǧdarlamasy jüzege asyryluda. PV-1 jäne PV-2 balqytu agregattaryna kürdelı jöndeu jürgızılıp, ǧimarattardyŋ şatyrlary jaŋartylyp, nöserlı kärız jüiesı auystyryluda. Būl öndırıstık nysandardyŋ senımdılıgın arttyryp, olardyŋ qauıpsız paidalanyluyn qamtamasyz etedı, – dedı ol.
Saltanatty räsımge «Qazaqmys» kompaniiasy direktorlar keŋesınıŋ töraǧasy Nūrmūhambet Äbdıbekov te qatysty. Ol kompaniia öndırıstı jaŋǧyrtuǧa ǧana emes, özı jūmys ısteitın qalalardaǧy tūrǧyndardyŋ ömır sapasyn jaqsartuǧa da qomaqty qarjy salyp otyrǧanyn atap öttı.
– Kompaniianyŋ äleumettık jäne infraqūrylymdyq jobalar portfelı şamamen 45 milliard teŋgenı qūraidy. Būl qarajat bılım beru, densaulyq saqtau, sport, mädeniet jäne qalalyq infraqūrylymdy damytuǧa baǧyttalǧan. Balqaşta jaŋa äleumettık jobalardy ıske asyru bastalady. Aldaǧy jyldary zamanaui balabaqşa men sportpen şūǧyldanuǧa, belsendı demalysqa jäne turistık äleuettı damytuǧa arnalǧan sporttyq-turistık baza salynady. Būl – qyzmetkerlerımız ben olardyŋ otbasylarynyŋ ömır sapasyna salynǧan investisiia ärı qalanyŋ bolaşaǧyna qosylǧan üles, – dedı Nūrmūhambet Äbdıbekov.
Merekede öndırıs ardagerlerıne de erekşe qūrmet körsetıldı. Qabdyrahman Esembekov metallurgiia salasyna 40 jyldan astam ömırın arnaǧan. Onyŋ äkesı de metallurg bolǧan, bügınde būl eŋbek jolyn balalary jalǧastyryp keledı.
– Men balqytuşy bolyp eŋbek ettım. Affinaj jäne myryş zauyttary siiaqty ırı öndırıstık jobalardyŋ ıske qosyluyna qatystym. Metallurgiianyŋ qarqyndy damyp, zamanaui tehnologiialardyŋ engızılıp, köptegen üderısterdıŋ avtomattandyrylyp jatqany quantady. Barşa metallurgterdı käsıbi merekemen qūttyqtap, zor densaulyq pen baq-bereke tıleimın! – dedı öndırıs ardagerı.
40 jyldyq eŋbek ötılı bar metallurg Düisenǧali Baiǧuatov qarapaiym jūmysşydan basşylyq qyzmetke deiıngı joldan öttı. Ol ūzaq jyldar boiy Balqaş mys balqytu zauytyn basqarǧan.
– Metallurgiia – jıgerlı ärı qaisar jandardyŋ mamandyǧy. Är tonna mystyŋ artynda myŋdaǧan jūmysşynyŋ täjıribesı, jauapkerşılıgı men kündelıktı qajyrly eŋbegı jatyr. Sondyqtan Metallurg künı Balqaş üşın ärdaiym airyqşa mereke bolyp qala beredı, – dedı Düisenǧali Baiǧuatov.
Balqaşta Metallurg künı keŋ kölemde atalyp ötedı.
Käsıbi merekege orai otbasylyq oiyn-sauyq baǧdarlamalary, sporttyq jarystar jäne tanymal önerpazdardyŋ qatysuymen konsert ūiymdastyrylady.
Merekelık şara soŋynda otşaşu bolady.
