قازاقستاننىڭ ەكس-پرەزيدەنتى نۇرسۇلتان نازارباەۆ پەن وزبەكستان پرەزيدەنتى شاۆكات ميرزيوەۆ ءبىر-ءبىرىن تەلەفون ارقىلى كەلە جاتقان جاڭا جىلمەن قۇتتىقتادى. بۇل تۋرالى وزبەكستان پرەزيدەنتىنىڭ ءباسپاسوز قىزمەتى مالىمەت تاراتتى، دەپ حابارلايدى “ادىرنا”.
“ولار تۇتاس باۋىرلاستىق، تاتۋ كورشىلىك، ستراتەگيالىق سەرىكتەستىك جانە وداقتاستىق قاتىناستاردى، سونداي-اق وزبەكستان مەن قازاقستان اراسىنداعى كوپقىرلى ىنتىماقتاستىقتى ودان ءارى دامىتۋدى اتاپ ءوتتى”، دەلىنگەن حابارلامادا.
ايتا كەتسەك، قازاقستاننىڭ بۇرىنعى پرەزيدەنتى نۇرسۇلتان نازارباەۆ ازەربايجان پرەزيدەنتى يلحام اليەۆتى دە تۋعان كۇنىمەن توقاەۆتان بۇرىن 19 جەلتوقساندا قۇتتىقتاپ قويعان ەدى.
ال قازاقستان پرەزيدەنتى قاسىم-جومارت توقاەۆ 24 جەلتوقساندا تەلەفون ارقىلى قۇتتىقتاعان بولاتىن.
بيىلدىققا كوكجيەكتەن كورىنبەي كەتكەن نازارباەۆ جىل سوڭىندا نيۋس-مەيكەرگە اينالدى. ونىڭ 27 جەلتوقسان كۇنى كرەملدە رەسەي باسشىسى ۆلاديمير پۋتينمەن كەزدەسۋى دە جۇرتشىلىق نازارىن ەرەكشە اۋدارعان. نۇرسۇلتان نازارباەۆ 2019 جىلى پرەزيدەنتتىكتەن كەتكەن سوڭ جىل سايىن ءبىر-ەكى مارتە ۆلاديمير پۋتينگە تۇراقتى تۇردە بارىپ تۇراتىنى بايقالعان. ولار جەلتوقسانداعى كەزدەسۋدەن بۇرىن 2025 جىلعى 29 مامىردا جۇزدەسكەنى حابارلانعان. الايدا سوڭعى كەزدەسۋى قوعامدىق پىكىر تاراپىنان قاتاڭ سىنعا ۇشىرادى. ماسەلەن، ءماجىلىس دەپۋتاتى ەرمۇرات باپي ۇلتتىق قاۋىپسىزدىكتى قامتاماسىز ەتۋ ماقساتىندا مەملەكەتتىك قۇپيالارعا قول جەتكىزگەن بۇرىنعى جوعارى لاۋازىمدى تۇلعالاردىڭ شەتەلگە شىعۋىن زاڭنامالىق تۇرعىدا رەتتەۋدى ۇسىنعان.
"ەلدىڭ قاۋىپسىزدىگىن قامتاماسىز ەتۋ ماقساتىندا مەملەكەتتىك قۇپيانى بىلەتىن تۇلعانىڭ (ەكس-پرەزيدەنت بولسىن، مينيستر نەمەسە باسقا دا لاۋازىم يەسى بولسىن) شەت ەلگە شىعۋ مۇمكىندىگىن رەتتەيتىن زاڭ قاجەت شىعار",- دەگەن ەدى دەپۋتات.
ال 85 جاستاعى نازارباەۆتىڭ كورشى ەلدەر پرەزيدەنتتەرىن قازاقستاننىڭ رەسمي باسشىسىنان بۇرىن قۇتتىقتاۋى قانداي ەتيكا، قانداي مۇددەگە سايكەس كەلۋى مۇمكىن؟
