اقش قارۋلى كۇشتەرىنىڭ ورتالىق قولباسشىلىعى (CENTCOM) 13 شىلدەگە قاراعان ءتۇنى يران اۋماعىنا جاڭا سوققىلار جاسالعانىن مالىمدەدى، دەپ حابارلايدى «ادىرنا» ءتىلشىسى DW-گە سىلتەمە جاساپ.
«جوعارعى باس قولباسشى يران رەجيمىن تەجەۋ ءۇشىن وسى سوققىلاردى جاساۋعا بۇيرىق بەردى»، – دەلىنگەن حابارلامادا.
يراننىڭ مەملەكەتتىك IRIB تەلەارناسى جارىلىستاردىڭ بەندەر-ابباس پورتىنان باتىسقا قاراي، سيريك قالاسى ماڭىندا، كەشم ارالىندا جانە ورمۇز بۇعازى اۋدانىنداعى دجاسك قالاسىندا بولعانىن جەتكىزدى. Mehr اقپارات اگەنتتىگىنىڭ مالىمەتىنشە، كەشم ارالىندا ءبىر ادام قازا تاۋىپ، ەكى ادام جارالانعان.
يران يسلام رەۆوليۋتسياسى ساقشىلار كورپۋسى سوعىسقا دەيىن الەمدىك مۇناي ساۋداسىنىڭ شامامەن 20 پايىزى وتەتىن ورمۇز بۇعازى «قوسىمشا حابارلاماعا دەيىن جانە اقش-تىڭ وڭىردەگى ارالاسۋى توقتاعانعا دەيىن جابىق كۇيىندە قالاتىنىن» مالىمدەدى. الايدا اقش اسكەرى بۇل اقپاراتتى جوققا شىعاردى.
«يران بۇعازدى باقىلامايدى. كەمە قاتىناسى جالعاسىپ جاتىر»، – دەپ مالىمدەدى CENTCOM.
وسىعان ۇقساس مالىمدەمەنى 12 شىلدەدە اق ءۇي باسشىسى دونالد ترامپ تا جاساعان بولاتىن.
12 شىلدەگە قاراعان ءتۇنى اقش اسكەرى يرانداعى شامامەن 140 اسكەري نىسانعا، ونىڭ ىشىندە زىمىراندار مەن دروندار ساقتالاتىن قويمالارعا جانە بايلانىس توراپتارىنا سوققى بەرگەن. بۇل ارەكەت ورمۇز بۇعازىندا GFS Galaxy كونتەينەر تاسىمالداۋشى كەمەسىنە جاسالعان شابۋىلعا جاۋاپ رەتىندە جۇزەگە اسىرىلعان. ال يران تاراپى ازاماتتىق كەمەگە تەگەران بەكىتكەن باعىتتان اۋىتقىعانى ءۇشىن تەك «ەسكەرتۋ وقتارى» اتىلعانىن مالىمدەگەن.
12 شىلدەدەگى امەريكالىق سوققىلاردان كەيىن يران پارسى شىعاناعى ەلدەرى مەن يوردانياعا شابۋىل جاساعان. ساقشىلار كورپۋسىنىڭ مالىمەتىنشە، نىساناعا اقش-تىڭ قاتارداعى ءال-ۋدەيد اسكەري-اۋە بازاسى مەن ومانداعى دۋكم پورتى الىنعان. سول كۇنى تەگەران ورمۇز بۇعازىندا ءبىر تاۋلىك ىشىندە ەكىنشى كەمەنىڭ ىستەن شىعارىلعانىن دا حابارلادى.
17 ماۋسىمدا اقش پەن يران اسكەري ءىس-قيمىلداردى توقتاتۋدى جانە ستراتەگيالىق ماڭىزى بار تەڭىز ايدىنىن قايتا اشۋدى كوزدەيتىن نەگىزدەمەلىك كەلىسىمگە قول قويعان ەدى. الايدا 25 ماۋسىمنان باستاپ يراندىق اسكەريلەر ورمۇز بۇعازىنداعى ازاماتتىق كەمەلەرگە بىرنەشە رەت شابۋىل جاساپ، وعان جاۋاپ رەتىندە اقش يسلام رەسپۋبليكاسىنىڭ نىساندارىنا سوققى بەرگەن بولاتىن. تاراپتار ءبىر-ءبىرىن ءبىتىمدى بۇزدى دەپ ايىپتاپ كەلەدى.
8 شىلدەدە انكارادا وتكەن ناتو سامميتىندە سويلەگەن اقش پرەزيدەنتى دونالد ترامپ يرانمەن جاسالعان ءوزارا تۇسىنىستىك تۋرالى مەموراندۋمنىڭ ەندى كۇشىندە ەمەس ەكەنىن مالىمدەدى. اق ءۇي باسشىسى يران جەتەكشىلەرىن «اۋرۋ ادامدار» دەپ اتاپ، ولارمەن كەلىسسوز جۇرگىزۋدى «ۋاقىتتى بوسقا شىعىنداۋ» دەپ باعالادى. سونىمەن بىرگە ترامپ تەگەرانمەن ءوزى كەلىسسوز جۇرگىزبەيتىنىن، بىراق قالاسا، امەريكالىق كەلىسسوز جۇرگىزۋشىلەردىڭ ديالوگتى جالعاستىرۋىنا مۇمكىندىك بەرەتىنىن ايتتى. اقش يرانعا قارسى مۇناي سانكتسيالارىن قايتا ەنگىزدى.
