AQŞ Qaruly küşterınıŋ Ortalyq qolbasşylyǧy (CENTCOM) 13 şıldege qaraǧan tünı İran aumaǧyna jaŋa soqqylar jasalǧanyn mälımdedı, dep habarlaidy «Adyrna» tılşısı DW-ge sılteme jasap.
«Joǧarǧy Bas qolbasşy İran rejimın tejeu üşın osy soqqylardy jasauǧa būiryq berdı», – delıngen habarlamada.
İrannyŋ memlekettık IRIB telearnasy jarylystardyŋ Bender-Abbas portynan batysqa qarai, Sirik qalasy maŋynda, Keşm aralynda jäne Ormūz būǧazy audanyndaǧy Djask qalasynda bolǧanyn jetkızdı. Mehr aqparat agenttıgınıŋ mälımetınşe, Keşm aralynda bır adam qaza tauyp, ekı adam jaralanǧan.
İran islam revoliusiiasy saqşylar korpusy soǧysqa deiın älemdık mūnai saudasynyŋ şamamen 20 paiyzy ötetın Ormūz būǧazy «qosymşa habarlamaǧa deiın jäne AQŞ-tyŋ öŋırdegı aralasuy toqtaǧanǧa deiın jabyq küiınde qalatynyn» mälımdedı. Alaida AQŞ äskerı būl aqparatty joqqa şyǧardy.
«İran būǧazdy baqylamaidy. Keme qatynasy jalǧasyp jatyr», – dep mälımdedı CENTCOM.
Osyǧan ūqsas mälımdemenı 12 şıldede Aq üi basşysy Donald Tramp ta jasaǧan bolatyn.
12 şıldege qaraǧan tünı AQŞ äskerı İrandaǧy şamamen 140 äskeri nysanǧa, onyŋ ışınde zymyrandar men drondar saqtalatyn qoimalarǧa jäne bailanys toraptaryna soqqy bergen. Būl äreket Ormūz būǧazynda GFS Galaxy konteiner tasymaldauşy kemesıne jasalǧan şabuylǧa jauap retınde jüzege asyrylǧan. Al İran tarapy azamattyq kemege Tegeran bekıtken baǧyttan auytqyǧany üşın tek «eskertu oqtary» atylǧanyn mälımdegen.
12 şıldedegı amerikalyq soqqylardan keiın İran Parsy şyǧanaǧy elderı men İordaniiaǧa şabuyl jasaǧan. Saqşylar korpusynyŋ mälımetınşe, nysanaǧa AQŞ-tyŋ Qatardaǧy Äl-Udeid äskeri-äue bazasy men Omandaǧy Dukm porty alynǧan. Sol künı Tegeran Ormūz būǧazynda bır täulık ışınde ekınşı kemenıŋ ısten şyǧarylǧanyn da habarlady.
17 mausymda AQŞ pen İran äskeri ıs-qimyldardy toqtatudy jäne strategiialyq maŋyzy bar teŋız aidynyn qaita aşudy közdeitın negızdemelık kelısımge qol qoiǧan edı. Alaida 25 mausymnan bastap irandyq äskeriler Ormūz būǧazyndaǧy azamattyq kemelerge bırneşe ret şabuyl jasap, oǧan jauap retınde AQŞ İslam Respublikasynyŋ nysandaryna soqqy bergen bolatyn. Taraptar bır-bırın bıtımdı būzdy dep aiyptap keledı.
8 şıldede Ankarada ötken NATO sammitınde söilegen AQŞ prezidentı Donald Tramp İranmen jasalǧan özara tüsınıstık turaly memorandumnyŋ endı küşınde emes ekenın mälımdedı. Aq üi basşysy İran jetekşılerın «auru adamdar» dep atap, olarmen kelıssöz jürgızudı «uaqytty bosqa şyǧyndau» dep baǧalady. Sonymen bırge Tramp Tegeranmen özı kelıssöz jürgızbeitının, bıraq qalasa, amerikalyq kelıssöz jürgızuşılerdıŋ dialogty jalǧastyruyna mümkındık beretının aitty. AQŞ İranǧa qarsy mūnai sanksiialaryn qaita engızdı.
