12 اقپاندا اقمولا وبلىسى اقكول اۋدانىنا قاراستى ازات اۋىلىندا جەرگىلىكتى تۇرعىندار جابايى سىلەۋسىندى بايقاپ قالعان. كۋاگەرلەردىڭ ايتۋىنشا، جانۋار ارتقى اياقتارىمەن اقساڭداپ جۇرگەن. وقيعا ورنىنان تۇسىرىلگەن بەينەجازبا الەۋمەتتىك جەلىلەردە كەڭىنەن تاراپ، قوعام نازارىن اۋداردى، دەپ حابارلايدى “ادىرنا”.
اقمولا وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ مالىمەتىنشە، سىلەۋسىن «ازات–ستەپنوگورسك» تاسجولىندا كولىك قاعىپ كەتۋى سالدارىنان اۋىر جاراقات العان. الدىن الا بولجام بويىنشا، جانۋاردىڭ العان جاراقاتى ونى ءولىم حالىنە جەتكىزگەن.
تۇرعىنداردان تۇسكەن حابارلاماعا اقمولا وبلىسىنىڭ تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ “كەنەس ورمان شارۋاشىلىعى” كوممۋنالدىق مەملەكەتتىك مەكەمەسى ديرەكتورىنىڭ ورىنباسارى ۆ.يۋ. گازەتوۆ جەدەل ارەكەت ەتتى. «لەسوستەپنوە» اڭشىلىق شارۋاشىلىعىنىڭ يەسى ا.ا. اباسسپەن بىرلەسىپ، جانۋار ۆەتەرينارلىق كومەك كورسەتۋ جانە ءارى قاراي «بۋراباي دامۋ» جشس زووبۇرىشىنا ورنالاستىرۋ ءۇشىن كولىككە تيەلدى.
الايدا كوزبەن شولىپ تەكسەرۋ بارىسىندا سىلەۋسىننىڭ ارتقى اياقتارى تولىقتاي ۇگىتىلىپ كەتكەنى انىقتالدى. قان جوعالتۋدىڭ سالدارىنان جانۋار سول جەردە جان تاپسىرعان. جانۋاردىڭ ولەكسەسىن جويۋ تۋرالى اكت جاسالدى.
ينسپەكتسيا تۇرعىنداردى جابايى تابيعات وكىلدەرىمەن كەزدەسكەندە ساق بولۋعا جانە جاراقاتتانعان جانۋارلار تۋرالى ۋاقتىلى ءتيىستى ورگاندارعا حابارلاۋعا شاقىرادى.
