بەيسەنبى كۇنى وتكەن «بايتاق» جاسىلدار پارتياسىنىڭ سەزىندە داۋ شىقتى، دەپ حابارلايدى «ادىرنا» ءتىلشىسى «ۆلاست» باسىلىمىنا سىلتەمە جاساپ.
پارتيانىڭ بىرقاتار مۇشەسىنىڭ ايتۋىنشا، ولاردى جيىنعا كىرگىزبەگەن. ال ساياسي كەڭەس پەن ساياسي بيۋرونىڭ كەيبىر وكىلى سايلاۋدا تابىسقا جەتۋ ءۇشىن پارتيا توراعاسى ازاماتحان ءامىرتايدى اۋىستىرۋ ماسەلەسىن كوتەردى.
ازاماتحان ءامىرتاي ءسوز سويلەپ تۇرعان كەزدە مىنبەرگە پارتيانىڭ ساياسي بيۋروسى مەن ساياسي كەڭەسىنىڭ مۇشەسى، قۇرىلتاي دەپۋتاتتىعىنا كانديداتتار تىزىمىنە ەنگەن اسقار يماناليەۆ كوتەرىلدى. ول پارتيانىڭ سايلاۋالدى باعدارلاماسىندا ەكولوگيالىق ماسەلەلەردىڭ ۇلەسى نەبارى 3 پايىز ەكەنىن ايتتى.
«ەگەر وسى پلاتفورمادان «بايتاق» دەگەن اتاۋدى الىپ تاستاساڭىز، ونى كەز كەلگەن باسقا پارتياعا بەرە سالۋعا بولادى»، – دەدى ول.
يماناليەۆتىڭ سوزىنە دەلەگاتتار نارازىلىقپەن جاۋاپ بەردى. ال ازاماتحان ءامىرتاي قارسىلاسىن ميكروفوننان الىستاتۋعا تىرىستى.
«2023 جىلعى سايلاۋدا جاسىلدار پارتياسى 144-148 مىڭ داۋىس جينادى. ال «بارىنە قارسىمىن» دەگەن باعانعا 240 مىڭ ادام داۋىس بەردى. ءبىز بوس باعاننان جەڭىلىپ وتىرمىز. وسىنى ويلاڭىزدار»، – دەدى يماناليەۆ.
ول ازاماتحان امىرتايعا قۇرمەتپەن قارايتىنىن ايتا وتىرىپ، جاڭا كونستيتۋتسيا جاعدايىندا بىرقاتار پارتيادا توراعالار اۋىسقانىن ەسكە سالدى جانە توراعانى قايتا سايلاۋ ماسەلەسىن كۇن تارتىبىنە ەنگىزۋدى ۇسىندى.
«توراعانى قايتا سايلاۋ ماسەلەسىن قارايىق. ەگەر دەلەگاتتار ونى قولداسا، بۇل ونىڭ بەدەلىن ودان ءارى كۇشەيتەدى»، – دەدى يماناليەۆ.
ءامىرتاي بۇل ۇسىنىسپەن كەلىسەتىنىن ايتقانىمەن، جۋرناليستەردى زالدان شىعارۋدى تالاپ ەتىپ، كۇزەت شاقىرۋدى سۇرادى. ونىڭ پىكىرىنشە، جۋرناليستەر مىنبەر ماڭىندا ءتۇسىرىلىم جاساپ، سەزدىڭ وتۋىنە كەدەرگى كەلتىرگەن. الايدا تىلشىلەر ميكروفون ءوشىپ قالعاندىقتان، دىبىستى جازىپ الۋ ءۇشىن مىنبەرگە جاقىن تۇرۋعا ءماجبۇر بولعان.
وسى ۋاقىتتا سەزد ءوتىپ جاتقان عيماراتتىڭ فويەسىندە دە كەلىسپەۋشىلىكتەر بولدى. بىرنەشە پارتيا مۇشەسى جيىنعا كەلگەنىمەن، ىشكە كىرگىزىلمەگەندەرىن ايتتى.
پارتيا توراعاسىنىڭ كەڭەسشىسى ءارى جاسىل ساياسات دەپارتامەنتىنىڭ بۇرىنعى باسشىسى ازامات ايايبەرگەنوۆتىڭ ايتۋىنشا، پارتيا قۇرىلتايعا ءوتىپ، كونستيتۋتسيادا بەكىتىلگەن ەكولوگيالىق باستامالاردى جۇزەگە اسىرۋى ءتيىس.
ء«بىز ەشكىمگە قارسى ەمەسپىز، تەك اشىقتىقتى قالايمىز. كەشە جاريالانعان زەرتتەۋ ناتيجەسىندە «بايتاق» پارتياسىنا سەنىم بىلدىرگەندەر ۇلەسى 1,1 پايىز عانا بولدى. مۇنداي جاعدايمەن كەلىسۋگە بولمايدى. قۇرىلتايدا ەكولوگيالىق فراكتسيا بولۋى قاجەت»، – دەدى ول.
ايايبەرگەنوۆ سەزگە كەلگەندە ءوزىن پارتيا قاتارىنان شىعارىلعانىن بىلگەنىن ايتتى. بىراق، ونىڭ سوزىنشە، بۇل جونىندە ەشقانداي رەسمي قۇجات الماعان، ءتىپتى ەكى كۇن بۇرىن عانا ونى قۇرىلتايعا كانديداتتار تىزىمىنە ەنگىزۋ ماسەلەسى قارالعان.
پارتيا ساياسي كەڭەسىنىڭ مۇشەسى ەرلان قىدىرباەۆ تا كەيبىر وكىلدەردىڭ سەزگە جىبەرىلمەگەنىن راستادى. ونىڭ ايتۋىنشا، جەتىسۋ وبلىستىق فيليالىنىڭ وكىلدەرى بولماعاندىقتان، سەزد زاڭدى كۇشكە يە ەمەس.
«جەتىسۋ فيليالى جوق. ءبىز توراعانى اۋىستىرۋ ماسەلەسىن كوتەردىك. بىراق پارتيا جارعىسىنا سايكەس سەزدەگى كەز كەلگەن ماسەلە بارلىق فيليالدىڭ قاتىسۋىمەن قارالۋى ءتيىس. ءبىر فيليال جوق بولسا، سەزدىڭ زاڭدىلىعىنا كۇمان تۋىندايدى»، – دەدى قىدىرباەۆ.
سەزد اياقتالعاننان كەيىن ازاماتحان ءامىرتاي جۋرناليستەرگە جيىننىڭ زاڭدى وتكەنىن مالىمدەدى. ونىڭ ايتۋىنشا، جارعى بويىنشا سەزدىڭ زاڭدى بولۋى ءۇشىن فيليالداردىڭ كەمىندە ۇشتەن ەكىسى قاتىسۋى جەتكىلىكتى.
ايتا كەتەيىك، بۇگىن «بايتاق» پارتياسى توراعاسىن قايتا سايلاۋ ماسەلەسى سەزدىڭ كۇن تارتىبىنە ەنگىزىلگەن جوق.
بۇعان دەيىن ازاماتحان ءامىرتاي ءوزىن پارتيا قاتارىنان شىعارىپ جىبەرگەنى تۋرالى اقپاراتتى قارا پيارعا بالاعان ەدى.
