اقش-تىڭ تانىمال اكتريساسى سەلما بلەرگە ۇشاق بورتىندا بورتسەرىكتەرگە، پوليتسيا قىزمەتكەرىنە جانە مەدبيكەگە شابۋىل جاسادى دەگەن ايىپ تاعىلدى، دەپ حابارلايدى “ادىرنا”.
اكتريسا كىناسىن مويىنداعان جوق. قورعاۋ تاراپى وقيعاعا ءدارى-دارمەكتى ۋاقىتىندا قابىلداماۋ مەن قاتتى شارشاۋدىڭ اسەرى سەبەپ بولۋى مۇمكىن ەكەنىن ايتتى
12 قازاندا سەلما بلەرگە ەكىنشى دارەجەلى شابۋىلعا قاتىستى ەكى ايىپ تاعىلعان. ءىس بورتسەرىكتەرمەن، پوليتسيا قىزمەتكەرىمەن جانە مەدبيكەمەن بولعان وقيعالارعا بايلانىستى قارالىپ جاتىر.
اكتريسانىڭ ادۆوكاتى شون بارنستىڭ ايتۋىنشا، بلەر ۇشار الدىندا شاشىراڭقى سكلەروزعا قارسى ءدارىسىن قابىلداماعان. سونداي-اق ول قۇلاپ، باسىن سوعىپ العان. قورعاۋشى اكتريسانىڭ ءتۇسىرىلىم الاڭىندا ۇزاق جۇمىس ىستەپ، قاتتى شارشاعانىن دا اتاپ ءوتتى. ونىڭ سوزىنشە، وسى فاكتورلار مەن بيىكتىكتىڭ اسەرى اكتريسانىڭ باعداردان جاڭىلىپ، ابدىراپ قالۋىنا سەبەپ بولۋى ىقتيمال.
ادۆوكات بولعان جاعدايدىڭ قاساقانا جاسالعان شابۋىل ەمەس ەكەنىن العا تارتتى. قورعاۋ تاراپى سوتتان اكتريسانىڭ كينويندۋسترياداعى جەتىستىكتەرىن دە ەسكەرۋدى سۇراعان. الايدا سۋديا ينديرا حان تانىمالدىق ادامنىڭ زاڭ الدىنداعى جاۋاپكەرشىلىگىن وزگەرتپەيتىنىن ايتتى.
سەلما بلەر وزىنە تاعىلعان ايىپتاردى مويىندامادى. سوت ونى 20 مىڭ دوللار قولما-قول كەپىل نەمەسە 60 مىڭ دوللار كەپىلدىك بەرۋ شارتىمەن بوساتۋ تۋرالى شەشىم قابىلدادى.
بۇقارالىق اقپارات قۇرالدارىنىڭ مالىمەتىنشە، وقيعا 11 قازاندا لوس-اندجەلەستەن نيۋ-يورككە باعىت العان Delta اۋە كومپانياسىنىڭ ۇشاعىندا بولعان.
ايىپتاۋ نۇسقاسىنا سايكەس، ۇشۋ كەزىندە اكتريسا ءبىر بورتسەرىكتى ۇرىپ، ەكىنشىسىن تىستەگەن. ۇشاق نيۋ-يوركتەگى دجون كەننەدي اتىنداعى حالىقارالىق اۋەجايعا قونعاننان كەيىن بلەر ۇستالىپ، اۋرۋحاناعا جەتكىزىلگەن.
جولدا ول پوليتسيا قىزمەتكەرىنىڭ باسىنان بىرنەشە رەت تەپكەن دەگەن ايىپ تا تاعىلعان. كەيىن اۋرۋحانادا مەدبيكەگە شابۋىل جاسادى دەگەن كۇدىككە ىلىنگەن.
اكتريسانىڭ وكىلى ونىڭ ۇستاماسى بولعانىن حابارلادى. ۇشاق قونعاننان كەيىن بلەر مەديتسينالىق كومەك الىپ، جاعدايى تۇراقتانعان.
ەگەر سوت سەلما بلەردىڭ كىناسىن دالەلدەسە، وعان ەكى جىلدان جەتى جىلعا دەيىن باس بوستاندىعىنان ايىرۋ جازاسى تاعايىندالۋى مۇمكىن.
سەلما بلەر — امەريكالىق اكتريسا. ول «قاتىگەز ويىندار» (1999), «زاڭعا باعىناتىن اققۇبا» (2001) جانە «حەللبوي: توزاقتان كەلگەن باتىر» (2004) فيلمدەرىندەگى رولدەرى ارقىلى تانىلعان. سونداي-اق «دوستار» تەلەحيكاياسىنا ەپيزودتىق رولدە تۇسكەن.
