ومبى وبلىسىنداعى قازاق ۇلتتىق-مادەني اۆتونومياسى سوعىس ارداگەرلەرىنە ارنالعان گوسپيتال ماڭىنداعى گۇلزارعا بەلگىلى جازۋشى كەمەل توقاەۆتىڭ ەسىمىن بەرۋدى ۇسىندى، دەپ حابارلايدى «ادىرنا» ءتىلشىسى.
اڭگىمە گاگارين كوشەسىندە ورنالاسقان اۋماق تۋرالى بولىپ وتىر.
«1945 جىلعى 21 قاڭتاردا 7-ءشى جەكە گۆارديالىق قىزىل تۋلى تانك پولكىنىڭ اۆتوماتشىلار بولىمشەسىنىڭ كومانديرى، گۆارديا سەرجانتى كەمەل توقاەۆ اياعىنان وق ءتيىپ جارالاندى. 1945 جىلدىڭ اقپان ايىندا ول ومبى قالاسىنداعى №1494 ەۆاكۋاتسيالىق گوسپيتالدە (قازىرگى سوعىس ارداگەرلەرىنە ارنالعان گوسپيتال – رەد.) ەمدەلدى. سول جەردە دارىگەرلەر ونىڭ جارالانعان اياعىن امپۋتاتسيادان ساقتاپ قالدى»، — دەلىنگەن تۇسىندىرمە جازبادا.
گۇلزارعا اتاۋ بەرۋ تۋرالى تۇپكىلىكتى شەشىم ومبى قالالىق كەڭەسىنىڭ جالپى وتىرىسىندا قابىلدانادى.
ەسكە سالايىق، 2020 جىلى سوعىس ارداگەرلەرىنە ارنالعان گوسپيتال عيماراتىندا كەمەل توقاەۆقا ارنالعان مەموريالدىق تاقتا ورناتىلعان ەدى.
كەمەل توقاەۆ (1923-1986) – پرەزيدەنت قاسىم-جومارت توقاەۆتىڭ اكەسى، ۇلى وتان سوعىسىنىڭ قاتىسۋشىسى. I جانە II دارەجەلى وتان سوعىسى وردەنىمەن، «ەرلىگى ءۇشىن» مەدالىمەن ەكى ماراپاتتالعان. سونداي-اق ول – قازاق دەتەكتيۆ جانرىنىڭ نەگىزىن قالاۋشىلاردىڭ ءبىرى.
