قازاقستاندىق جۋرناليست امانتاي داندىعۇلوۆقا حالىقارالىق ىزدەۋ جاريالاندى. بۇل تۋرالى مالىمەت قۇقىقتىق ستاتيستيكا ورگاندارىنىڭ پورتالىندا جاريالاندى، دەپ حابارلايدى «ادىرنا» ءتىلشىسى.
ءىس 2026 جىلدىڭ 7 شىلدەسىندە تىركەلگەن. وعان قاتىستى قىلمىستىق ءىستى الماتى قالاسى پوليتسيا دەپارتامەنتى تەرگەپ جاتىر.
ءىىم ءباسپاسوز قىزمەتىنىڭ مالىمەتىنشە، داندىعۇلوۆقا قاتىستى الاياقتىق فاكتىسى بويىنشا قىلمىستىق ءىس قوزعالعان.
«داندىعۇلوۆقا قاتىستى الاياقتىق دەرەگى بويىنشا قىلمىستىق ءىس تەرگەلۋدە. 2026 جىلدىڭ 7 شىلدەسىندە ول ىزدەۋگە جاريالاندى، – دەلىنگەن حابارلامادا.
مينيسترلىك تەرگەۋ مەن جەدەل-ىزدەستىرۋ شارالارىنىڭ مۇددەسىنە بايلانىستى وزگە اقپاراتتى جاريالامادى.
بۇعان دەيىن امانتاي داندىعۇلوۆ يمانعالي تاسماعامبەتوۆ الماتى قالاسىنىڭ اكىمى بولعان تۇستا، اكىمدىك اپپاراتىنىڭ جەتەكشىسى قىزمەتىن 2004-2008 جىلدار ارالىعىندا اتقارعان ەدى. كەيىن ول «نوۆايا گازەتا – كازاحستان» باسىلىمىن دا باسقاردى.
شاڭىراق وقيعاسى 2006 جىلى 14 شىلدەدە الماتى قالاسىنىڭ شەتىندەگى شاڭىراق، باقاي جانە باسقا دا شاعىن اۋدانداردا جەر جانە باسپانا داۋىنان تۋىنداعان حالىق پەن بيلىك اراسىنداعى قاندى قاقتىعىس رەتىندە بەلگىلى. قاقتىعىس سالدارىنان 1 پوليتسەي قازا تاپتى، 25 ادامعا ايىپ تاعىلدى. ولاردىڭ الدى 18 جىلعا سوتتالدى. شاڭىراق وقيعاسىنا بايلانىستى سوتتالعانداردىڭ ءبىرى قوعامدىق بەلسەندى ارون اتابەك بولاتىن. ول 18 جىلعا سوتتالدى. 2021 جىلى تۇرمەدەن جازاسى جەڭىل مەرزىمگە اۋىستىرىلىپ شىققان كەزدە ءوزى دە تۇرمەدەگى ازابى مەن ناۋقاسى سالدارىنان قايتىس بولدى.
