ۇجىمدىق قاۋىپسىزدىك شارتى ۇيىمىنىڭ (ۇقشۇ) باس حاتشىسى يمانعالي تاسماعامبەتوۆ رەسەيلىك يزۆەستيا باسىلىمىنا سۇحبات بەرىپ، ەۋروپا ەلدەرىنىڭ ۋكرايناعا اسكەر جىبەرۋ مۇمكىندىگىنە قاتىستى پىكىر ءبىلدىردى، دەپ حابارلايدى “ادىرنا” ۇلتتىق پورتالى Nege.kz-كە سىلتەپ.
تاسماعامبەتوۆتىڭ ايتۋىنشا، ەۋروپا بۇل ماسەلەنى بۇعان دەيىن دە تالقىلاعان، الايدا رەسمي تۇردە ىسكە اسىرماعان. ويتكەنى، مۇنداي قادام ايماقتىق قاۋىپسىزدىككە قاتەر ءتوندىرۋى مۇمكىن.
«ەۋروپا ۋكرايناعا اسكەر جىبەرۋ مۇمكىندىگىن قاراستىرىپ جاتىر. بۇل ايماقتاعى قاۋىپسىزدىككە قاۋىپ توندىرە مە؟ ۇقشۇ مۇنداي جاعدايعا جاۋاپ بەرۋ شارالارىن قاراستىرىپ جاتىر ما؟» – دەگەن باسىلىمنىڭ سۇراعىنا:
«ەۋروپا ەلدەرى ۋكرايناعا اسكەر جىبەرۋ مۇمكىندىگىن ءبىرىنشى رەت تالقىلاپ وتىرعان جوق. الايدا رەسمي تۇردە ىسكە اسىرمادى. سەبەبى، بۇل ايماقتىق اۋقىمدا قاۋىپتى جاعداي تۋعىزۋى مۇمكىن. ونىڭ ۇستىنە ەكونوميكا مەن الەۋمەتتىك سالاداعى كەلەڭسىز قۇبىلىستاردان شارشاعان ەۋروپا ەلدەرىنىڭ حالقى ءوز ۇكىمەتتەرىنىڭ مۇنداي شەشىمىن قۇپتاۋى ەكىتالاي. ويتكەنى، كونتينگەنتتەر شابۋىلداۋ وپەراتسيالارىنا قاتىسپاسا دا، مىسالى، پوليتسيا نەمەسە باقىلاۋ قىزمەتىن اتقاراتىن بولسا، بۇل قوعامعا اۋىرتپالىق سالادى. مۇنداي قاۋىپ-قاتەر تۋىنداعان جاعدايدا، ۇقشۇ ۇيىم جارعىلىق قۇجاتتارىندا قاراستىرىلعان جانە مۇشە مەملەكەتتەردىڭ بارلىعى ماقۇلداعان كومەكتىڭ ءتۇرلى نۇسقالارىن ۇسىنۋعا دايىن بولادى»، – دەپ جاۋاپ بەردى تاسماعامبەتوۆ.
ۇقشۇ باس حاتشىسىنىڭ ايتۋىنشا، ەگەر مۇنداي قاۋىپ تۋىنداسا، ۇيىم ءوز جارعىلىق قۇجاتتارىنا سايكەس، مۇشە مەملەكەتتەردىڭ كەلىسىمىمەن ءتيىستى شارالاردى قابىلداۋعا دايىن.
ايتا كەتەيىك، سوڭعى ۋاقىتتا بىرقاتار ەۋروپالىق ساياساتكەرلەر ۋكرايناعا بىتىمگەرشىلىك اسكەر جىبەرۋ ماسەلەسىن كوتەرە باستاعانى باق بەتتەرىندە تاراي باستاعان.
