قازاقستان حالىق پارتياسى سايلاۋالدى باعدارلاماسى مەن كانديداتتار ءتىزىمىن بەكىتتى.
ەلوردادا قازاقستان حالىق پارتياسىنىڭ (قحپ) كەزەكتەن تىس ححV سەزى ءوتتى. بۇل – قازاقستان رەسپۋبليكاسىنىڭ جاڭا كونستيتۋتسياسى كۇشىنە ەنگەننەن كەيىنگى پارتيالىق بىرلەستىكتىڭ العاشقى سەزى. اۋقىمدى فورۋمنىڭ باستى قورىتىندىسى 2026 جىلعى 23 تامىزعا تاعايىندالعان قۇرىلتاي دەپۋتاتتارىنىڭ سايلاۋىنا ارنالعان سايلاۋالدى ساياسي باعدارلامانى رەسمي تۇردە بەكىتۋ، 72 كانديداتتان تۇراتىن پارتيالىق ءتىزىمدى ماقۇلداۋ، سونداي-اق ساياسي كەڭەستىڭ جاڭا قۇرامىن سايلاۋ بولدى.
ەلدىڭ بارلىق وڭىرلەرىنەن كەلگەن دەلەگاتتار الدىندا قازاقستان حالىق پارتياسىنىڭ توراعاسى نۇرسۇلتان شوقانوۆ باعدارلامالىق بايانداما جاسادى. ءوز سوزىندە ول ءادىل ساياساتتى ۇلتتىق دومبىرامەن تەڭەستىردى: دومبىرادا جالعان ويناۋ مۇمكىن ەمەس، ويتكەنى حالىق جالعاندىقتى بىردەن سەزەدى.
– حالقىمىز ءۇشىن جاڭا كەزەڭ باستالدى. جاڭا كونستيتۋتسيا قابىلدانادى. بۇل قۇجات بۇگىن دە، بولاشاقتا دا حالىققا قىزمەت ەتەۋى ءتيىس. وعان ءبىزدىڭ پارتيانىڭ قوسقان ۇلەسى زور. بۇگىن قازاقستان حالىق پارتياسى ءۇشىن تاريحي كۇن. ءبىز پارتيانىڭ ستراتەگيالىق باعدارلاماسىن بەكىتەمىز. وسى باعىتتا ەڭبەك ەتەتىن مىقتى كانديداتتاردى ۇسىنامىز.
قحپ توراعاسى پارتيانىڭ ۇستانىمى وزگەرىسسىز قالاتىنىن اتاپ ءوتتى: قازاقستاننىڭ تابيعي بايلىعى، ەڭ الدىمەن، ونىڭ ازاماتتارىنىڭ ءال-اۋقاتىنا جۇمىس ىستەۋى كەرەك. قحپ ءۇشىن الەۋمەتتىك باسىمدىقتار – ەسەپ بەرۋدىڭ قۇرعاق تارماقتارى ەمەس، ناقتى ىستەرمەن دالەلدەنگەن كۇندەلىكتى پراكتيكالىق جۇمىس. بۇعان سۋ تاسقىنى زارداپتارىن جويۋ، انالاردى قولداۋ، ەرەكشە بالالارى بار وتباسىلارعا كومەكتەسۋ جانە ەڭبەك ادامىنىڭ قۇقىقتارى ءۇشىن قاتاڭ كۇرەس دالەل بولا الادى.
سەزدە تانىستىرىلعان سايلاۋالدى پلاتفورما دەلەگاتتار مەن كاسىبي قوعامداستىق تاراپىنان ۇلكەن قولداۋعا يە بولدى. باعدارلامانى تالقىلاۋ بلوگىندا تانىمال ساراپشى-پراكتيكتەر ءسوز سويلەدى. ءبىلىم بەرۋ سالاسىنىڭ مامانى لەيلا كۇلەنوۆا باعدارلامانىڭ مەكتەپكە دەيىنگى جانە مەكتەپتەگى ءبىلىم بەرۋگە باسا نازار اۋدارۋى – ەلدىڭ ءاربىر قيىرداعى اۋىلى مەن اۋدان ورتالىعىنداعى ناقتى جاعدايعا نەگىزدەلگەن وتە قۋاتتى ستراتەگيالىق قادام ەكەنىن مالىمدەدى. قر ەڭبەك جانە حالىقتى الەۋمەتتىك قورعاۋ مينيسترلىگى زاڭ قىزمەتى دەپارتامەنتىنىڭ ديرەكتورى سەرىك بەركامالوۆ ادام كاپيتالى مەن ەڭبەك ادامىن قورعاۋ ماسەلەسى قحپ-نىڭ جاڭارتىلعان پلاتفورماسىنىڭ نەگىزىنە اينالعانىن اتاپ ءوتتى. سونداي-اق، باعدارلامانى قولداپ قالەل ماقسۇتوۆ ءسوز سويلەدى.
72 كانديداتتان تۇراتىن پارتيالىق ءتىزىمنىڭ ساپاسىنا ەرەكشە ءمان بەرىلدى. ونىڭ قۇرامىنا ازاماتتاردىڭ مۇددەلەرىن اشىق قورعاۋعا دايىن، ءوز سالاسىنىڭ بىلىكتى ماماندارى: زاڭگەرلەر، ەكونوميستەر، مۇعالىمدەر، دارىگەرلەر، سونداي-اق بەدەلدى قوعامدىق پىكىر كوشباسشىلارى كىردى. مىنبەردەن تانىمال قوعام قايراتكەرى يرينا سميرنوۆا مەن تانىمال مەديا تۇلعا اشا ماتاي كومانداعا ءوز قولداۋىن ءبىلدىردى.
سەزد بارىسىندا پارتيانىڭ ساياسي كەڭەسىنىڭ قۇرامى تولىق جاڭارتىلدى، ونىڭ ستراتەگيالىق مىندەتتەرىن ەلميرا اۋەزوۆا، ءلاززات سۇلەيمەنوۆا جانە بالجان دوسمۇحامبەتوۆا تانىستىردى. نۇرسۇلتان شوقانوۆ ۇرپاقتار ساباقتاستىعىنا ەرەكشە توقتالىپ، كورنەكتى مەملەكەت قايراتكەرى ەرمۇحامەت ەرتىسباەۆقا پرينتسيپشىلدىگى، قايسار مىنەزى جانە بىرەگەي ساياسي مەكتەپ قالىپتاستىرعانى ءۇشىن تەرەڭ العىسىن ءبىلدىردى.
سەزدىڭ سوڭىندا ۆەنەرا نيگماتۋللينا مەن تامارا اساردىڭ باعدارلامالىق ۇندەۋلەرى تىڭدالدى. وسىناۋ ماڭىزدى وقيعانىڭ قورىتىندىسىن پارتيا باسشىسى تۇيىندەپ، دەلەگاتتاردى ەنجارلىقتى جەڭۋگە، ءار ۇيگە جەتۋگە جانە حالىق پارتياسىنىڭ قازاقستان ازاماتتارىنىڭ سەنىمىنە لايىق ەكەنىن ىسپەن دالەلدەۋگە شاقىردى.
