«بارلىعىنا قارسىمىن» دەگەن جولدىڭ بولۋى ۇنادى. بۇل پىكىردى كاۆكاز تاريحى ورتالىعىنىڭ ديرەكتورى ريزۆان نادجاف وگلى گۋسەينوۆ حالىقارالىق بايقاۋشىلارعا قولعابىس كورسەتۋ ورتالىعىنداعى بريفينگتە ايتتى، دەپ حابارلايدى “ادىرنا” ۇلتتىق پورتالى baq.kz-كە سىلتەمە كورسەتە وتىرىپ.
“تاڭەرتەڭنەن بەرى قالا ورتالىعىنداعى سايلاۋ ۋچاسكەلەرىنە باردىق. قار جاۋعانىنا قاراماستان، تاڭعى ساعات 8.30 كەزىندە ءبىز بارعان سايلاۋ ۋچاسكەلەرىندە سايلاۋشىلاردىڭ كەلۋى 10-12 پايىزدى قۇرادى. ماعان بيۋللەتەندە «بارلىعىنا قارسىمىن» دەگەن جولدىڭ بولۋى ۇنادى”، - دەدى ول.
سونداي-اق، ول داۋىس بەرۋشى بارلىعىنا قارسى ەكەنىن بىلدىرە الاتىنى زەرتتەۋشىلەر مەن الەۋمەتتانۋشىلار ءۇشىن ماڭىزدى كورسەتكىش بولاتىنىن ايتتى. كاۆكاز حالىقارالىق ۋنيۆەرسيتەتىنىڭ پروفەسسورى، ساياساتتانۋشى ۆاحتانگ مايسايا دا بۇل پىكىرگە قوسىلىپ، سايلاۋشىلاردىڭ بەلسەندىلىگى جونىندە ايتىپ ءوتتى.
“مەن تاڭەرتەڭنەن باستاپ 11 سايلاۋ ۋچاسكەسىندە بولدىم. قازىرگى كەزەڭدە سايلاۋشىلاردىڭ بەلسەندىلىگى ورتاشادان جوعارى. قازاقستاندا الدىنعى پرەزيدەنت سايلاۋىندا دا باقىلاۋشى بولعان بولاتىنمىن. ول كەزدە كەلۋشىلەر ۇلەسى ءتىپتى جوعارى بولعان”، - دەدى ول.
سونىمەن قاتار، ۆاحتانگ مايسايا ۆولونتەرلار جۇمىسى مەن سايلاۋ مادەنيەتىنىڭ جاستار تاراپىنان جوعارى ەكەنىن ايتتى. ول بارعان سايلاۋ ۋچاسكەلەرىندە ورىندىقتاردىڭ جەتپەۋى سياقتى تەحنيكالىق ەسكەرتۋ عانا بولعانىن جەتكىزدى.
