رەسەيدىڭ باكۋدەگى ەلشىسى ميحايل ەۆدوكيموۆ ازەربايجاننىڭ سىرتقى ىستەر مينيسترلىگىنە شاقىرىلدى. بۇل تۋرالى ازەربايجان ءسىم Report اگەنتتىگىنە مالىمدەدى، دەپ حابارلايدى "ادىرنا".
كەزدەسۋ بارىسىندا 5 شىلدە كۇنى كەشكە ۋكراينانىڭ نيكولاەۆ وبلىسىنداعى SOCAR جانارماي قۇيۋ ستانساسىنا درونمەن جاسالعان شابۋىلعا بايلانىستى رەسەي تاراپىنىڭ اتىنا قاتاڭ نارازىلىق ءبىلدىرىلدى.
رەسەي جاعىنا وسىعان قاتىستى رەسمي نوتا تابىستالدى.
ازەربايجان تاراپى بۇل مۇنداي العاشقى وقيعا ەمەس ەكەنىن اتاپ ءوتتى. بۇعان دەيىن ۋكرايناداعى SOCAR كومپانياسىنا تيەسىلى نىساندار، ونىڭ ىشىندە گاز تاراتۋ كومپرەسسورلىق ستانساسى مەن ودەسساداعى مۇناي بازاسى دا اسكەري شابۋىلدارعا ۇشىراپ، كومپانياعا ايتارلىقتاي ماتەريالدىق شىعىن كەلگەن. سونداي-اق كومپانيا قىزمەتكەرلەرى اراسىندا زارداپ شەككەندەر بولعان.
مينيسترلىك بىرنەشە رەت ەسكەرتۋ جاسالعانىنا قاراماستان، مۇنداي وقيعالاردىڭ جالعاسۋى شابۋىلداردىڭ ادەيى جاسالىپ وتىرعانىن كورسەتەتىنىن مالىمدەدى.
كەزدەسۋ بارىسىندا سونداي-اق اۋە شابۋىلدارى سالدارىنان ازەربايجاننىڭ كيەۆتەگى ەلشىلىگى مەن حاركوۆتاعى قۇرمەتتى كونسۋلدىعىنىڭ عيماراتتارى زاقىمدانعانى ايتىلدى. ازەربايجان تاراپى ۆەنا كونۆەنتسيالارىنا سايكەس ديپلوماتيالىق جانە كونسۋلدىق وكىلدىكتەردىڭ قاۋىپسىزدىگىن قامتاماسىز ەتۋ جونىندەگى حالىقارالىق مىندەتتەمەلەردى قاتاڭ ساقتاۋ قاجەتتىگىن ەرەكشە اتاپ ءوتتى.
ازەربايجان ءسىم رەسەي تاراپىن اتالعان وقيعالاردىڭ بارلىعى بويىنشا جان-جاقتى تەرگەۋ جۇرگىزۋگە، ءتيىستى تۇسىنىكتەمە بەرۋگە جانە ازاماتتىق نىساندار مەن ديپلوماتيالىق وكىلدىكتەردى قورعاۋعا قاتىستى حالىقارالىق مىندەتتەمەلەردى ساقتاۋعا شاقىردى.
ايتا كەتەيىك، 5 شىلدە كۇنى كەشكە رەسەي قارۋلى كۇشتەرى ۋكراينانىڭ نيكولاەۆ وبلىسىنداعى SOCAR جانارماي قۇيۋ ستانساسىنا ۇشقىشسىز ۇشۋ اپپاراتىمەن سوققى جاساعانى حابارلانعان.
ازەربايجان رەسپۋبليكاسىنىڭ مەملەكەتتىك مۇناي كومپانياسى SOCAR (State Oil Company of Azerbaijan Republic) – ەلدەگى ەڭ ءىرى مۇناي-گاز كومپانياسى ءارى تىگىنەن ينتەگراتسيالانعان حالىقارالىق ەنەرگەتيكالىق كورپوراتسيا. كومپانيا ازەربايجاننىڭ، ەۋروپانىڭ جانە جالپى ءوڭىردىڭ ەنەرگەتيكالىق قاۋىپسىزدىگىن قامتاماسىز ەتۋدە ماڭىزدى ءرول اتقارادى.
