3 شىلدە كەشىنەن باستاپ رەسەي قارۋلى كۇشتەرى كيەۆكە جاپپاي سوققىلار جاساۋدا. بۇل رەسەي پرەزيدەنتى ۆلاديمير پۋتين مەن اقش پرەزيدەنتى دونالد ترامپتىڭ قاڭتاردان بەرگى التىنشى رەسمي تەلەفون ارقىلى سويلەسكەنىنەن كەيىن بولىپ وتىر. بۇل تۋرالى كيەۆ قالالىق اسكەري اكىمشىلىگى Telegram-دا جاريالادى، دەپ حابارلايدى “ادىرنا”.
كيەۆ اكىمشىلىگىنىڭ مالىمەتىنشە، اۋە شابۋىلىنا قارسى قورعانىس جۇيەسى جۇمىس ىستەۋدە. ۇزاققا سوزىلاتىن اۋە دابىلى جاريالاندى.
الدىن الا اقپاراتقا سايكەس، كيەۆتىڭ دنەپروۆ اۋدانىندا اتىپ تۇسىرىلگەن دروننىڭ قالدىقتارى قۇلاعان.
سولومەن اۋدانىندا نىساندا ءورت شىققانى حابارلاندى. كيەۆ قالالىق اسكەري اكىمشىلىگىنىڭ باسشىسى تيمۋر تكاچەنكونىڭ ايتۋىنشا، زارداپ شەككەندەر تۋرالى مالىمەتتەر ناقتىلانۋدا.
سولومەن اۋدانىندا درون شابۋىلىنىڭ سالدارىنان تۇرعىن ۇيلەر ورتەنىپ جاتىر. سوققى سانى مەن قيراندىلاردىڭ اۋقىمى ناقتىلانۋدا.
ۋكراينا اۋە كۇشتەرىنىڭ حابارلاۋىنشا، رەسەيدىڭ «كينجال» اەروبالليستيكالىق زىمىرانىن تاسىمالداي الاتىن ميگ-31ك جويعىش ۇشاعىنىڭ ۇشقانى تىركەلدى.
«جاۋدىڭ زىمىران قولدانۋ قاۋپى بار»، – دەپ مالىمدەدى اۋە كۇشتەرى. كەيىنىرەك قالادا بىرنەشە جارىلىس دىبىسى ەستىلدى. الەۋمەتتىك جەلىلەردە بالليستيكالىق زىمىران سوققىلارى تۋرالى حابارلامالار تارادى.
3 شىلدە، تاڭعى ساعات 3:00-دەگى جاعداي بويىنشا، رەسەيدىڭ كيەۆكە جاساعان شابۋىلدارى سالدارىنان 8 ادام جارالانعان.
كرەملدىڭ حابارلاۋىنشا، ترامپ پۋتينمەن تەلەفون ارقىلى سويلەسكەن كەزدە «ۋكرايناداعى اسكەري قاقتىعىستى تەزىرەك توقتاتۋ ماسەلەسىن كوتەرگەن». ال پۋتين ءوز كەزەگىندە «قاقتىعىستىڭ سەبەپتەرىن جويۋ ماقساتتارىنان باس تارتپايتىنىن» مالىمدەگەن. بۇل تۋرالى 3 شىلدەدە رەسەي پرەزيدەنتىنىڭ كومەكشىسى يۋري ۋشاكوۆ حابارلاعان.
اقش پەن رەسەي پرەزيدەنتتەرىنىڭ الدىڭعى اڭگىمەسى ماۋسىم ايىنىڭ ورتاسىندا وتكەن. سول كەزدە پۋتين تاياۋ شىعىستاعى شيەلەنىستى رەتتەۋ پروتسەسىنە دايىن ەكەنىن ايتقان.
Financial Times گازەتىنىڭ مالىمەتىنشە، 4 شىلدەدە ترامپ ۋكراينا پرەزيدەنتى ۆلاديمير زەلەنسكيمەن دە تەلەفون ارقىلى سويلەسپەك. AFP اگەنتتىگىنە پىكىر بىلدىرگەن ۋكراينالىق شەنەۋنىكتەر كيەۆتە بۇل قوڭىراۋعا دايىندىق ءجۇرىپ جاتقانىن راستادى.
1 شىلدەدە Politico گازەتى ءۇش دەرەككوزگە سىلتەمە جاساپ، پەنتاگون ۋكرايناعا Patriot اۋە قورعانىس جۇيەلەرىنە ارنالعان زىمىرانداردى، Hellfire زىمىراندارى مەن باسقا دا جوعارى دالدىكتەگى ارتيللەريالىق وق-دارىلەردى جەتكىزۋدى ۋاقىتشا توقتاتقانىن حابارلادى. سەبەبى – اقش-تا بۇل قارۋ تۇرلەرىنىڭ قورى ازايىپ كەتكەنىنە الاڭداۋشىلىق. گازەتتىڭ جازۋىنشا، بۇل قارۋ-جاراقتاردى جەتكىزۋ تۋرالى كەلىسىمدەر كيەۆپەن بۇرىنعى پرەزيدەنت دجو بايدەن اكىمشىلىگى كەزىندە جاسالعان.
