سەمەيدە اباي اتىنداعى «جيدەباي-ءبورىلى» مەملەكەتتىك تاريحي-مادەني جانە ادەبي-مەموريالدىق مۋزەي-قورىعىندا ۇلتتىق دومبىرا كۇنىنە وراي «قازاعىمنىڭ ءۇنىسىڭ سەن – دومبىرا!» اتتى كورمە اشىلدى، دەپ حابارلايدى "ادىرنا" ءتىلشىسى.
كورمەدە اقىن اباي قۇنانبايۇلى مۋزەينە وتكىزگەن دومبىراسى قويىلعان.
مۋزەي ديرەكتورى ۇلان ساعاديەۆتىڭ ايتۋىنشا، كورمە ۇلتتىق قۇندىلىقتاردى ۇلىقتاۋعا ارنالعان ماڭىزدى مادەني شارالاردىڭ ءبىرى.
"ۇلتتىق دومبىرا كۇنىنە وراي مۋزەيىمىزدە ارنايى كورمە ۇيىمداستىرىپ وتىرمىز. كورمەدە كاسىبي كۇيشى-ورىنداۋشىلاردىڭ مۋزىكالىق اسپاپتارىمەن قاتار، قورىمىزداعى ەڭ قۇندى جادىگەرلەردىڭ ءبىرى – ۇلى ابايدىڭ دومبىراسى كوپشىلىك نازارىنا ۇسىنىلدى. بۇل جادىگەر حالقىمىزدىڭ رۋحاني مۇراسىن ايعاقتايتىن ەرەكشە قۇندىلىقتاردىڭ ءبىرى", – دەدى مۋزەي ديرەكتورى.
مۋزەي وكىلدەرى كورمەدە ۇلى ابايدىڭ دومبىراسىمەن بىرگە شاكارىمنىڭ ۇلى احاتتىڭ دومبىراسى، سونداي-اق بەلگىلى كۇيشى-ورىنداۋشىلار پايدالانعان مۋزىكالىق اسپاپتار ۇسىنىلىپ وتىرعانىن حابارلادى. كورمە ءبىر اي بويى اشىق بولادى.
