ۇلتتىق دومبىرا كۇنىنە ارنالعان «دومبىرا جانە ءداۋىر» كورمەسىنىڭ اشىلۋىندا وبلىس اكىمى اسحات شاحاروۆ «ەر ەدىگە» ەپوستىق ونەر مەكتەبىنىڭ تاربيەلەنۋشىلەرىمەن كەزدەسىپ، الەمدىك رەكورد يەگەرى اتانعان جاس ونەرپاز التىناي جەتەسوۆاعا دومبىرا سىيلادى.
بەلگىلى اقتوبەلىك شەبەر، قازاقستان رەسپۋبليكاسى شەبەرلەر جانە سۋرەتشىلەر وداعىنىڭ مۇشەسى ەرقوساي ابىلەۆ جاساعان دومبىرا التىنايدىڭ كوپتەن بەرگى ارمانى بولىپتى.
التىناي جەتەسوۆا – «شاشۋ» حالىقتىق وتباسىلىق ءانسامبلىنىڭ مۇشەسى. ول جەتى جىل بويى «قازانعاپ» مەكتەبىندە پريما-قوبىز سىنىبىندا ءبىلىم الىپ، كەيىنگى ەكى جىلدا «ەر ەدىگە» ەپوستىق ونەر مەكتەبىندە دومبىرا ورىنداۋشىلىعى مەن جىراۋلىق ونەردى مەڭگەرىپ كەلەدى. بيىل 9-سىنىپتى اياقتاعان جاس ونەرپاز احمەت جۇبانوۆ اتىنداعى مۋزىكا كوللەدجىنە ء«داستۇرلى ءان» ماماندىعى بويىنشا وقۋعا ءتۇسۋدى جوسپارلاپ وتىر.
كەزدەسۋ بارىسىندا ءوڭىر باسشىسى جۋىردا عانا «ەر ەدىگە» ەپوستىق ونەر مەكتەبىنىڭ تاربيەلەنۋشىلەرى قازاقتىڭ باتىرلىق جىرلارىن 24 ساعات بويى ۇزدىكسىز ورىنداپ، ازيا مەن افريكا ەلدەرىنىڭ GBR (Global Book of Records) دۇنيەجۇزىلىك رەكوردتار كىتابىنا ەنگەنىن ەرەكشە اتاپ ءوتتى. ونىڭ ايتۋىنشا، بۇل – ۇلتتىق ونەردىڭ ومىرشەڭدىگىن دالەلدەيتىن جانە اقتوبە ءوڭىرى عانا ەمەس، بۇكىل قازاقستان ءۇشىن ماقتانىش بولاتىن تاريحي جەتىستىك.
وبلىس اكىمى مەكتەپتىڭ جەتەكشىسى مەن تاربيەلەنۋشىلەرىنە ۇلتتىق مۇرانى ساقتاۋ مەن دامىتۋعا قوسىپ جۇرگەن ۇلەستەرى ءۇشىن العىس ايتىپ، ولاردىڭ ەڭبەگى وسكەلەڭ ۇرپاقتى ۇلتتىق قۇندىلىقتارعا باۋلۋدا ەرەكشە ماڭىزعا يە ەكەنىن جەتكىزدى.
ءىس-شارا بارىسىندا اسحات شاحاروۆ دومبىرانىڭ قازاق حالقى ءۇشىن تەك مۋزىكالىق اسپاپ ەمەس، رۋحاني قۇندىلىقتىڭ، تاريحي جادىنىڭ جانە ۇلتتىق بىرەگەيلىكتىڭ سيمۆولى ەكەنىن اتاپ ءوتتى.
«دومبىرا – جاي عانا مۋزىكالىق اسپاپ ەمەس. ول – قازاق حالقىنىڭ قاسيەتتى قازىناسى، رۋحاني جادىمىزدىڭ التىن ارقاۋى، مادەني كودىمىز بەن ۇلتتىق بولمىسىمىزدىڭ ايقىن كورىنىسى. قوس ىشەكتەن توگىلگەن كۇي عاسىرلار بويى حالقىمىزدىڭ تاريحىن شەرتىپ، ەرلىگى مەن ءور رۋحىن، تۋعان جەرگە دەگەن سۇيىسپەنشىلىگىن، قۋانىشى مەن سىناعىن ۇرپاقتان ۇرپاققا جەتكىزىپ كەلەدى. دومبىرا – ۇلتتىڭ ءۇنى، ال كۇي – ۇلى دالانىڭ جۇرەك سوعىسى.
مەملەكەت باسشىسى قاسىم-جومارت كەمەلۇلى توقاەۆ ۇلتتىق قۇندىلىقتاردى ساقتاۋ مەن دارىپتەۋ – مەملەكەتتىلىگىمىزدى نىعايتۋدىڭ ماڭىزدى نەگىزدەرىنىڭ ءبىرى ەكەنىن بىرنەشە رەت اتاپ ءوتتى. ۇلتتىق دومبىرا كۇنىنىڭ بەلگىلەنۋى – مەملەكەتىمىزدىڭ مادەني مۇرانى ساقتاۋعا، ءداستۇرلى ونەردى دامىتۋعا جانە جاس ۇرپاقتى ۇلتتىق قۇندىلىقتارعا قۇرمەت رۋحىندا تاربيەلەۋگە ەرەكشە ءمان بەرەتىنىنىڭ جارقىن دالەلى.
بۇگىن ءبىز قۇرمانعازى، تاتتىمبەت، داۋلەتكەرەي، دينا نۇرپەيىسوۆا، قازانعاپ، ىقىلاس، سەيتەك جانە باسقا دا ۇلى كۇيشى تۇلعالاردى زور ماقتانىشپەن ەسكە الامىز. ولاردىڭ ماڭگىلىك مۇراسى بۇگىنگى جاس مۋزىكانتتارعا شابىت بەرىپ، تۋعان جەرگە دەگەن سۇيىسپەنشىلىك، حالىق بىرلىگى مەن تاريحقا قۇرمەت سەكىلدى اسىل قۇندىلىقتاردى دارىپتەۋدى جالعاستىرىپ كەلەدى»، – دەدى وبلىس اكىمى.
