بيلىك ۋتيليزاتسيالىق الىم دوعارىلمايتىنىن جاريالاۋى اۆتونارىققا قانشالىقتى اسەر ەتتى؟ جۇرىلگەن كولىكتەر باعاسى قالاي قۇبىلدى؟ كولىك ساتۋشىلار باعانى نارىققا قاراي بەلگىلەگەنىن ايتسا، كوپشىلىك ونى سىنادى.
ۋتيلالىم ماسەلەسى – قازاقستاندىقتاردى ءبىر ۇمىتتەندىرىپ، ءبىر كۇڭىرەنتكەن تاقىرىپتىڭ ءبىرى. ءبىر توپ بۇل ماسەلەنى شەشۋ ءۇشىن جينالىپ، استاناعا ارنايىلاپ بارسا، «ۋتيلالىم الىنسىن» دەگەن ماقساتپەن پەتيتسيا جاريالانىپ، مىڭداعان قازاقستاندىق قول قويدى. سول سەبەپتى شەندىلەرمەن ارنايى كوميسسيا قۇرىلىپ، قوعامدىق تالقىلاۋ دا بولدى.
شارلاپاەۆتىڭ شاتاعى. پەتيتسيا نە ءۇشىن؟
ونەركاسىپ جانە قۇرىلىس ءمينيسترى قانات شارلاپاەۆ 19 شىلدە كۇنى ۋتيليزاتسيالىق الىمنىڭ دوعارىلمايتىنىن، وعان ەش نەگىز جوق ەكەنىن اشىپ ايتتى. سول سەبەپتى ۋتيليزاتسيالىق الىمنىڭ كولەمى وزگەرىسسىز قالادى.
«ۋتيلالىم مەن العاشقى تىركەۋگە قاتىستى پەتيتسيانى قاراستىرىلدى. پەتيتسيانى قاراۋ بارىسىندا بارلىق زاڭنامالىق تالاپتار ساقتالدى. «اشىق قوعامدىق تالقىلاۋ» ناتيجەسىندە، پەتيتسيا تالاپتارىن قاناعاتتاندىرۋدان باس تارتۋ تۋرالى شەشىم قابىلداندى»، - دەگەن مينيستر.
ياعني، ۋتيلالىمعا قارسى پەتيتسياداعى تالاپتار ورىندالمادى. باسشىلىق مۇنىڭ سەبەبىن وتاندىق ءاۆتووندىرىستى قولداۋمەن ءتۇسىندىردى.
«ۋتيل الىم جويىلسا، جۇرت جاپپاي شەتەلدەن كولىك اكەلەدى. ال ءبىزدىڭ زاۋىتتاردان شىعاتىن ماشينالار وتپەي قالۋى مۇمكىن»، - دەگەن مينيستر شارلاپاەۆ.
سوندا نارىق بۇيدەدى
جۇما كۇنى جاساعان ءمينيستردىڭ مالىمدەمەسى كوپ ۇزاماي جۇرىلگەن كولىكتەردىڭ باعاسىنا دا اسەر ەتىپ ۇلگەرگەنى بايقالادى.
الەۋمەتتىك جەلىدەگى مالىمەتتەرگە شولۋ جاساپ شىققانىمىزدا مىنانداي باعالار بەلگىلەنگەنىن كوردىك.
Toyota Camry 45 كولىگى 6 ملن 800 مىڭ تەڭگەدەن تۇر. 1999 جىلى شىعارىلعان Lexus RX300 كولىگى 4 ملن 700 مىڭ تەڭگە. 2012 جىلعى كىا اۆتوكولىگىنىڭ قۇنى - 7 ملن تەڭگەنىڭ ماڭايى.
«ۋتيلالىم الىنبايدى دەگەن سوڭ بازار كولىككە تولعان» دەيدى جۇرتشىلىق.
الماتىنىڭ «بارىس» اۆتوبازارىندا 2001 جىلعى Mersedes كولىگى 4 ملن 500 مىڭ تەڭگەگە باعالانىپ تۇر. سۇرانىستاعى Mersedes ماركىلى 2007 جىلعى كولىك 5 ملن 600 مىڭ تەڭگەگە باعالانىپ تۇرعانى انىقتالدى. وڭتۇستىك كورەيادا وندىرىلەتىن KIA K7 كولىگىنىڭ 2015 جىلعى ءتۇرى 5 ملن تەڭگەنى قۇرايدى. 1995 جىلعى Mersedes كولىگى 3 ملن 500 مىڭ تەڭگە تۇرادى. Toyota Camry 35 كولىگى 6 ملن 500 مىڭ تەڭگە بولسا، Toyota Camry 55 كولىگى 6 ملن 300 مىڭ تەڭگەدەن ساۋدالانىپ جاتىر. ال گەرمانيادا وندىرىلەتىن BMW 735 ماركالى كولىگى 5 ملن 300 مىڭعا باعالانعان.
ساتۋشىنىڭ قۋانىشى – الۋشىنىڭ مۇڭى
كولىك ساتۋشىلارى بولسا، اۆتوبازارداعى باعالاردى نارىققا بايلانىستى بەلگىلەگەنىن ايتىپ اقتالادى.
ال جەلى قولدانۋشىلارى «نە سۇمدىق؟ تىم قىمبات»، «ءبىزدىڭ ۇكىمەتكە راقمەت، وزدەرى وسى كولىكتەردى الىپ ءمىنسىن»، «قازاقستانداعى ەسكى كولىكتىڭ قۇنى كورەياداعى سۋ جاڭا ماشينامەن بىردەي»، «بۇگىن بازارعا بارىپ، ءوزىم كورىپ قايتتىم. قىتايلىق ازاماتتار نەسيە شىعارىپ بەرەمىز دەپ ءجۇر، سەبەبى باعا ۋداي قىمبات ەكەن» دەگەن سىندى ءتۇرلى پىكىر ءبىلدىرىپ جاتىر.
سىمبات ناۋحان
«ادىرنا» ۇلتتىق پورتالى
