قىرعىزستان الەمدىك ەنەرگەتيكالىق نارىقتاعى تۇراقسىز جاعدايعا بايلانىستى جانار-جاعارماي ماتەريالدارىنىڭ تۇراقتى جەتكىزىلۋىن قامتاماسىز ەتۋ ماقساتىندا ازەربايجانعا رەسمي ءوتىنىش جولدادى. بۇل تۋرالى Report جازدى، دەپ حابارلايدى «ادىرنا» ءتىلشىسى.
ەلدىڭ ەنەرگەتيكا مينيسترلىگى ءدال وسىنداي ءوتىنىشتى رەسەي، قازاقستان، بەلارۋس، وزبەكستان جانە تۇرىكمەنستاننىڭ ۋاكىلەتتى مەملەكەتتىك ورگاندارىنا دا جىبەرگەن. ۆەدومستۆونىڭ مالىمەتىنشە، بۇل شارالار وتىن جەتكىزىلىمىنىڭ تۇراقتىلىعىن ساقتاپ، ەلدىڭ ەنەرگەتيكالىق قاۋىپسىزدىگىن قامتاماسىز ەتۋ ءۇشىن قولعا الىنعان. سونىمەن قاتار جەتكىزىلىم كوزدەرىن ءارتاراپتاندىرۋ جانە وسى سالاداعى حالىقارالىق ىنتىماقتاستىقتى كەڭەيتۋ بويىنشا كەلىسسوزدەر جۇرگىزىلىپ جاتىر.
مينيسترلىك قازىرگى ۋاقىتتا قىرعىزستاندا جانار-جاعارماي ماتەريالدارىنىڭ جەتكىلىكتى قورى قالىپتاستىرىلعانىن اتاپ ءوتتى. جەتكىزىلىمدەر بۇرىن جاسالعان كەلىسىمشارتتارعا سايكەس ۇزدىكسىز جۇزەگە اسىرىلىپ، تۇراقتى باقىلاۋدا ۇستالىپ وتىر.
سونداي-اق قىرعىزستان ججم-ءنىڭ نەگىزگى بولىگىن يمپورتتايتىندىقتان، الەمدىك ەنەرگەتيكالىق نارىقتاعى وزگەرىستەر، ونىڭ ىشىندە تاياۋ شىعىستاعى گەوساياسي شيەلەنىس، حالىقارالىق لوگيستيكاداعى تاۋەكەلدەر جانە مۇناي باعاسىنىڭ قىمباتتاۋى ەلدىڭ ىشكى نارىعىنا اسەر ەتەتىنى ايتىلدى.
بۇعان دەيىن Report اگەنتتىگىنە بەرگەن سۇحباتىندا قىرعىزستاننىڭ سول كەزدەگى ەنەرگەتيكا ءمينيسترى تاالايبەك يبراەۆ ەگىس جۇمىستارى مەن تۋريستىك ماۋسىم كەزەڭىندە ىشكى سۇرانىستىڭ ارتۋىنا بايلانىستى رەسپۋبليكا ازەربايجاننان بەنزين مەن ديزەل وتىنى يمپورتىن ايىنا 20–30 مىڭ تونناعا دەيىن ۇلعايتۋدى جوسپارلاپ وتىرعانىن مالىمدەگەن ەدى.
