حالىق اراسىندا قالىپتاسقان قۇقىقتىق سانا، قۇقىقتىق مادەنيەت، قوعامداعى بولىپ جاتقان زاڭسىز ءىس-ارەكەتتەر توڭىرەگىندەگى وزەكتى سۇراقتاردىڭ جاۋابىن «ادىرنا» ۇلتتىق پورتالىنىڭ ءتىلشىسى ارنايى زاڭگەردەن الدى.
-ساعنادين مىرزا، سۇراق توڭىرەگىن حالىقتىڭ قۇقىقتىق ساناسىنان باستايىق. تۇعىرى بيىك تاۋەلسىز ەل اتانعانىمىزعا وتىز جىل تاياپ قالدى. قۇقىقتىق مادەنيەت قالىپتاسقان با؟
-جاسىرىپ قايتەمىز، كوز كۋا. ەلىمىزدە قۇقىقتىق مادەنيەت پەن سانا قارقىنىنىڭ دامۋى تومەن دەڭگەيدە دەسەك بولادى. بۇل قۇبىلىس تەك قاراپايىم ادامدار اراسىندا عانا ەمەس، بەلدى ادامداردىڭ ءىس-ارەكەتتەرىنەن دە كورىنىس تاۋىپ جاتىر.
-ينتەرنەت جەلىسى دامىعان زاماندا، زاڭ جوباسىنىڭ بارلىق ەلەكتروندى نۇسقاسى بار. بىلمەگەن ساۋالعا جاۋاپ تەز قازىر. الايدا قاراپايىم حالىقتىڭ وتباسىلىق پروبلەمالارىن، زاڭ اياسىندا شەشىلەتىن ماسەلەلەرىن ەفير الدىنا كەلىپ، “ زاڭدى بىلمەيمىن” دەۋىنە نە سەبەپ؟
-قوعامنىڭ كەيبىر تۇسى قاراڭعىلانىپ قالعان. 90 جىلدارى ءبىلىم دەڭگەيى قۇلدىراپ كەتتى. ءبارى جان باعۋ باعىتىندا عانا ءىس-ارەكەت جاساپ، بىلىمگە قۇشتارلىق ازايىپ كەتتى. حالىقتىڭ كوزقاراسى بويىنشا كەيبىر زاڭدار بىزدە جۇمىستى ناقتى ىستەمەيدى. ءبىر قىزىعى، كوپ ادامنىڭ وي تۇكپىرىندە «بارلىق شارۋا زاڭمەن ەمەس، تەك اقشامەن، پارا بەرۋمەن عانا شەكتەلەدى» دەگەن ۇعىم قالىپتاسقان. سوندىقتان دا ارنايى زاڭدى وقىپ، ىزدەنىپ ۋاقىت شىعىنداعىلارى كەلمەيدى. ءار ادام ءوز ويىن دۇرىس جاققا قاراي بۇرىپ، ناقتىلىقتى تالاپ ەتسە جاقسى بولار ەدى.
ال قالتالارىندا قاراجاتى جوق، زاڭنان حابارى جوق ازامات، ازاماتشالار وسى سەبەپتەن تەلەديدارعا بارىپ، «ءبىز زاڭدى بىلمەيمىز» دەپ، ۋ-شۋمەن دۇرىس شەشىمگە قول جەتكىزەمىن دەپ ويلايدى. تاعى ءبىر اقيقات، زاڭ راسىندا كەيدە كومەكتەسەدى، كەيدە كومەكتەسپەيدى. جىل سايىن ءاربىر كودەكسكە وزگەرىستەر ەنگىزىلىپ جاتىر. ءبىر كودەكستىڭ اياسىندا بىرنەشە قاۋلىلار شىعىپ جاتىر. ارينە، وزگەرىس دۇرىس دۇنيە. الايدا، ءدال وسى وزگەرىستەردى ۇنەمى باقىلاپ وتىرۋ قاراپايىم حالىققا عانا ەمەس، زاڭگەرلەردىڭ وزىنە دە قيىنعا سوعۋدا.
-مەملەكەت باسشىسىنان كومەك سۇراپ، بەينەۇندەۋ جاريالايتىن ادامدار كوبەيىپ كەتتى. زاڭ كومەكتەسە الماعان جاعدايعا پرەزيدەنت “ارالاسىپ” ماسەلەنى شەشە الا ما؟ قالاي ويلايسىز؟
-مەملەكەت باسشىسىنان كومەك سۇراۋدىڭ كوبەيىپ كەتۋىنىڭ سەبەبى قولدانىستاعى زاڭداردىڭ جۇمىس ىستەمەۋى دەپ بىلەمىن. سوت، پروكۋراتۋرا، ادىلەت باسقارماسىنىڭ زاڭدى دۇرىس تالقىعا سالماۋىندا بوپ تۇر.
كەيبىر ازاماتتار ەلباسىدان كومەك سۇراپ بەينەۇندەۋلەر جاريالاۋدا. ەلباسى بارلىق وتىنىشتەردى قاراستىرمايتىنى بەلگىلى. ول ارىز-شاعىمدار قايتادان تومەنگى ورگانداردىڭ قۇزىرىنا تۇسەدى. كەيىن، ەلباسىنىڭ تاپسىرماسى بولعان سوڭ، ولار ونى ەندىگى جەردە دۇرىستاپ قاراۋعا تىرىسادى. بارلىق دۇنيە پرەزيدەنتتىڭ، ەلباسىنىڭ ايتۋىمەن شەشىلەدى دەگەنگە سەنۋ قيىن.
سۇحباتىڭىزعا راقمەت!
اڭگىمەلەسكەن: ءىنجۋ ومىرزاق،
«ادىرنا» ۇلتتىق پورتالى
