سەردار بەردىمۇحامەدوۆ تۇركىمەنستاننىڭ ۇلتتىق قاۋىپسىزدىك ءمينيسترى نازار اتاگاراەۆتى باسقا جۇمىسقا اۋىسۋىنا بايلانىستى قىزمەتىنەن بوساتتى. ءتيىستى شەشىم مەملەكەتتىك قاۋىپسىزدىك كەڭەسىنىڭ وتىرىسىندا قابىلداندى، دەپ حابارلايدى “ادىرنا” Turkmenportal-عا سىلتەمە جاساپ.
تۇركىمەنستاننىڭ ۇلتتىق قاۋىپسىزدىك مينيسترلىگىنىڭ جاڭا باسشىسى بولىپ بۇعان دەيىن پرەزيدەنتتىڭ قاۋىپسىزدىك قىزمەتىن باسقارعان گەنەرال-مايور دوۆلەتگەلدي مەرەدوۆ تاعايىندالدى. ول حالىققا، وتانعا جانە مەملەكەت باسشىسىنا ادال بولۋعا انت بەردى.
تۇركىمەنستاننىڭ ۇلتتىق قاۋىپسىزدىك مينيسترلىگى – ەلدەگى ارنايى قىزمەتتەردىڭ باستى ورگانى، قاۋىپسىزدىك پەن بارلاۋ ماسەلەلەرىنە جاۋاپ بەرەدى. ول 1991 جىلى كەڭەستىك كگب نەگىزىندە قۇرىلعان جانە تىكەلەي پرەزيدەنتكە باعىنادى. ونىڭ مىندەتتەرىنە مەملەكەتتىك قاۋىپسىزدىكتى قورعاۋ، قارسى بارلاۋ، تەرروريزممەن جانە باسقا دا قاۋىپتەرمەن كۇرەسۋ، سونداي-اق ستراتەگيالىق سالالاردى باقىلاۋ كىرەدى.
مينيسترلىك قىزمەتكەرلەرى قىلمىسپەن كۇرەس جانە قوعامدىق ءتارتىپتى قاداعالاۋ بويىنشا ءتۇرلى وپەراتسيالارعا قاتىسادى، سونداي-اق ازاماتتاردى ۇلتتىق قاۋىپسىزدىككە تونەتىن قاتەرلەر تۇرعىسىنان تەكسەرەدى. بۇل قۇرىلىم ءداستۇرلى تۇردە تۇركىمەنستاننىڭ ساياساتى مەن كۇشتىك بلوگىندا ماڭىزدى ءرول اتقارادى.
ەسكە سالايىق، 10 اقپاندا سادىر جاپاروۆ ءوزىنىڭ دوسى ءارى سەرىكتەسى قامشىبەك تاشيەۆتى بارلىق لاۋازىمدارىنان بوساتقان بولاتىن. قىرعىزستان پرەزيدەنتىنىڭ ءباسپاسوز قىزمەتىنىڭ حابارلاۋىنشا، «بۇل قادامنىڭ باستى ماقساتى – مەملەكەتتىڭ بىرلىگىن نىعايتۋ جانە قوعامدا، سونىڭ ىشىندە مەملەكەتتىك قۇرىلىمدار اراسىندا جىككە ءبولىنۋدىڭ الدىن الۋ». بۇل جاعداي قىرعىزستان پرەزيدەنتىنە مەرزىمىنەن بۇرىن سايلاۋ وتكىزۋ تۋرالى ءوتىنىش جاسالعان تۇستا بولعان.
تاشيەۆتىڭ وتستاۆكاسىنان كەيىن كۇشتىك قۇرىلىمداردا قايتا قۇرۋ باستالدى: ونىڭ ورىنباسارلارى قىزمەتىنەن ايىرىلدى، شەكارا قىزمەتى ۇقك قۇرىلىمىنان شىعارىلدى، سونداي-اق تىكەلەي پرەزيدەنتكە باعىناتىن جاڭا مەملەكەتتىك كۇزەت قىزمەتى قۇرىلدى. جەرگىلىكتى پارلامەنتتىڭ سپيكەرى نۇرلانبەك تۇرعىنبەك تە وكىلەتتىگىن توقتاتتى. تاشيەۆتىڭ جيەنى نۇرعازى ماتيساكوۆ كولىك پروكۋراتۋراسىنىڭ باسشىسى قىزمەتىنەن بوساتىلدى.
