تاڭەرتەڭ استاناداعى 66 اۆتوبۋسقا وتىرىپ، كوڭىل-كۇيىم ءتۇسىپ كەتتى. جەكە كولىگى ەمەس، قوعامدىق كولىكتە سوعىس اندەرى قويىلىپ، سوعىستى رومانتيزاتسيالاعان پروپاگاندالىق “تۋىندىلار” ايقايلاپ تۇر.
قازىر كوپتەگەن رەسەيلىك Z-انشىلەرىنە ۋكراينا مەن ەۋروپادا قاتاڭ تىيىم سالىنعان، ولار ءبىز سياقتى ەمىن-ەركىن ەۋروپاعا بارىپ ساياحاتتاي دا المايدى. سەبەبى سوعىستى دارىپتەيدى. بۇل تۇرعىدان نەگە قازاقستاننىڭ قوعامدىق كولىگىندە رەسەيلىك اندەر قويىلۋى كەرەك؟ جەمە-جەمگە كەلگەندە، بۇل ءتىل تۋرالى زاڭدى دا بۇزۋ…
قوعامدىق كولىكتەردە قازاقشا اندەر قويىلۋى كەرەك. وتكەندە 55ا اۆتوبۋسىندا دا كىلەڭ ورىسشا اندەر قويىلدى، ءتىل تۋرالى زاڭنىڭ تالاپتارى قايدا قالدى؟
بۇل ورايدا مەندە قالاداعى جولاۋشىلار تاسىمالىنىڭ رەسمي وپەراتورى - “City Transportation Systems» كومپانياسىنا سۇراقتار:
بىرىنشىدەن، سىزدەردە رەسمي بەكىتىلگەن اندەر مەن راديولاردىڭ پلەيليستى بار ما؟ ماسەلەن، قازاق راديوسى، شالقار نە جۇلدىز فم سياقتى ءتىل زاڭدارىن بۇلجىتپاي ورىندايتىن راديولارعا باسىمدىق بەرەسىزدەر مە؟
ەكىنشىدەن، تىلدەر تۋرالى زاڭدى قانشالىقتى ورىندايسىزدار؟ قازىرگى تالاپ بويىنشا، مەملەكەتتىك تىلدەگى اۋديو، ۆيدەو كورسەتىلىمدەردىڭ كولەمى 70 پايىزدان اسۋى كەرەك ەمەس پە ەدى؟ ءتىپتى، 100 پايىز قازاقشا بولۋى ءتيىس. بۇل - دەموگرافيا تالابى.
جالپى، استانا اۆتوبۋستارىن جايلى دەپ ماقتاپ جاتادى عوي. بىراق جايلىلىق تەك اۆتوبۋستىڭ ساپاسىنا عانا ەمەس، تاڭەرتەگى، كۇندىزگى جانە كەشكى كوڭىل-كۇي سىيلاي الاتىن اۋەندەرىنە دە بايلانىستى. تاڭەرتەڭ سوعىس تۋرالى ەمەس، ءومىر تۋرالى اندەر تىڭداعىمىز كەلەدى.
قازىر قازاق اندەرى الەمدىك ترەندكە اينالىپ وتىر. ادامنىڭ “جۇرەك” ءانىن 1 ملرد-تان استام ادام تىڭداعان. ديماشتىڭ اندەرى الەمنىڭ تۇكپىر-تۇكپىرىندەگى ادامداردى قازاقشا ۇيرەنۋگە جەتەلەپ جاتىر. الاتاۋ سەرىلەرى تۇركيادان باستاپ، بۇكىل تۇركى الەمىن انىمەن “جارىپ” جاتىر. وسى انشىلەردى نەگە دارىپتەمەيمىز؟ نەگە تاڭەرتەڭ جاقسى كوڭىل-كۇي سىيلايتىن، جاستار دا، ورتا بۋىن دا تىڭدايتىن كاليفارنيا، سادراددين، ەركە ەسماحان، ت.ب. انشىلەردىڭ اندەرى قويىلمايدى؟
رەسەيلىك اندەردىڭ قويىلۋى - ءبىر-ەكى اۆتوبۋستىڭ ماسەلەسى ەمەس، بۇل يدەولوگيا ماسەلەسى. اۆتوبۋستاردا ءتىل تۋرالى زاڭ تالاپتارى بۇلجىتپاي ورىندالىپ، ادامدارعا جاقسى كوڭىل-كۇي سىيلايتىن، حالىقتىڭ باسىم بولىگى تىڭدايتىن اندەر قويىلۋى كەرەك. ال سوعىس اندەرىن جەكە كولىگىڭدە، نە ۇيىڭدە تىڭداي الاسىڭ.
