ەرلان قارين پرەزيدەنت اكىمشىلىگى باسشىسىنىڭ ءبىرىنشى ورىنباسارى بولىپ تاعايىندالدى

مەملەكەت باسشىسىنىڭ جارلىعىمەن ەرلان قارين پرەزيدەنت اكىمشىلىگى باسشىسىنىڭ ءبىرىنشى ورىنباسارى بولىپ تاعايىندالدى، دەپ حابارلايدى "ادىرنا" ءتىلشىسى.

بۇل تۋرالى اقوردانىڭ ءباسپاسوز قىزمەتى حابارلادى.

جارلىققا سايكەس، ەرلان قارين بۇرىن اتقارعان مەملەكەتتىك كەڭەسشى قىزمەتىنەن بوساتىلدى.

ەرلان قارين 1976 جىلعى 26 مامىردا تۇركىستان وبلىسىنىڭ اقسۋ اۋىلىندا دۇنيەگە كەلگەن. ول – ساياساتتانۋشى، ساياسات عىلىمدارىنىڭ كانديداتى، ۇلتتىق قاۋىپسىزدىك جانە تەرروريزم ماسەلەلەرىن زەرتتەگەن ساراپشى.

1997 جىلى ق. جۇبانوۆ اتىنداعى اقتوبە مەملەكەتتىك ۋنيۆەرسيتەتىنىڭ تاريح فاكۋلتەتىن، ال 1999 جىلى ءال-فارابي اتىنداعى قازاق ۇلتتىق ۋنيۆەرسيتەتىنىڭ فيلوسوفيا جانە ساياساتتانۋ فاكۋلتەتىنىڭ اسپيرانتۋراسىن تامامداعان.

ەڭبەك جولىندا جوعارى وقۋ ورنىندا وقىتۋشى، عىلىمي-زەرتتەۋ ۇيىمدارىنىڭ قىزمەتكەرى، ساياسي زەرتتەۋلەر اگەنتتىگىنىڭ ديرەكتورى، پرەمەر-ءمينيستردىڭ شتاتتان تىس كەڭەسشىسى، ماڭعىستاۋ وبلىسى اكىمىنىڭ كەڭەسشىسى قىزمەتتەرىن اتقارعان.

سونداي-اق پرەزيدەنت اكىمشىلىگىنىڭ ىشكى ساياسات ءبولىمىن باسقاردى، «نۇر وتان» پارتياسىنىڭ حاتشىسى بولدى، پرەزيدەنت جانىنداعى قازاقستان ستراتەگيالىق زەرتتەۋلەر ينستيتۋتىن جانە «قازاقستان» رەسپۋبليكالىق تەلەراديوكورپوراتسياسىن باسقاردى.

2019 جىلدان باستاپ پرەزيدەنتتىڭ كەڭەسشىسى، كەيىن ساياسي ماسەلەلەر جونىندەگى كومەكشىسى قىزمەتتەرىن اتقاردى. 2022 جىلعى 5 قاڭتاردان بەرى مەملەكەتتىك حاتشى، كەيىن مەملەكەتتىك كەڭەسشى لاۋازىمىندا جۇمىس ىستەدى.